എസ്ബിഐ, എച്ച്ഡിഎഫ്സി ബാങ്കിൽ നിക്ഷേപമുണ്ടോ? എഫ്ഡിയാണോ അതോ ബാങ്ക് ഓഹരികളാണോ ബെസ്റ്റ്?

റിസർവ് ബാങ്ക് ഓഫ് ഇന്ത്യ ജൂൺ മാസത്തിലെ പോളിസിയിൽ റിപ്പോ നിരക്ക് 50 ബേസിസ് പോയിന്റ് കുറച്ചതിനെ തുടർന്ന് മിക്ക ബാങ്കുകളും സ്ഥിര നിക്ഷേപം അഥവാ എഫ്ഡി പലിശ നിരക്കുകൾ പുതുക്കിയിട്ടുണ്ട്. എന്നിരുന്നാലും, എസ്ബിഐ, എച്ച്ഡിഎഫ്സി ബാങ്ക് പോലുള്ള ലാർജ് ക്യാപ് ബാങ്കുകളുടെ ഓഹരികൾ എഫ്ഡി നിരക്കുകളേക്കാൾ മികച്ച വരുമാനം നൽകി. വിശദമായി അറിയാം. 

എസ്ബിഐ എഫ്ഡി നിരക്കുകൾ

2025 ജൂൺ 15 മുതൽ പ്രാബല്യത്തിൽ വരുന്ന എസ്ബിഐ ഒരു വർഷം മുതൽ രണ്ട് വർഷത്തിൽ കുറഞ്ഞ കാലയളവുവരെയുള്ള സ്ഥിര നിക്ഷേപങ്ങൾക്ക് 6.25% പലിശ നിരക്കാണ് വാഗ്ദാനം ചെയ്യുന്നത്. രണ്ട് വർഷം മുതൽ മൂന്ന് വർഷത്തിൽ കുറഞ്ഞ കാലയളവിനു 6.45% നിരക്കും, മൂന്ന് വർഷം മുതൽ അഞ്ച് വർഷത്തിൽ കുറഞ്ഞ കാലയളവിനു 6.30% നിരക്കും, അഞ്ച് വർഷം മുതൽ 10 വർഷം വരെയുള്ള കാലയളവിനു 6.05% നിരക്കുമാണ് നൽകുന്നത്. ഈ പലിശ നിരക്കുകൾ പൊതു വിഭാഗത്തിനുള്ളതാണ്. മുതിർന്ന പൗരന്മാരാണെങ്കിൽ ഈ നിരക്കുകൾ 6.75% മുതൽ 7.05% വരെയാണ്.

എസ്ബിഐ കാൽക്കുലേറ്റർ ഉപയോഗിച്ച് ഒരു നിക്ഷേപകൻ ഒരു ലക്ഷം രൂപ അഞ്ച് വർഷത്തെ മെച്യൂരിറ്റി കാലയളവിൽ നിക്ഷേപം നടത്തിയെന്ന് കരുതുക. അഞ്ച് വർഷത്തെ കാലാവധിയിൽ 6% നിരക്കാണ് പ്രതീക്ഷിക്കുന്നതെങ്കിൽ മെച്യൂരിറ്റി കാലാവധിയിൽ ഏകദേശം 34,685 രൂപ പലിശ വരുമാനം ഉൾപ്പെടെ 1,34,685 രൂപയായിരിക്കും അക്കൗണ്ടിൽ ലഭിക്കുക.

എസ്ബിഐ ഓഹരി വില

എസ്ബിഐയുടെ ഓഹരി വിലയിൽ ഏകദേശം 337% വരുമാനം രേഖപ്പെടുത്തിയിട്ടുണ്ട്. 2020 ജൂലൈ 3-ന് 184.70 രൂപയായിരുന്നത് ഇപ്പോൾ എൻഎസ്ഇയിൽ 807 രൂപയായി ഉയർന്നു. എസ്ബിഐ ആണ് ഇന്ത്യയിലെ ഏറ്റവും വലിയ പൊതുമേഖലാ ബാങ്കും മൂന്നാമത്തെ വലിയ ബാങ്കും. ഇതിന്റെ വിപണി മൂല്യം 7.20 ലക്ഷം കോടി രൂപയിൽ കൂടുതലാണ്.

