റിട്ടയർമെൻ്റ് കാലം സുരക്ഷിതമാക്കണ്ടേ? ആർക്കെല്ലാം എൽ.ഐ.സി സ്മാർട്ട് പെൻഷൻ പ്ലാനിൽ അപേക്ഷിക്കാം.?

ലൈഫ് ഇൻഷുറൻസ് കോർപ്പറേഷൻ ഓഫ് ഇന്ത്യ പുതിയ പെൻഷൻ പദ്ധതി അവതരിപ്പിച്ചു. സ്മാർട്ട് പെൻഷൻ പ്ലാൻ എന്ന് പേരിട്ടിരിക്കുന്ന സ്കീം ഇന്നലെയാണ് ആരംഭിച്ചത്. ഇന്ത്യയുടെ പെൻഷൻ വിപണി വളരുന്നതിനനുസരിച്ച് എൽ.ഐ.സി രൂപപ്പെടുത്തിയ സ്മാർട്ട് പ്ലാനാണ് ഇത്. ഇതൊരു സിംഗിൾ പ്രീമിയം ആന്വിറ്റി പ്ലാനാണ്, അതായത് ഉപഭോക്താക്കൾ ഒറ്റത്തവണ പ്രീമിയം അടയ്ക്കുകയും അവർ തിരഞ്ഞെടുത്ത പ്ലാൻ അനുസരിച്ച് പതിവായി പേയ്‌മെന്റുകൾ സ്വീകരിക്കുകയും ചെയ്യുന്നു എന്നതാണ് ഈ സ്കീമിന്റെ പ്രത്യേകത.

"റിട്ടയർമെന്റ് എന്നത് ഒരിക്കലും വരുമാനത്തിന്റെ അവസാനമല്ല - അത് സാമ്പത്തിക സ്വാതന്ത്ര്യത്തിന്റെ തുടക്കമാണ്. എൽ.ഐ.സി സ്മാർട്ട് പെൻഷൻ ഉപയോഗിച്ച്, ജീവിതകാലം മുഴുവൻ സ്ഥിരമായ വരുമാനവും പ്രതിസന്ധികൾ ഇല്ലതാെ സമാധാനപരമായ ജീവിതവും ആസ്വദിക്കൂ," എന്നാണ് ഈ സ്കീമിനെ കുറിച്ച് ഒരാൾ എക്സിൽ കുറിച്ചത്.

ഉപഭോക്താക്കളുടെ വ്യത്യസ്ത സാമ്പത്തിക ആവശ്യങ്ങളും വിരമിക്കൽ ലക്ഷ്യങ്ങളും നിറവേറ്റുന്ന നിരവധി പേഔട്ട് ഓപ്ഷനുകൾ സ്മാർട്ട് പെൻഷൻ പ്ലാൻ വാഗ്ദാനം ചെയ്യുന്നു. ഓരോന്നും പരിശോധിക്കാ....

യോഗ്യതാ മാനദണ്ഢം എന്തെല്ലാം..?

• ഈ സ്കീമിൽ ചേരാനുള്ള ഏറ്റവും കുറഞ്ഞ പ്രവേശന പ്രായം 18 വയസ്സാണ്. അതിനാൽ യുവ നിക്ഷേപകർക്ക് പോലും ഈ പദ്ധതി അനുയോജ്യമാണ്.
• തിരഞ്ഞെടുക്കുന്ന പേഔട്ട് ഓപ്ഷൻ അനുസരിച്ച് ഈ സ്കീമിൽ ചേരാനുള്ള പരമാവധി പ്രവേശന പ്രായം 65 നും 100 നും ഇടയിലാണ്.

ആന്വിറ്റി ഓപ്ഷനുകൾ

ഒരു ലംപ്-സം നിക്ഷേപത്തിനോ മറ്റു സംഭാവനകൾക്കോ ​​പകരമായി പതിവായി നടത്തുന്ന പേയ്‌മെന്റുകളെയാണ് ആന്വിറ്റി എന്ന് പറയുന്നത്. എൽ.ഐ.സി സ്മാർട്ട് പെൻഷൻ പ്ലാൻ പ്രധാനമായും രണ്ട് ആന്വിറ്റി ഓപ്ഷനുകൾ വാഗ്ദാനം ചെയ്യുന്നു. അവയെ കുറിച്ച് പരിശോധിക്കാം;

സിംഗിൾ ലൈഫ് ആന്വിറ്റി: ഈ സ്കീമിന് കീഴിൽ ഉപഭോക്താവിന്റെ ജീവിതകാലം മുഴുവൻ ആന്വിറ്റി നൽകുന്നു.
ജോയിന്റ് ലൈഫ് ആന്വിറ്റി: പ്രാഥമിക ഉപഭോക്താവിനും സെക്കൻഡറി ഉപഭോക്താവിനും ആന്വിറ്റി പേയ്‌മെന്റ് നൽകുന്നു.

