ആശങ്കയില്ലാതെ റിട്ടയർമെന്റ് കാലം ആസ്വദിക്കാം; പ്രതിമാസ പെൻഷൻ നൽകുന്ന 5 നിക്ഷേപ പദ്ധതികൾ

റിട്ടയർമെന്റിന് ശേഷവും പ്രതിമാസ വരുമാനം ലഭിക്കാൻ ആഗ്രഹിക്കുന്നവരാണ് നിലവിൽ കൂടുതൽ ആളുകളും. അതുവഴി തുടർന്നും സാമ്പത്തിക സ്വതന്ത്ര്യം ആസ്വദിക്കാൻ അവർ താൽപര്യം കാണിക്കുന്നു. ആ വരുമാനം ലഭിക്കുന്ന നിരവധി നിക്ഷേപ പദ്ധതികൾ ഇന്ന് വിപണിയിൽ ലഭ്യമാണ്. ഇതിൽ തന്നെ, ഉയർന്ന പലിശയും ഉറപ്പായ റിട്ടേൺസും ലഭിക്കുന്ന പദ്ധതികളിൽ നിക്ഷേപം നടത്തുകയാണ് തിരഞ്ഞെടുക്കാൻ സാധിക്കുന്ന പ്രധാന മാർഗം. ചെറിയ നിക്ഷേപങ്ങളിലൂടെ പ്രതിമാസ വരുമാനം നേടാൻ കഴിയും. ഇത്തരത്തിലുള്ള പല നിക്ഷേപങ്ങളിലും ആദായ നികുതി ഇളവുകളും ലഭ്യമാണ്. അത്തരം 5 പ്രതിമാസ പെൻഷൻ പദ്ധതികളെക്കുറിച്ചാണ് ഈ ലേഖനത്തിൽ പരാമർശിക്കുന്നത്.

സീനിയർ സിറ്റിസൺ സേവിംഗ്സ് സ്കീം: പോസ്റ്റ് ഓഫീസ് വഴി മുതിർന്ന പൗരന്മാർക്ക് അവരുടെ തന്നെ നിക്ഷേപത്തിൽ നിന്ന് വരുമാനം ഉറപ്പാക്കുന്ന പദ്ധതിയാണ് ഇത്. പ്രതിവർഷം 8.20 ശതമാനം പലിശ നിരക്കാണ് നിക്ഷേപകർക്ക് വാഗ്ദാനം ചെയ്യുന്നത്. ഒരാൾക്ക് 1000 രൂപയുടെ ഗുണിതങ്ങളിൽ ഒറ്റത്തവണ മിനിമം നിക്ഷേപം നടത്താം. ഇത്തരത്തിൽ 30 ലക്ഷം രൂപയാണ് പരമാവധി നിക്ഷേപ പരിധി. ഒരാൾക്ക് അഞ്ച് വർഷത്തേക്ക് പലിശയിനത്തിൽ വരുമാനം ലഭിക്കും.

സ്‌കീമിലെ ലോക്ക്-ഇൻ കാലയളവ് 5 വർഷമാണ്, നിക്ഷേപങ്ങൾക്ക് ആദായ നികുതി നിയമത്തിലെ സെക്ഷൻ 80 സി പ്രകാരം 1.50 ലക്ഷം രൂപ വരെ നികുതി ഇളവിന് അർഹതയുണ്ട്.

അടൽ പെൻഷൻ യോജന: മുതിർന്ന പൗരന്മാരുടെ പ്രതിമാസ വരുമാനം ഉറപ്പാക്കുന്ന പദ്ധയിയിൽ 18 നും 40 നും ഇടയിൽ പ്രായമുള്ള പൗരന്മാർക്ക് ചേരാം. 60 വയസിന് ശേഷം 1,000 മുതൽ 5,000 രൂപ വരെ പ്രതിമാസ വരുമാനം ഈ പദ്ധതി നൽകുന്നു. ഒരാൾക്ക് ലഭിക്കുന്ന പ്രതിമാസ വരുമാനം നിക്ഷേപത്തെ ആശ്രയിച്ചിരിക്കുന്നു.

പോസ്റ്റ് ഓഫീസ് മന്ത്ലി ഇൻകം സ്കീം: പോസ്റ്റ് ഓഫീസ് പ്രതിമാസ പെൻഷൻ പദ്ധതിയാണിത്, ഒരാൾ ഒറ്റത്തവണ നിക്ഷേപിക്കുകയും അഞ്ച് വർഷത്തേക്ക് പെൻഷൻ നേടുകയും ചെയ്യുന്നു. അഞ്ച് വർഷത്തിന് ശേഷം, നിക്ഷേപിച്ച തുക തിരികെ ലഭിക്കും. പദ്ധതിയിൽ നിക്ഷേപകർക്ക് 7.4 ശതമാനം പലിശ വാഗ്ദാനം ചെയ്യുന്നു. ഒരു വ്യക്തിക്ക് പരമാവധി 9 ലക്ഷം രൂപയും ദമ്പതികൾക്ക് പരമാവധി 15 ലക്ഷം രൂപയും നിക്ഷേപിക്കാം.

മ്യൂച്വൽ ഫണ്ടിലെ എസ് ഡബ്ല്യൂ പി: മ്യൂച്വൽ ഫണ്ടുകളും സിസ്റ്റമാറ്റിക് പിൻവലിക്കൽ പ്ലാൻ (SWP) വഴി പ്രതിമാസ വരുമാനം വാഗ്ദാനം ചെയ്യുന്നു. ഒരു മ്യൂച്വൽ ഫണ്ടിൽ ഒരാൾ ഒറ്റത്തവണ നിക്ഷേപം നടത്തുകയും ഫണ്ട് നിങ്ങൾക്ക് ഒരു നിശ്ചിത പ്രതിമാസ പെൻഷൻ വാഗ്ദാനം ചെയ്യുകയും ചെയ്യുന്നു. അതേസമയം നിങ്ങളുടെ ഫണ്ടുകൾ മോശമായാൽ അവ കുറയാനിടയുണ്ട്. മാർക്കറ്റ് സാധ്യതകൾ അടിസ്ഥാനപ്പെടുത്തി വേണം ഇവിടെ നിക്ഷേപിക്കാൻ.

സ്ഥിര നിക്ഷേപം: പോസ്റ്റോഫീസും ബാങ്കുകളും വ്യത്യസ്ത കാലയളവുകളിൽ സ്ഥിരനിക്ഷേപം (എഫ്ഡി) വാഗ്ദാനം ചെയ്യുന്നു. അതോടൊപ്പം, മുതിർന്ന പൗരന്മാർക്ക് നൽകുന്ന പലിശ നിരക്ക് സാധാരണ പൗരന്മാരേക്കാൾ 25 ബേസിസ് പോയിറ് കൂടുതലാണ്. അഞ്ച് വർഷത്തെ എഫ്ഡി സെക്ഷൻ 80 സി പ്രകാരം നികുതി ഇളവുകളും നൽകുന്നു.