ഉദാഹരണത്തിന്: 2020 ജൂലൈ 3-ന് ഒരു ലക്ഷം രൂപ നിക്ഷേപം നടത്തിയിരുന്നെങ്കിൽ 2025 ജൂലൈ 3 വരെ 336.92% നേട്ടത്തിൽ 4,36,920 രൂപ എസ്ബിഐ ഓഹരികളിൽ നിന്ന് ലഭിക്കുമായിരുന്നു. ഇതിൽ നിന്നുള്ള വരുമാനം 3,36,920 രൂപയാണ്. 

എസ്ബിഐ ഓഹരി വിലയുടെ റേറ്റിംഗ്

ട്രെൻഡ്‌ലിൻ ഡാറ്റ അനുസരിച്ച്, സ്റ്റേറ്റ് ബാങ്ക് ഓഫ് ഇന്ത്യയ്ക്ക് 42 ഓളം അനലിസ്റ്റുകളിൽ നിന്ന് ലഭിച്ചത് 'ബൈ' റേറ്റിംഗാണ്. അതിൽ 28 അനലിസ്റ്റുകൾ 'സ്‌ട്രോങ്ങ് ബൈ' റേറ്റിംഗ് ശുപാർശ ചെയ്യുകയും 6 അനലിസ്റ്റുകൾ 'ബൈ' റേറ്റിംഗ് നിർദ്ദേശിക്കുകയും ചെയ്തു. ശരാശരി ടാർഗെറ്റ് വില 927.94 രൂപയാണ്. ഇത് ഏകദേശം 15% മുന്നേറ്റത്തെ സൂചിപ്പിക്കുന്നു.

2025 സാമ്പത്തിക വർഷത്തിൽ എസ്ബിഐയുടെ നിക്ഷേപം 9.5% വളർച്ച കൈവരിച്ചു. 24% വിപണി വിഹിതം നിലനിർത്തുകയും CASA നിക്ഷേപം വർദ്ധിപ്പിക്കുന്നതിൽ ബാങ്ക് ശ്രദ്ധ കേന്ദ്രീകരിക്കുകയും ചെയ്തുവെന്ന് മോത്തിലാൽ ഒസ്വാൾ പറയുന്നു. 69.7% അനുകൂലമായ ആഭ്യന്തര CD അനുപാതവും 133% LCR ഉം ഉള്ളതിനാൽ ശക്തമായ പിന്തുണയോടെ സുസ്ഥിരമായ വായ്പ വളർച്ചയ്ക്ക് ബാങ്ക് മികച്ച നിലയിലെത്തി. എംസിഎൽആർ പുനഃക്രമീകരണം നടക്കുന്നതിനനുസരിച്ച് നിക്ഷേപങ്ങളുടെ വർദ്ധിച്ച ചിലവ് കുറയുമെന്നും പ്രതീക്ഷിക്കുന്നു.

മോത്തിലാലിൻ്റെ അഭിപ്രായത്തിൽ 2025-27 സാമ്പത്തിക വർഷത്തിൽ നിക്ഷേപങ്ങളിൽ ഏകദേശം 10% CAGR പ്രതീക്ഷിക്കാം. കൂടാതെ റീട്ടെയിൽ നിക്ഷേപം വർദ്ധിപ്പിക്കുന്നതിൽ ബാങ്ക് ശ്രദ്ധ കേന്ദ്രീകരിക്കുന്നു.

"സ്ഥിരമായ ബിസിനസ്സും വരുമാന വളർച്ചയും നിയന്ത്രിത വ്യവസ്ഥകളും കാരണം സമീപ വർഷങ്ങളിൽ എസ്ബിഐ മികച്ച പ്രകടനം കാഴ്ചവച്ചു. NIM സമീപ വർഷങ്ങളിൽ കുറഞ്ഞു. വായ്പ നൽകുന്നതിൽ മിതത്വം പാലിക്കുന്നത് മൂലം ഉണ്ടാകുന്ന ആഘാതം കുറയ്ക്കുന്നതിന് ബാങ്കിന് നിരവധി സാധ്യതകളുണ്ട്. എസ്ബിഐ ആസ്തി ഗുണനിലവാരം മികച്ച നിലയിൽ തുടരുന്നു. അതിനാൽ 2025-27 സാമ്പത്തിക വർഷത്തിൽ ഏകദേശം 6% വരുമാനം നേടാൻ സാധിക്കും.  2027 സാമ്പത്തിക വർഷത്തിൽ RoA/RoE ഏകദേശം 1.0%/15.9% നൽകുമെന്ന് ഞങ്ങൾ കണക്കാക്കുന്നു. അതിനാൽ 925 രൂപ ടാർഗെറ്റ് വിലയിൽ  എസ്ബിഐ ഈ മേഖലയിലെ ഞങ്ങളുടെ ഇഷ്ട ഓഹരിയായി തുടരുന്നു." മോത്തിലാൽ ഒസ്വാൾ അഭിപ്രായപ്പെട്ടു. 

