എല്ലാ മാസവും 20,500 രൂപ കിട്ടും; 60 വയസ്സിനു ശേഷം വെറും 5 വർഷം കൊണ്ട് ലക്ഷങ്ങൾ സമ്പാദിക്കാം

മുതിർന്ന പൗരൻമാരുടെ സാമ്പത്തിക സുരക്ഷ ഏറെ പ്രധാനമാണ്. അതിനു വേണ്ടി നേരത്തെ തന്നെ പ്ലാൻ ചെയ്യണം. നിലവിൽ മുതിർന്ന പൗരൻമാർക്കായി നിരവധി സ്കീമുകൾ ഉണ്ട്. അവയെല്ലാം ഉയർന്ന പലിശ നിരക്കും വാ​ഗ്ദാനം ചെയ്യുന്നു. അത്തരത്തിൽ കുറഞ്ഞ കാലം കൊണ്ട് വലിയ നേട്ടം ലഭിക്കുന്ന പോസ്റ്റ് ഓഫീസ് സ്കീമാണ് സീനിയർ സിറ്റിസൺസ് സേവിംഗ്സ് സ്കീം (SCSS). ഇതിലൂടെ ഉറപ്പുള്ള റിട്ടേൺ ലഭിക്കും.

5 വർഷത്തെ കാലാവധിയുള്ള ഈ സ്കീം 60 വയസ്സും അതിനു മുകളിലുമുള്ള മുതിർന്ന പൗരൻമാർക്ക് വേണ്ടിയാണ്. റിട്ടയർമെന്റ് സമയത്ത് നിങ്ങൾക്ക് വലിയൊരു തുക ലഭിച്ചേക്കാം. ആ തുക സീനിയർ സിറ്റിസൺ സ്കീമിൽ നിക്ഷേപിച്ചാൽ അത് വളരും. 5 വർഷം കൊണ്ട് നിക്ഷേപിക്കുന്നതിനും അധികം സമ്പാദിക്കാനും സാധിക്കും.

പ്രായമാവുമ്പോൾ നിരവധി സാമ്പത്തിക ചിലവുകൾ വന്നേക്കാം. ചികിത്സാ ചിലവുകൾക്ക് പുറമേ റിട്ടയർമെന്റ് കാലം ജീവിതം ആസ്വദിക്കാനുള്ള സമയവുമാണ്. 60 വയസ്സ് വരെയുള്ള നിങ്ങളുടെ നിക്ഷേപം 5 വർഷം കൊണ്ട് ഉയരാൻ ആ​ഗ്രഹിക്കുന്നുണ്ടെങ്കിൽ ഈ സ്കീം മികച്ച ഓപ്ഷനാണ്. മറ്റും നിക്ഷേപങ്ങളെ അപേക്ഷിച്ച് അപകട രഹിതമായ സ്കീമാണിത്.

പലിശ നിരക്കും നിക്ഷേപവും

സീനിയർ സിറ്റിസൺ സേവിം​ഗ്സ് സ്കീമിന്റെ നിലവിലെ പലിശ നിരക്ക് 8.2 ശതമാനമാണ്. ഇതിലൂടെ മുതിർന്ന പൗരൻമാർക്ക് ഒരു സ്ഥിര വരുമാനവും ലഭിക്കുന്നു. നിക്ഷേപത്തിനൊപ്പം വരുമാനവും നിങ്ങൾക്ക് ഉറപ്പാക്കാം. നിങ്ങൾക്ക് ലഭിക്കുന്ന പലിശ പ്രതിമാസ, ത്രൈമാസ, വാർഷിക വരുമാനമായി കണക്കാക്കാം.