പേയ്‌മെന്റ് ഓപ്ഷനുകൾ;

ഉപഭോക്താക്കൾക്ക് അവരുടെ ഇഷ്ടപ്പെട്ട പേയ്‌മെന്റ് ഓപ്ഷനുകൾ തിരഞ്ഞെടുക്കാം. അതായത്, പ്രതിമാസം, ത്രൈമാസികം, അർദ്ധ വാർഷികം, വാർഷികം എന്നീ രീതിയിൽ പേയ്മെന്റ് തിരഞ്ഞെടുക്കാം. നിക്ഷേപിച്ച തുകയും തിരഞ്ഞെടുത്ത പേയ്‌മെന്റ് രീതിയും അടിസ്ഥാനമാക്കിയാണ് ഇൻസ്റ്റാൾമെന്റ് തുക കണക്കാക്കുന്നത്. ഉപഭോക്താവിന്റെ ആവശ്യങ്ങൾക്കനുസരിച്ച്, ചില നിബന്ധനകൾക്ക് വിധേയമായി ഭാഗികമായോ പൂർണ്ണമായോ പണം പിൻവലിക്കാനുള്ള ഓപ്ഷനുകളും സ്കീം വാഗ്ദാനം ചെയ്യുന്നു.

പ്ലാനിന്റെ കൂടുതൽ വിശദാംശങ്ങൾ അറിയാം...

• നിക്ഷേപിക്കാവുന്ന ഏറ്റവും കുറഞ്ഞ പ്ലാൻ = 1 ലക്ഷം രൂപ
• ഏറ്റവും കുറഞ്ഞ ആന്വിറ്റി തുകകൾ = 1,000 രൂപയാണ്. ഇത് പ്രതിമാസ പേയ്മെൻ്റ് അടിസ്ഥാനത്തിലാണ്.

ത്രൈമാസ അടിസ്ഥാനത്തിൽ 3,000 രൂപ, 6,000 രൂപ (അർദ്ധ വാർഷികം), 12,000 രൂപ (വാർഷികം) എന്നിങ്ങനെയാണ് അന്വിറ്റി തുകകൾ കണക്കാക്കുന്നത്.

എൽ.ഐ.സി സ്കീമിൽ എങ്ങനെ ചേരാം....

• എൽ.ഐ.സി സ്മാർട്ട് പെൻഷൻ പ്ലാൻ ഓൺലൈനായോ ഓഫ്‌ലൈനായോ ഉറപ്പാക്കാം.

• ഓൺലൈനായി ചെയ്യുന്നതിന് നിങ്ങൾ www.licindia.in എന്ന വെബ്‌സൈറ്റിൽ നേരിട്ട് സന്ദർശിച്ച് ഈ സ്കീമിന്റെ ഭാ​ഗമാവാം.

• ഓഫ്‌ലൈനായി സ്കീമിൽ ചേരുന്നതിന് എൽ.ഐ.സി ഏജന്റുമാർ, ഇടനിലക്കാർ, പോയിന്റ് ഓഫ് സെയിൽസ് പേഴ്‌സൺസ്, കോമൺ പബ്ലിക് സർവീസ് സെന്ററുകൾ എന്നിവ വഴിയും പ്ലാൻ ഉറപ്പാക്കാം.

പോളിസി ഉടമ മരണമടഞ്ഞാൽ പ്ലാൻ എടുക്കുന്ന സമയത്ത് തിരഞ്ഞെടുക്കുന്ന ഓപ്ഷനെ അടിസ്ഥാനമാക്കിയാണ് ഗുണഭോക്താവിന് പേഔട്ട് ലഭിക്കുന്നത്.