എച്ച്ഡിഎഫ്സി ബാങ്ക് എഫ്ഡി നിരക്കുകൾ

എച്ച്ഡിഎഫ്സി ബാങ്കും 2025 ജൂൺ 25 മുതൽ എഫ്ഡി നിരക്കുകൾ പുതുക്കിയിട്ടുണ്ട്. പൊതു വിഭാഗത്തിൽ, എച്ച്ഡിഎഫ്സി ബാങ്ക് 21 മാസം - 2 വർഷം കാലയളവിൽ 6.60% എന്ന ഏറ്റവും ഉയർന്ന നിരക്ക് വാഗ്ദാനം ചെയ്യുന്നു. 21 മാസം മുതൽ 3 വർഷത്തിൽ കുറഞ്ഞ കാലയളവിനു 6.45% നിരക്കും നൽകുന്നു. 3 വർഷം 1 ദിവസം മുതൽ 5 വർഷത്തിൽ കുറഞ്ഞ കാലയളവിനു 6.40% നിരക്കും 5 വർഷം 1 ദിവസം മുതൽ 10 വർഷം വരെയുള്ള കാലയളവിൽ 6.15% നിരക്കുമാണ് നൽകുന്നത്. മുതിർന്ന പൗരന്മാർക്ക് ഈ നിരക്കുകൾ 7.10% മുതൽ 6.65% വരെയാണ്.

എസ്ബിഐയുടെ അതേ ഉദാഹരണം എച്ച്ഡിഎഫ്സി ബാങ്ക് എഫ്ഡി കാൽക്കുലേറ്റർ ഉപയോഗിച്ച് പരിശോധിക്കാം. 5 വർഷത്തേക്ക് ഒരു ലക്ഷം രൂപയുടെ എഫ്ഡിക്ക് 6.40% ആണ് പലിശ നിരക്ക്. ഇതിൽ 1,37,363 രൂപയായിരിക്കും മെച്യൂരിറ്റി തുക, അതിൽ 37,363 രൂപ പലിശയായി ലഭിക്കും.

എച്ച്ഡിഎഫ്സി ബാങ്ക് ഓഹരി വില

എച്ച്ഡിഎഫ്സി ബാങ്ക് ഓഹരി വിപണി മൂല്യത്തിന്റെ അടിസ്ഥാനത്തിൽ ഇന്ത്യയിലെ ഏറ്റവും വലിയ ബാങ്കാണ്. എൻഎസ്ഇയിൽ 15.21 ലക്ഷം കോടി രൂപയാണ് വിപണി മൂല്യം. 2025 ജൂലൈ 4ന് ഓഹരി ഒന്നിന് 1986.90 രൂപയാണ് വില.  എന്നാൽ 5 വർഷം മുൻപ് 2020 ജൂലൈ 3-ന് ഈ ഓഹരിയുടെ വില 1,073.95 രൂപയായിരുന്നു. 2020 മുതൽ 2025 വരെ എച്ച്ഡിഎഫ്സി ബാങ്ക് 84.92% വരുമാനം നൽകി.

ഉദാഹരണം: 5 വർഷം മുൻപ് ഒരു ലക്ഷം രൂപ നിക്ഷേപം നടത്തിയിരുന്നെങ്കിൽ ഇപ്പോൾ 1,84,920 രൂപയായി ലഭിക്കുമായിരുന്നു. ഇതിൽ 84,920 രൂപയാണ് ലാഭം.

