5 വർഷത്തിനുള്ളിൽ പലിശയായി മാത്രം 12,30,000 രൂപ നേടാം; പോസ്റ്റ് ഓഫീസിന്റെ കിടിലൻ സ്കീം

റിട്ടയർമെന്റിനുശേഷം വയോജനങ്ങൾക്ക് സ്ഥിരമായ വരുമാന മാർഗങ്ങളൊന്നും ഉണ്ടാവില്ല. എന്നാൽ, അവരുടെ റിട്ടയർമെന്റ് ഫണ്ട് ഉപയോഗിച്ച് സ്ഥിര വരുമാനം നേടാവുന്നതാണ്. അതായത് റിട്ടയർമെന്റ് ഫണ്ട് വിവിധ സ്കീമുകളിൽ നിക്ഷേപിച്ച് സാമ്പത്തിക നേട്ടം കൈവരിക്കാവുന്നതാണ്. നിക്ഷേപത്തിന്റെ കാര്യത്തിൽ ഒരു തരത്തിലുള്ള റിസ്‌കും എടുക്കാൻ മുതിർന്നവരിൽ ഭൂരിഭാഗവും ഇഷ്ടപ്പെടുന്നില്ല. ഉറപ്പുള്ള റിട്ടേൺ ലഭിക്കാവുന്ന സ്കീമുകളിൽ നിക്ഷേപിക്കാൻ അവർ ഇഷ്ടപ്പെടുന്നു.

ഇത്തരത്തിലുള്ളവർക്കായി പോസ്റ്റ് ഓഫീസ് ഒരു പദ്ധതി വാഗ്‌ദാനം ചെയ്യുന്നുണ്ട്. അതിൽ അവർക്ക് നല്ലൊരു തുക പലിശ ഇനത്തിൽ നൽകുന്നുണ്ട്. സീനിയർ സിറ്റിസൺ സേവിംഗ്സ് സ്കീം എന്നാണ് ഈ പദ്ധതിയുടെ പേര്. ഈ സ്കീമിലൂടെ, പ്രായമായവർക്ക് പലിശയായി മാത്രം 12,30,000 രൂപ നേടാം.

സീനിയർ സിറ്റിസൺ സേവിംഗ്സ് സ്കീം പലിശ നിരക്ക്

പോസ്റ്റ് ഓഫീസ് സീനിയർ സിറ്റിസൺ സേവിംഗ്സ് സ്കീം ഒരു നിക്ഷേപ പദ്ധതിയാണ്. ഇതിൽ 5 വർഷത്തേക്ക് ഒരു നിശ്ചിത തുക നിക്ഷേപിക്കുന്നു. മുതിർന്ന പൗരന്മാർക്ക് ഈ സ്കീമിൽ 30,00,000 രൂപ വരെ നിക്ഷേപിക്കാം, അതേസമയം ഏറ്റവും കുറഞ്ഞ നിക്ഷേപ പരിധി 1000 രൂപയാണ്. നിലവിൽ ഈ സ്കീം 8.2 ശതമാനം പലിശ നിരക്ക് വാഗ്‌ദാനം ചെയ്യുന്നുണ്ട്.

പലിശയായി 12,30,000 രൂപ എങ്ങനെ നേടാം

ഈ സ്കീമിൽ പരമാവധി 30,00,000 രൂപ നിക്ഷേപിക്കാം. ഇത്രയും തുക നിക്ഷേപിക്കുകയാണെങ്കിൽ, 5 വർഷത്തിനുള്ളിൽ 8.2% നിരക്കിൽ 12,30,000 രൂപ പലിശ ലഭിക്കും. ഓരോ പാദത്തിലും 61,500 രൂപ പലിശയായി ക്രെഡിറ്റ് ചെയ്യും. 5 വർഷത്തിന് ശേഷം മെച്യൂരിറ്റി തുകയായി 42,30,000 രൂപ ലഭിക്കും.

ഈ സ്കീമിൽ 5 വർഷത്തേക്ക് 15 ലക്ഷം രൂപ നിക്ഷേപിച്ചാൽ, നിലവിലെ 8.2 ശതമാനം പലിശ അനുസരിച്ച്, 5 വർഷത്തിനുള്ളിൽ 6,15,000 രൂപ മാത്രമേ പലിശയായി ലഭിക്കൂ. ത്രൈമാസ അടിസ്ഥാനത്തിൽ പലിശ കണക്കാക്കുകയാണെങ്കിൽ, ഓരോ മൂന്ന് മാസത്തിലും 30,750 രൂപ പലിശയായി ലഭിക്കും. ഇങ്ങനെ 15,00,000 രൂപയും പലിശ തുകയായ 6,15,000 രൂപയും കൂട്ടുമ്പോൾ 21,15,000 രൂപ മെച്യൂരിറ്റി തുകയായി ലഭിക്കും.

ആർക്കൊക്കെ നിക്ഷേപിക്കാം

60 വയസോ അതിൽ കൂടുതലോ പ്രായമുള്ള ആർക്കും നിക്ഷേപിക്കാം. വിആർഎസ് എടുക്കുന്ന സിവിൽ മേഖലയിലെ സർക്കാർ ജീവനക്കാർക്കും പ്രതിരോധമേഖലയിൽ നിന്ന് വിരമിക്കുന്നവർക്കും ചില വ്യവസ്ഥകളോടെ പ്രായപരിധിയിൽ ഇളവ് നൽകിയിട്ടുണ്ട്. 5 വർഷമാണ് പദ്ധതിയുടെ കാലാവധി. 5 വർഷത്തിനു ശേഷവും അക്കൗണ്ട് കാലാവധി മൂന്ന് വർഷത്തേക്ക് കൂടി നീട്ടാവുന്നതാണ്. കാലാവധി പൂർത്തിയായി 1 വർഷത്തിനുള്ളിൽ ഇത് നീട്ടാവുന്നതാണ്. കാലാവധി പൂർത്തിയാകുന്ന തീയതിയിൽ ബാധകമായ നിരക്കിൽ നീട്ടിയ അക്കൗണ്ടിന് പലിശ ലഭിക്കുന്നു. ആദായ നികുതി വകുപ്പ് 80സി പ്രകാരം നികുതി ഇളവ് ലഭിക്കുന്നതാണ്.