എസ്ബിഐ, എച്ച്ഡിഎഫ്‌സി ബാങ്ക്, പോസ്റ്റ് ഓഫീസ്; മുതിർന്ന പൗരന്മാർക്ക് സ്ഥിര നിക്ഷേപത്തിന് ലാഭം എവിടെ

സ്ഥിര നിക്ഷേപത്തെ ഏറ്റവും കൂടുതൽ ആശ്രയിക്കുന്നത് റിസ്കെടുക്കാൻ സാധിക്കാത്ത നിക്ഷേപകരായിരിക്കും. പൊതുവെ മുതിർന്ന പൗരന്മാർ ഇക്കൂട്ടത്തിൽ വരുന്നതാകും. ഇത്തരക്കാർക്ക് ബാങ്കുകൾ പ്രത്യേക സ്ഥിര നിക്ഷേപങ്ങൾ അധിക പലിശ നൽകും. സാധാരണയായി ലഭിക്കുന്ന പലിശ നിരക്കിനൊപ്പം 0.50 ശതമാനം പ്രീമിയം നിരക്ക് മുതിർന്ന പൗരന്മാരായ നിക്ഷേപകർക്ക് ലഭിക്കും. അധികം റിസ്‌ക് എടുക്കാതെ പണം സ്ഥിര നിക്ഷേപത്തിലേക്ക് മാറ്റുന്ന മുതിർന്ന പൗരന്മാർക്കിത് ലാഭകരമാണ്.

രാജ്യത്തെ മുൻനിര ബാങ്കുകളായ എസ്ബിഐ, എച്ച്ഡിഎഫ്‌സി ബാങ്ക് എന്നിവ 7.10 ശതമാനം വരെ പലിശ മുതിർന്ന പൗരന്മാർക്ക് നൽകുന്നു. നിക്ഷേപങ്ങൾക്ക് എത്ര പലിശയായി ലഭിക്കുമെന്ന് നോക്കാം.

എസ്ബിഐ സ്ഥിര നിക്ഷേപം

എസ്ബിഐയിൽ നിക്ഷേപകർക്ക് ഏറ്റവും കൂടുതൽ പലിശ നൽകുന്നത് അഞ്ചു മുതൽ പത്തു വർഷത്തേക്കാണ്. 7.05 ശതമാനം പലിശയാണ് നിക്ഷേപകർക്ക് ലഭിക്കുക. ഒരു വർഷം മുതൽ രണ്ടു വർഷത്തിൽ താഴെ 6.75 ശതമാനം പലിശ ലഭിക്കും. രണ്ടു വർഷത്തേക്ക് 6.95 ശതമാനം പലിശയും മൂന്നു വർഷത്തേക്ക് 6.80 ശതമാനം പലിശയും എസ്ബിഐ നൽകുന്നു.

ഒരു ലക്ഷം രൂപ ഒരു വർഷത്തേക്ക് നിക്ഷേപിച്ചാൽ 1,06,870 രൂപ ലഭിക്കും. അഞ്ചു വർഷത്തേക്ക് ഒരു ലക്ഷം രൂപ നിക്ഷേപിച്ചാൽ 1,42,175 രൂപയായി മാറും.

എച്ച്ഡിഎഫ്‌സി ബാങ്ക് സ്ഥിര നിക്ഷേപം

എച്ച്ഡിഫ്‌സി ബാങ്കിൽ 3.25 ശതമാനം മുതൽ 7.10 ശതമാനം വരെയാണ് മുതിർന്ന പൗരന്മാർക്ക് ലഭിക്കുന്ന പലിശ നിരക്ക്. 18 മാസം മുതൽ 21 മാസത്തിൽ താഴെയാണ് 7.10 ശതമാനം പലിശ ലഭിക്കുക. 21 മാസം മുതൽ രണ്ട് വർഷം ഒൻപത് മാസത്തേക്ക് 6.95 ശതമാനം പലിശ ലഭിക്കും. അഞ്ചു വർഷത്തേക്ക് 6.65 ശതമാനമാണ് പലിശ. രണ്ടു വർഷത്തേക്ക് ഒരു ലക്ഷം രൂപ എഫ്ഡിയിട്ടാൽ 1,14,888 രൂപ ലഭിക്കും

പോസ്റ്റ് ഓഫീസ് സ്ഥിര നിക്ഷേപം

ഒരു വർഷം, രണ്ടു വർഷം, മൂന്നു വർഷം, അഞ്ചു വർഷം എന്നിങ്ങനെയാണ് പോസ്റ്റ് ഓഫീസ് സ്ഥിര നിക്ഷേപമുള്ളത്. ഒരു വർഷത്തേക്ക് 6.90 ശതമാനം പലിശ ലഭിക്കും. ഒരു ലക്ഷം നിക്ഷേപിച്ചാൽ 1,07,081 രൂപയാകും.

രണ്ടു വർഷത്തേക്ക് ഏഴു ശതമാനം പലിശ ലഭിക്കും. ഒരു ലക്ഷം രൂപ കാലാവധിയിൽ 1,14,888 രൂപയാകും. മൂന്നു വർഷത്തേക്ക് 7.10 ശതമാനം പലിശ നൽകുന്നു. ഒരു ലക്ഷം രൂപ 1,23,508 രൂപയായി മാറും. അഞ്ചു വർഷത്തേക്ക് 7.50 ശതമാനം പലിശ ലഭിക്കും. ഒരു ലക്ഷം രൂപയുടെ നിക്ഷേപം 1,44,995 രൂപയായി മാറും.

അറിയിപ്പ്: ഇവിടെ പ്രകടിപ്പിച്ചിട്ടുള്ള അഭിപ്രായങ്ങളും നിർദ്ദേശങ്ങളും വ്യക്തിഗത വിശകലന വിദഗ്ദ്ധരുടെയോ സ്ഥാപനങ്ങളുടെയോ മാത്രം കാഴ്ചപ്പാടുകളാണ്. ഇത് Goodreturns.in-ന്റെയോ Greenium Information Technologies Private Limited-ന്റെയോ നിലപാടുകളെ പ്രതിഫലിക്കുന്നില്ല. ഈ ഉള്ളടക്കത്തിന്റെ കൃത്യത, പൂർണ്ണത, അല്ലെങ്കിൽ വിശ്വാസ്യത എന്നിവയ്ക്ക് ഞങ്ങൾ യാതൊരു ഉറപ്പും നൽകുന്നില്ല, മാത്രമല്ല അതിന് ഉത്തരവാദിത്തം ഏറ്റെടുക്കുന്നുമില്ല.

ഞങ്ങൾ ഏതെങ്കിലും തരത്തിലുള്ള നിക്ഷേപ ഉപദേശങ്ങൾ നൽകുകയോ, ഓഹരികൾ വാങ്ങാനോ വിൽക്കാനോ ശുപാർശ ചെയ്യുകയോ ചെയ്യുന്നില്ല. ഈ വിവരങ്ങൾ വിജ്ഞാനപ്രദമായ ആവശ്യങ്ങൾക്ക് മാത്രമുള്ളതാണ്. അതിനാൽ, ഏതെങ്കിലും നിക്ഷേപ തീരുമാനങ്ങൾ എടുക്കുന്നതിന് മുൻപ്, ലൈസൻസുള്ള ഒരു സാമ്പത്തിക ഉപദേഷ്ടകനുമായി കൂടിയാലോചിക്കുന്നത് നിർബന്ധമാണ്.