സ്ഥിര നിക്ഷേപമാണോ? ഉയർന്ന പലിശ മുഖ്യം... ഈ ബാങ്കുകളിൽ നിക്ഷേപിക്കൂ

രാജ്യത്ത് തന്നെ ഏറ്റവും ജനപ്രിയ നിക്ഷേപങ്ങളിൽ ഒന്നാണ് സ്ഥിര നിക്ഷേപം അഥവാ ഫിക്സഡ് ഡിപ്പോസിറ്റുകൾ. വിപണി സാഹചര്യങ്ങൾ കൈകാര്യം ചെയ്യാൻ കഴിയാത്ത വ്യക്തികളെ സംബന്ധിച്ച് സ്ഥിരമായ വരുമാനം നേടാനുള്ള ആകർഷമായ നിക്ഷേപമാർഗമാണ് സ്ഥിര നിക്ഷേപങ്ങൾ. ഉയർന്ന പലിശനിരക്കും, നിക്ഷേപിക്കുന്ന പണത്തിന്‍റെ സുരക്ഷയും തന്നെയാണ് സ്ഥിര നിക്ഷേപത്തിലേക്ക് നിക്ഷേപകരെ ആകർഷിക്കുന്ന പ്രധാന ഘടകം. 7 ദിവസം മുതൽ 10 വർഷം വരെ കാലാവധിയുള്ള വ്യത്യസ്ഥ സ്ഥിര നിക്ഷേപ പദ്ധതികളുണ്ട്.

പണം എത്രത്തോളം നിക്ഷേപിക്കുന്നു എന്നതിനെ ആശ്രയിച്ച് പല ബാങ്കുകളും 3 മുതൽ 7 ശതമാനം വരെ പലിശ നിരക്കുകൾ വാഗ്ദാനം ചെയ്യുന്നു. മുതിർന്ന പൗരന്മാർക്കും 0.5 ശതമാനം അധിക പലിശ നിരക്ക് ലഭിക്കും. അതുകൊണ്ടുതന്നെ ഏതെങ്കിലും നിക്ഷേപം നടത്തുന്നതിന് മുമ്പ്, വിവിധ ബാങ്കുകളുടെ എഫ്ഡി നിരക്കുകൾ താരതമ്യം ചെയ്യേണ്ടത് ആവശ്യമാണ്. 2 കോടി രൂപയിൽ താഴെയുള്ള നിക്ഷേപങ്ങൾക്ക് പ്രധാനപ്പെട്ട ബാങ്കുകൾ നൽകുന്ന പലിശ നിരക്കുകൾ പരിശോധിക്കാം.

സ്റ്റേറ്റ് ബാങ്ക് ഓഫ് ഇന്ത്യ

ഇന്ത്യയിലെ ഏറ്റവും വലിയ വാണിജ്യ ബാങ്കും പൊതുമേഖല സ്ഥാപനവുമായ സ്റ്റേറ്റ് ബാങ്ക് ഓഫ് ഇന്ത്യ സ്ഥിര നിക്ഷേപങ്ങൾക്ക് മികച്ച പലിശയാണ് വാഗ്ദാനം ചെയ്യുന്നത്. ഇവയിൽ വിവിധങ്ങളായ ആനുകൂല്യങ്ങളും നേട്ടങ്ങളും ഉൾപ്പെടുത്തിയിട്ടുണ്ട്.

സ്റ്റേറ്റ് ബാങ്ക് ഓഫ് ഇന്ത്യയിൽ ഫിക്സഡ് ഡിപ്പോസിറ്റുകളിൽ (എഫ്ഡി) നിക്ഷേപിക്കുന്ന സാധാരണ ഉപഭോക്താക്കൾക്ക് 3 ശതമാനം മുതൽ 6.10 ശതമാനം വരെ പലിശനിരക്ക് ലഭിക്കും. മുതിർന്ന പൗരന്മാർക്ക് അധികമായി 50 ബേസിസ് പോയിന്റുകൾ (ബിപിഎസ്) ലഭിക്കും. ഒരു വർഷത്തിനുള്ളിൽ കാലാവധി പൂർത്തിയാകുന്ന നിക്ഷേപ പദ്ധതിക്ക് 6.80 ശതമാനം പലിശ ലഭിക്കും. കൂടാതെ, രണ്ട് വർഷം മുതൽ മൂന്ന് വർഷത്തിൽ താഴെ വരെയുള്ള നിക്ഷേപ പദ്ധതിക്ക് 7 ശതമാനം പലിശ നിരക്ക് വാഗ്ദാനം ചെയ്യുന്നു.