5 വർഷത്തേക്കാണ് ഈ സ്കീമിൽ നിക്ഷേപിക്കാനുള്ള കാലാവധി. എന്നാൽ നിങ്ങൾക്ക് 3 വർഷത്തേയ്ക്ക് കൂടെ ഈ കാലാവധി നീട്ടാൻ സാധിക്കും. പരമാവധി 30 ലക്ഷം വരെ നിങ്ങൾക്ക് നിക്ഷേപിക്കാം. സെക്ഷൻ 80 സി പ്രകാരം ഈ സ്കീമിന് നികുതി ഒഴിവാക്കിയിരിക്കുന്നു. എന്നിരുന്നാലും, പലിശ വരുമാനമായി കണക്കാക്കുന്നതിനാൽ നികുതി വന്നേക്കാം. അതായത് വാർഷിക റിട്ടേൺ 50,000 രൂപ കവിയുന്നുവെങ്കിൽ ടി.ഡി.എസ് ബാധകമാവും.

നിങ്ങളുടെ നിക്ഷേപത്തിലൂടെ എത്ര രൂപ സമ്പാദിക്കാമെന്ന് നോക്കാം..... 5 ലക്ഷം, 15 ലക്ഷം, 30 ലക്ഷം എന്നിങ്ങനെ നിക്ഷേപിച്ചാൽ കാലാവധി പൂർത്തിയാവുമ്പോൾ എത്ര നേടാം..?

 

• 5 ലക്ഷം നിക്ഷേപിച്ചാൽ....

5 വർഷത്തേക്ക് 5 ലക്ഷം നിക്ഷേപിച്ചാൽ 8.2% പലിശ കണക്കാക്കിയാൽ എല്ലാ മാസവും 3,416 രൂപ ലഭിക്കും. ത്രൈമാസ വരുമാനം കണക്കാക്കിയാൽ 10,250 രൂപ ലഭിക്കും. വാർഷിക വരുമാനം 41,000 ലഭിക്കും. അതായത് 5 വർഷത്തേക്ക് നിങ്ങളുടെ മൊത്തം പലിശ തുക 2,05,000 രൂപയായിരിക്കും. കാലാവധി പൂർത്തിയാവുമ്പോൾ നിങ്ങളുടെ മൊത്തം തുക 7,05,000 രൂപയാവും.

• 15 ലക്ഷം നിക്ഷേപിച്ചാൽ

5 വർഷത്തേക്ക് 15 ലക്ഷം നിക്ഷേപിച്ചാൽ നിലവിലെ പലിശ അനുസരിച്ച് നിങ്ങൾക്ക് എല്ലാ മാസവും 10,250 രൂപ വരുമാനം ഉറപ്പാക്കാം. ത്രൈമാസ വരുമാനം കണക്കാക്കുന്നവർക്ക് 30,750 രൂപ കിട്ടും. വാർഷിക വരുമാനം ആ​ഗ്രഹിക്കുന്നവർക്ക് 1,23,000 രൂപ ലഭിക്കും. അതായത് 15 ലക്ഷം നിക്ഷേപിച്ചാൽ 5 വർഷം കൊണ്ട് പലിശ മാത്രം 1,23,000 രൂപ ലഭിക്കും. കാലാവധി പൂർത്തിയാവുമ്പോൾ നിങ്ങൾക്ക് ലഭിക്കുന്ന മൊത്തം തുക 21,15,000 രൂപയാവും.

• 30 ലക്ഷം നിക്ഷേപിച്ചാൽ....

30 ലക്ഷം 5 വർഷത്തേക്ക് നിക്ഷേപിച്ചാൽ 8.2% പലിശ നിരക്കിൽ എല്ലാ മാസവും 20,500 രൂപ വരുമാനം ലഭിക്കും. എന്നാൽ ത്രൈമാസ വരുമാനം ആ​ഗ്രഹിക്കുന്നവർക്ക് 61,500 രൂപ ലഭിക്കും. വാർഷിക വരുമാനം ആ​ഗ്രഹിക്കുന്നവർക്ക് ഓരോ വർഷവും 246,000 രൂപ നേടാം. അതായത് ഈ 5 വർഷം കൊണ്ട് പലിശ മാത്രം 12,30,000 ഉറപ്പാക്കാം. എങ്കിൽ ഈ സ്കീമിന്റെ കാലാവധി പൂർത്തിയാവുമ്പോൾ നിങ്ങൾക്ക് മൊത്തം 42,30,000 രൂപ ലഭിക്കും.