പണം ലാഭം, ആനുകൂല്യങ്ങളും നിരവധി; യാത്ര ചെലവുകൾക്ക് ക്രെഡിറ്റ് കാർഡ് ഉപയോഗിക്കാം

അവധിക്കാലം ആഘോഷിക്കാൻ ആഗ്രഹിക്കാത്തവരായി ആരുമുണ്ടാകില്ല. എന്നാൽ വിമാന ടിക്കറ്റും താമസസൗകര്യങ്ങളും ഉൾപ്പെടെയുള്ള വലിയ ചിലവുകൾ പലപ്പോഴും നമ്മുടെ സാമ്പത്തിക പദ്ധതികളെ താളംതെറ്റിക്കാറുണ്ട്. കൃത്യമായ പ്ലാനിംഗും ക്രെഡിറ്റ് കാർഡുകൾ ബുദ്ധിപരമായും ഉപയോഗിച്ചാൽ വലിയ സാമ്പത്തിക ഭാരമില്ലാതെ തന്നെ നിങ്ങൾക്ക് സ്വപ്നയാത്രകൾ യാഥാർത്ഥ്യമാക്കാം. ക്രെഡിറ്റ് കാർഡ് ഉപയോഗിച്ച് അവധിക്കാല യാത്രകൾ പ്ലാൻ ചെയ്യുമ്പോൾ ശ്രദ്ധിക്കേണ്ട പ്രധാന കാര്യങ്ങൾ ഇവയാണ്.

1. റിവാർഡ് പോയിന്റുകൾ പ്രയോജനപ്പെടുത്തുക 

യാത്രകൾക്കായി പ്രത്യേക ആനുകൂല്യങ്ങൾ നൽകുന്ന നിരവധി ക്രെഡിറ്റ് കാർഡുകൾ ഇന്ന് ലഭ്യമാണ്. ഓരോ തവണ കാർഡ് ഉപയോഗിക്കുമ്പോഴും ലഭിക്കുന്ന റിവാർഡ് പോയിന്റുകൾ വിമാന ടിക്കറ്റുകൾ ബുക്ക് ചെയ്യാനോ ഹോട്ടൽ താമസത്തിനോ ആയി ഉപയോഗിക്കാം. യാത്രയ്ക്ക് മാസങ്ങൾക്ക് മുൻപേ തന്നെ പോയിന്റുകൾ ശേഖരിച്ചു തുടങ്ങുന്നത് ടിക്കറ്റ് നിരക്കിൽ വലിയ ഇളവ് ലഭിക്കാൻ സഹായിക്കും.

2. ട്രാവൽ ഇൻഷുറൻസും മറ്റ് സൗജന്യ ആനുകൂല്യങ്ങളും 

പല പ്രീമിയം കാർഡുകളും എയർപോർട്ട് ലോഞ്ച് ആക്സസ്, സൗജന്യ ട്രാവൽ ഇൻഷുറൻസ് എന്നിവ വാഗ്ദാനം ചെയ്യുന്നുണ്ട്. യാത്രയ്ക്കിടയിൽ ബാഗേജ് നഷ്ടപ്പെടുകയോ വിമാനം വൈകുകയോ ചെയ്താൽ ലഭിക്കുന്ന ഇൻഷുറൻസ് പരിരക്ഷ വലിയൊരു ആശ്വാസമായിരിക്കും. കൂടാതെ, വിദേശ യാത്രകളിൽ കറൻസി എക്സ്ചേഞ്ച് നിരക്കിൽ ഇളവ് നൽകുന്ന കാർഡുകളും തിരഞ്ഞെടുക്കാവുന്നതാണ്.

3. വലിയ ചെലവുകൾ ഇഎംഐ ആക്കി മാറ്റാം 

വിമാന ടിക്കറ്റ്, പാക്കേജ് ടൂറുകൾ തുടങ്ങിയവയ്ക്കുള്ള വലിയ തുകകൾ ഒറ്റയടിക്ക് അടയ്ക്കുന്നത് മാസ ബജറ്റിനെ ബാധിച്ചേക്കാം. ഇത്തരം സന്ദർഭങ്ങളിൽ ഈ തുകകൾ ലളിതമായ പ്രതിമാസ തവണകളായി മാറ്റാൻ മിക്ക ബാങ്കുകളും സൗകര്യം നൽകുന്നുണ്ട്. 'നോ-കോസ്റ്റ് ഇഎംഐ' സൗകര്യം ലഭ്യമാണോ എന്ന് പരിശോധിക്കുന്നത് അധിക പലിശ ഒഴിവാക്കാൻ സഹായിക്കും.

4. പ്രത്യേക ഓഫറുകളും ക്യാഷ്ബാക്കുകളും 

യാത്രാ സീസണുകളിൽ ബാങ്കുകൾ പലപ്പോഴും പ്രമുഖ ട്രാവൽ വെബ്സൈറ്റുകളുമായി ചേർന്ന് വൻതോതിലുള്ള ഡിസ്കൗണ്ടുകളും ക്യാഷ്ബാക്കുകളും നൽകാറുണ്ട്. ഹോട്ടൽ ബുക്കിംഗിനും മറ്റും ഇത്തരം ഓഫറുകൾ ഉപയോഗിക്കുന്നത് വഴി നല്ലൊരു തുക ലാഭിക്കാൻ സാധിക്കും. ബുക്കിംഗ് നടത്തുന്നതിന് മുൻപ് നിലവിലുള്ള കാർഡ് ഓഫറുകൾ പരിശോധിക്കുന്നത് പതിവാക്കുക.

ക്രെഡിറ്റ് കാർഡ് ഉപയോഗിക്കുമ്പോൾ കൃത്യസമയത്ത് തിരിച്ചടയ്ക്കാൻ പ്രത്യേകം ശ്രദ്ധിക്കണം. തിരിച്ചടവ് മുടങ്ങിയാൽ വലിയ പലിശയും സാമ്പത്തിക ബാധ്യതയും ഉണ്ടാകാൻ സാധ്യതയുണ്ട്. അതിനാൽ, നിങ്ങളുടെ വരുമാനത്തിനനുസരിച്ച് മാത്രം ചിലവുകൾ പ്ലാൻ ചെയ്യുക.