ഐസിഐസിഐ ബാങ്ക്

3 ശതമാനം മുതൽ 7 ശതമാനം വരെയാണ് 2 കോടി രൂപ വരെയുള്ള നിക്ഷേപങ്ങൾക്ക് ഐസിഐസിഐ ബാങ്ക് നൽകുന്ന പലിശ നിരക്ക്. മുതിർന്ന പൗരന്മാർക്ക് 0.5 ശതമാനം അധിക പലിശ ലഭിക്കും. അതായത് 7 ദിവസം മുതൽ 10 വർഷം വരെ കാലാവധിയുള്ള വിവിധ സ്ഥിരനിക്ഷേപ പദ്ധതികളിൽ മുതിർന്ന പൗരന്മാർക്ക് 3.50 ശതമാനം മുതൽ 7.65 ശതമാനം വരെ പലിശ നേടാം. ഒരു വർഷത്തിനുള്ളിൽ കാലാവധി പൂർത്തിയാകുന്ന സ്ഥിര നിക്ഷേപങ്ങൾക്ക്, സാധാരണ ഉപഭോക്താക്കൾക്ക് 6.70 ശതമാനം പലിശ നിരക്കാണ് ഐസിഐസിഐ ബാങ്ക് നൽകുന്നത്.

പഞ്ചാബ് നാഷണൽ ബാങ്ക്

2 കോടി രൂപയിൽ താഴെയുള്ള സ്ഥിര നിക്ഷേപങ്ങൾക്ക് 3.50 ശതമാനം മുതൽ 7.50 ശതമാനം പലിശ നിരക്കുകൾ പഞ്ചാബ് നാഷണൽ ബാങ്ക് നൽകുന്നു. ഒരു വർഷത്തിനുള്ളിൽ കാലാവധി പൂർത്തിയാകുന്ന സ്ഥിര നിക്ഷേപങ്ങൾക്ക്, സാധാരണ നിക്ഷേപകർക്ക് 6.75 ശതമാനമാണ് പലിശ നിരക്ക്, അതേസമയം മുതിർന്ന പൗരന്മാർക്ക് ഒരു വർഷത്തെ പ്ലാനിൽ 7.25 ശതമാനം ഉയർന്ന നിരക്ക് ലഭിക്കും.

എച്ച്ഡിഎഫ്സി ബാങ്ക്

ഒരു വർഷത്തെ കാലാവധിയുള്ള സ്ഥിര നിക്ഷേപങ്ങൾക്ക് ആകർഷകമായ പലിശ നിരക്ക് എച്ച്ഡിഎഫ്സി ബാങ്ക് വാഗ്ദാനം ചെയ്യുന്നുണ്ട്. 1 വർഷം വരെ കാലാവധിയുള്ള നിക്ഷേപങ്ങൾക്ക് സാധാരണ പൗരന്മാർക്ക് 6.60 ശതമാനമാണ് പലിശ നിരക്ക് ലഭിക്കുക. അതേസമയം മുതിർന്ന പൗരന്മാരാണെങ്കിൽ 7.10 ശതമാനം പലിശ ലഭിക്കും. മെച്യൂരിറ്റി കാലയളവിനെ ആശ്രയിച്ച് എച്ച്‌ഡിഎഫ്‌സി ബാങ്ക് സാധാരണ ഉപഭോക്താക്കൾക്ക് 3 ശതമാനം മുതൽ 7.75 ശതമാനം വരെ പലിശനിരക്ക് വാഗ്ദാനം ചെയ്യുന്നു.