11,500 രൂപ കയ്യിലുണ്ടോ..? 8.25 ലക്ഷം രൂപ സമ്പാദിക്കാം, ഇതാണ് എസ്ബിഐയുടെ അടിപൊളി പദ്ധതി

നിക്ഷേപത്തിലൂടെ മികച്ച സമ്പാദ്യം കെട്ടിപ്പൊക്കണമെന്ന് എല്ലാവർക്കും ആഗ്രഹമുണ്ടാകും. എന്നാൽ നിക്ഷേപത്തിനായി വലിയ തുക മാറ്റിവയ്ക്കുക എന്നത് പലരുടേയും സാമ്പത്തിക സ്ഥിതി അനുസരിച്ച് ബുദ്ധിമുട്ടാണ്. അത്തരക്കാർക്ക് റിക്കറിംഗ് ഡെപ്പോസിറ്റ് അല്ലെങ്കിൽ ആർ‌ഡി തിരഞ്ഞെടുക്കാൻ സാധിക്കും. ആർഡി വഴി എല്ലാ മാസവും ഒരു നിശ്ചിത തുക നിക്ഷേപിക്കാനും ഉറപ്പായ പലിശ നേടാനും സാധിക്കും. അതുവഴി കാലാവധി പൂർത്തിയാകുമ്പോൾ മികച്ച സമ്പാദ്യം നേടാനും കഴിയും. വരുമാനം കൂടുന്നതിന് അനുസരിച്ച് പ്രതിമാസ നിക്ഷേപങ്ങൾ വർദ്ധിപ്പിക്കാനും കഴിയും.

സ്ഥിരമായ സമ്പാദ്യം പ്രോത്സാഹിപ്പിക്കുന്നതിനായി സ്റ്റേറ്റ് ബാങ്ക് ഓഫ് ഇന്ത്യ (എസ്‌ബി‌ഐ) ഹർ ഗര്‍ ലഖ്പതി ആർ‌ഡി പദ്ധതി ആരംഭിച്ചു. ആശയം ലളിതമാണ്. നിങ്ങൾ എല്ലാ മാസവും ഒരു നിശ്ചിത തുക നിക്ഷേപിക്കുകയും തിരഞ്ഞെടുത്ത കാലയളവിന്‍റെ അവസാനം നിങ്ങൾക്ക് ഒരു ലക്ഷം രൂപയോ അതിന്‍റെ ഗുണിതങ്ങളോ ലഭിക്കുകയും ചെയ്യും. പദ്ധതിയുടെ കൂടുതൽ വിശദാംശങ്ങൾ നമുക്ക് പരിശോധിക്കാം. ഒപ്പം 8.25 ലക്ഷം രൂപ സമ്പാദിക്കാൻ എങ്ങനെ നിക്ഷേപം ക്രമീകരിക്കണമെന്നും നോക്കാം.

അക്കൗണ്ട് തുറക്കാം

എല്ലാ ഇന്ത്യക്കാർക്കും ഹർ ഗര്‍ ലഖ്പതി ആർ‌ഡി പദ്ധതിയിൽ അക്കൗണ്ട് തുറക്കാൻ അർഹതയുണ്ട്. ഇത് വ്യക്തിഗതമായോ സംയുക്തമായോ തുറക്കാം. ഒപ്പിടാൻ കഴിയുന്ന 10 വയസ്സിന് മുകളിലുള്ള പ്രായപൂർത്തിയാകാത്തവർക്കും സ്വന്തം പേരിൽ അക്കൗണ്ട് തുറക്കാൻ അനുവാദമുണ്ട്. അല്ലെങ്കിൽ, മാതാപിതാക്കൾക്കോ ​​രക്ഷിതാക്കൾക്കോ ​​അവരുടെ പേരിൽ ഇത് തുടങ്ങാം.

പലിശ നിരക്ക്

സാധാരണ പൗരന്മാർക്ക് മൂന്ന്, നാല് വർഷത്തേക്ക് 6.55 ശതമാനവും അഞ്ച് മുതൽ പത്ത് വർഷം വരെ 6.30 ശതമാനവുമാണ് ഹർ ഗര്‍ ലഖ്പതി ആർ‌ഡി പലിശ നിരക്ക് വാഗ്ധാനം ചെയ്യുന്നത്. അതേസമയം മുതിർന്ന പൗരന്മാർക്ക് ഉയർന്ന നിരക്കുകൾ ലഭിക്കും. മൂന്ന്, നാല് വർഷത്തേക്ക് 7.05 ശതമാനവും അഞ്ച് മുതൽ പത്ത് വർഷം വരെ 6.80 ശതമാനവുമാണ് പലിശ നിരക്ക്.

8.25 ലക്ഷം രൂപ സമ്പാദിക്കാം

നിങ്ങളുടെ ലക്ഷ്യം 8.25 ലക്ഷം രൂപ സമ്പാദിക്കുക എന്നതാണെങ്കിൽ പ്രതിമാസം എത്ര നിക്ഷേപിക്കണമെന്ന് പരിശോധിക്കാം.

സാധാരണ പൗരന്മാർക്ക്

3 വർഷത്തേക്ക് പ്രതിമാസം 20,699.76 രൂപ നിക്ഷേപിക്കണം.

4 വർഷത്തേക്ക് പ്രതിമാസം 15,010.13 രൂപ നിക്ഷേപിക്കണം.

5 വർഷത്തേക്ക് പ്രതിമാസം 11,682.55 രൂപ നിക്ഷേപിക്കണം.

മുതിർന്ന പൗരന്മാർക്ക്

3 വർഷത്തേക്ക് പ്രതിമാസം 20,538.36 രൂപ നിക്ഷേപിക്കണം.

4 വർഷത്തേക്ക് പ്രതിമാസം 14,853.66 രൂപനിക്ഷേപിക്കണം.

5 വർഷത്തേക്ക് പ്രതിമാസം 11,529.72 രൂപ നിക്ഷേപിക്കണം.

5.25 ലക്ഷം സമ്പാദിക്കാം

3 വർഷം കൊണ്ട് 5.25 ലക്ഷം രൂപ സമ്പാദിക്കുക എന്നതാണ് നിങ്ങളുടെ നിക്ഷേപ ലക്ഷ്യമെങ്കിൽ പ്രതിമാസം ഏകദേശം 13,186.50 രൂപ നിക്ഷേപിക്കണം. 6.55 ശതമാനം പലിശ നിരക്കിൽ കാലാവധി പൂർത്തിയാകുമ്പോൾ നിങ്ങൾക്ക് 2,25,555 രൂപ നേടാം. അതേസമയം പ്രതിമാസം 9,562 രൂപ നിക്ഷേപിച്ചാൽ 4 വർഷം കൊണ്ട് നിങ്ങൾക്ക് 5.25 ലക്ഷം രൂപ സമ്പാദിക്കാം. 5 വർഷം കൊണ്ടാണ് നിങ്ങൾ 5.25 ലക്ഷം രൂപ സമ്പാദിക്കാൻ ഉദ്ദേശിക്കുന്നതെങ്കിൽ പ്രതിമാസം 7,442 രൂപ നിക്ഷേപിച്ചാൽ മതി.