സ്ഥിര നിക്ഷേപത്തിലൂടെ മികച്ച വരുമാനം, പലിശയായി മാത്രം 44,690 രൂപ നേടാം, ഇവിടെ നിക്ഷേപിക്കൂ...

പണം നിക്ഷേപിക്കാനുള്ള ഒരു ലളിതമായ മാർഗമാണ് സ്ഥിര നിക്ഷേപം അഥവാ ഫിക്സഡ് ഡെപ്പോസിറ്റ്. നിങ്ങൾ ഒരു വലിയ തുക നിക്ഷേപിക്കുന്നു, അത് കാലക്രമേണ ഒരു നിശ്ചിത പലിശ നിരക്കിനൊപ്പം വളരുന്നു. ഓഹരി വിപണിയിലെ ചാഞ്ചാട്ടത്തിൽ പോലും പലിശ നിരക്ക് മാറില്ല. അതായത് സ്ഥിര നിക്ഷേപത്തിന്‍റെ പലിശ നിരക്കുകൾ ഓഹരി വിപണിയുമായി ബന്ധമില്ലാത്ത നിക്ഷേപമായതിനാൽ വിപണിയിലെ ഏറ്റക്കുറച്ചിലുകൾ ഇവയെ ബാധിക്കില്ല. രാജ്യത്തെ എല്ലാ ബാങ്കുകളും ഉറപ്പായ പലിശയിൽ സ്ഥിര നിക്ഷേപം വാഗ്ധാനം ചെയ്യുന്നുണ്ട്.

സ്റ്റേറ്റ് ബാങ്ക് ഓഫ് ഇന്ത്യ വാഗ്ധാനം ചെയ്യുന്ന അമൃത് വൃഷ്ടി, ബാങ്ക് ഓഫ് ബറോഡയുടെ ബോബ് സ്ക്വയർ ഡ്രൈവ് ഡെപ്പോസിറ്റ് എന്നീ സ്ഥിര നിക്ഷേപങ്ങളുടെ കാലാവധിയും പലിശ നിരക്കും നമുക്ക് പരിശോധിക്കാം. ഒപ്പം 5 ലക്ഷം രൂപ നിക്ഷേപിച്ചാൽ കാലാവധി പൂർത്തിയാകുമ്പോൾ എത്ര രൂപ ലഭിക്കുമെന്നും കണക്ക് കൂട്ടാം.

എസ്ബിഐ അമൃത് വൃഷ്ടി

സ്റ്റേറ്റ് ബാങ്ക് ഓഫ് ഇന്ത്യ അമൃത് വൃഷ്ടി പദ്ധതി 444 ദിവസത്തെ കാലാവധിയുള്ള സ്ഥിര നിക്ഷേപ പദ്ധതിയാണ്. ഇത് കുറഞ്ഞ കാലയളവിലേക്ക് ആകർഷകമായ പലിശ നിരക്കുകൾ വാഗ്ദാനം ചെയ്യുന്നു. കുറഞ്ഞത് 1000 രൂപയും പരമാവധി 3 കോടി രൂപയും നിക്ഷേപിച്ച് പദ്ധതിയുടെ ഭാഗമാകാം. സാധാരണ പൗരന്മാർക്ക് പ്രതിവർഷം 6.60 ശതമാനമാണ് പലിശ നിരക്ക്. അതേസമയം മുതിർന്ന പൗരന്മാർക്ക് നിക്ഷേപത്തിന് വാർഷികമായി 7.10 ശതമാവം പലിശ നേടാം.

ബാങ്ക് ഓഫ് ബറോഡ

ബാങ്ക് ഓഫ് ബറോഡയുടെ 444 ദിവസത്തെ കാലാവധിയുള്ള സ്ഥിര നിക്ഷേപ പദ്ധതിയാണ് ബോബ് സ്ക്വയർ ഡ്രൈവ് ഡെപ്പോസിറ്റ് സ്കീം. ഇത് റീട്ടെയിൽ നിക്ഷേപകർക്ക് മത്സരാധിഷ്ഠിത വരുമാനം നൽകുന്നു. 3 കോടി രൂപയിൽ താഴെയുള്ള തുക നിക്ഷേപിക്കാം. സാധാരണ പൗരന്മാർക്ക് പ്രതിവർഷം 6.60 ശതമാനമാണ് പലിശ നിരക്ക്. എന്നാൽ മുതിർന്ന പൗരന്മാർക്ക് പ്രതിവർഷം 7.10 ശതമാനം പലിശ നേടാം.

5 ലക്ഷം രൂപയുടെ നിക്ഷേപം

സ്റ്റേറ്റ് ബാങ്ക് ഓഫ് ഇന്ത്യ, ബാങ്ക് ഓഫ് ബറോഡ എന്നീ രണ്ട് ബാങ്കുകളിലെയും 444 ദിവസത്തെ എഫ്ഡിയുടെ പലിശ നിരക്ക് ഒന്നുതന്നെയാണ്. അതിനാൽ, സാധാരണ പൗരന്മാർക്ക് 444 ദിവസത്തെ സ്ഥിര നിക്ഷേപത്തിൽ കണക്കാക്കിയ മെച്യൂരിറ്റി തുക 5,41,443 രൂപയായിരിക്കും. അതായത് പലിശയായി 41,443 രൂപ നേടാം. അതേസമയം മുതിർന്ന പൗരന്മാർക്ക് 444 ദിവസത്തെ സ്ഥിര നിക്ഷേപത്തിൽ കണക്കാക്കിയ മെച്യൂരിറ്റി തുക 5,44,690 രൂപയായിരിക്കും. പലിശയായി നേടാൻ സാധിക്കുക 44,690 രൂപയായിരിക്കും.

മറ്റ് ബാങ്കുകളുടെ പലിശ

ഐഡിബിഐ ബാങ്ക്: ഐഡിബിഐ ബാങ്ക് 444 ദിവസത്തെ സ്‌പെഷ്യൽ എഫ്‌ഡിയിൽ സാധാരണ പൗരന്മാർക്കും/എൻ‌ആർ‌ഇ/എൻ‌ആർ‌ഒകൾക്കും 6.70% പലിശ നിരക്ക് വാഗ്ദാനം ചെയ്യുന്നു. മുതിർന്ന പൗരന്മാർക്ക് 7.20% ഉയർന്ന നിരക്ക് ലഭിക്കുന്നു.

ഇന്ത്യൻ ബാങ്ക്: ഇന്ത്യൻ ബാങ്ക് 444 ദിവസത്തെ പ്രത്യേക സ്ഥിര നിക്ഷേപ പദ്ധതിയിൽ (ഇൻഡ് സെക്യൂർ) സാധാരണ പൗരന്മാർക്ക് 6.70% പലിശ നിരക്ക് വാഗ്ദാനം ചെയ്യുന്നു. ഇതേ സ്കീമിൽ മുതിർന്ന പൗരന്മാർക്കുള്ള പലിശ നിരക്ക് 7.20% ആണ്. അതേസമയം സൂപ്പർ സീനിയർ പൗരന്മാർക്ക് 7.45% നിരക്കാണ് ലഭിക്കുന്നത്.