എച്ച്ഡിഎഫ്സി ബാങ്ക് ഓഹരികളുടെ റേറ്റിംഗ്

ട്രെൻഡ്‌ലിൻ അനുസരിച്ച്, എച്ച്ഡിഎഫ്സി ബാങ്കിന് 41 അനലിസ്റ്റുകളിൽ നിന്ന് 'സ്‌ട്രോങ്ങ് ബൈ' റേറ്റിംഗ് ലഭിച്ചിരിക്കുന്നു. അതിൽ 29 അനലിസ്റ്റുകൾ 'സ്‌ട്രോങ്ങ് ബൈ' റേറ്റിംഗ് ചെയ്യുകയും 8 പേർ 'ബൈ' റേറ്റിംഗ് നൽകുകയും ചെയ്തു. ഓഹരി ഒന്നിന് ശരാശരി ടാർഗെറ്റ് വില 2198.85 രൂപയാണ്, ഇത് ഏകദേശം 11% മുന്നേറ്റം സൂചിപ്പിക്കുന്നു.

എച്ച്ഡിഎഫ്സി ബാങ്ക് മികച്ച പലിശ നിരക്ക്, ശക്തമായ മൂലധനം, വലിയ ശൃംഖല, മെച്ചപ്പെടുത്തിയ സാങ്കേതിക ശേഷികൾ എന്നിവ ഉപയോഗിച്ച് വായ്പ വിപുലീകരണം നടത്താൻ സാധ്യതയുണ്ട് എന്നാണ് ജിയോജിത്തിലെ അനലിസ്റ്റുകൾ പറഞ്ഞത്. കൂടാതെ, മികച്ച ആസ്തി ഘടന, കുറഞ്ഞ ഫണ്ടിംഗ് ചെലവ് എന്നിവ മാർജിനുകളെ പിന്തുണയ്ക്കും. NPA അനുപാതം ഭാവിയിൽ കാര്യമായി വർധിക്കാൻ സാധ്യതയില്ല. കാര്യക്ഷമമായ പ്രവർത്തന മാതൃകയും ഉയർന്ന നിലവാരമുള്ള ആസ്തികളും ഉള്ളതിനാൽ ബാങ്ക് സുസ്ഥിരമായ വളർച്ചയ്ക്ക് ഒരുങ്ങുകയാണ്. അതിനാൽ ഒരു ഓഹരിക്ക് 2,192 രൂപയാണ് ലക്ഷ്യ വില.

എഫ്‌ഡികളോ ഓഹരികളോ: ഏതാണ് മികച്ചത്?

പൊതുവായി പറഞ്ഞാൽ, നിങ്ങൾ സുരക്ഷിതത്വത്തിനും സ്ഥിരതയ്ക്കുമാണ് മുൻഗണന നൽകുന്നതെങ്കിൽ എഫ്ഡികൾ ഒരു നല്ല തിരഞ്ഞെടുപ്പാണ്. മറുവശത്ത്, ഉയർന്ന വരുമാനം പ്രതീക്ഷിക്കുകയും ദീർഘകാല നിക്ഷേപം ലക്ഷ്യമിടുകയും ചെയ്യുന്നുണ്ടെങ്കിൽ ഓഹരി വിപണി കൂടുതൽ അനുയോജ്യമാണ്.

റിസ്ക് കുറഞ്ഞ നിക്ഷേപം നടത്താൻ ആഗ്രഹിക്കുന്നവർക്കും, കുറഞ്ഞ കാലയളവിൽ പണം ആവശ്യമുളളവർക്കും എഫ്ഡി കൂടുതൽ ഉചിതമാണ്. എന്നാൽ ഉയർന്ന റിസ്ക് എടുക്കാൻ തയ്യാറുളളവർക്കും ദീർഘകാല നിക്ഷേപം ലക്ഷ്യമിടുന്നവർക്കും ഓഹരി വിപണി തിരഞ്ഞെടുക്കാവുന്നതാണ്.

റിസർവ് ബാങ്ക് ഓഫ് ഇന്ത്യയുടെ റിപ്പോ നിരക്ക് കുറച്ചതിനെ തുടർന്ന് ബാങ്കുകൾ എഫ്ഡി നിരക്കുകൾ പുതുക്കി നിശ്ചയിച്ചെങ്കിലും, എസ്ബിഐ, എച്ച്ഡിഎഫ്സി പോലുള്ള ബാങ്കുകളുടെ ഓഹരികൾ മികച്ച വരുമാനം നൽകി. ഓഹരി വിപണിയിലെ സ്ഥിരതയില്ലാത്ത സാഹചര്യങ്ങൾ കണക്കിലെടുത്ത് നിക്ഷേപം നടത്താൻ ആഗ്രഹിക്കുന്നവർക്ക് എഫ്ഡി പരിഗണിക്കാവുന്നതാണ്.