മരണംവരെ പ്രതിമാസം 20,500 രൂപ നേടാം; പോസ്റ്റ് ഓഫീസിന്റെ പ്രത്യേക പദ്ധതി

വാർധക്യ കാലത്ത് വരുമാനം ഉറപ്പാക്കേണ്ടത് ഏതൊരു വ്യക്തിയുടെയും ആവശ്യമാണ്. ഈ സമയത്ത് മറ്റുള്ളവരെ ആശ്രയിക്കാതെ ജീവിത ചെലവുകൾ നിറവേറ്റാൻ ചില നിക്ഷേപ പദ്ധതികൾ സഹായിക്കും. ഇത്തരത്തിൽ എല്ലാ മാസവും വരുമാനം ലഭിക്കുന്ന ഒരു പദ്ധതിയാണോ നിങ്ങൾ അന്വേഷിക്കുന്നത്?. അത്തരത്തിലുള്ള ഒരു പദ്ധതി പോസ്റ്റ് ഓഫീസ് വാഗ്‌ദാനം ചെയ്യുന്നുണ്ട്.

വിരമിക്കലിനു ശേഷമുള്ള പ്രതിമാസ വരുമാനത്തിന്റെ ആശങ്ക അകറ്റാൻ പോസ്റ്റ് ഓഫീസിന്റെ സീനിയർ സിറ്റിസൺ സേവിംഗ്സ് സ്കീം (SCSS) ഏറ്റവും മികച്ച ഓപ്ഷനാണ്. മുതിർന്ന പൗരന്മാർക്ക് സുരക്ഷിതവും സ്ഥിരവുമായ പ്രതിമാസ വരുമാനം ഈ പദ്ധതി ഉറപ്പുനൽകുന്നു. വിരമിക്കുന്ന സമയത്ത് നിങ്ങളുടെ പണം സുരക്ഷിതമായ സ്ഥലത്ത് നിക്ഷേപിക്കാനും, പ്രതിമാസ വരുമാനം ഉറപ്പാക്കാനും ആഗ്രഹിക്കുന്നുണ്ടെങ്കിൽ ഈ പദ്ധതി മികച്ചതാണ്.

പ്രതിമാസം 20,500 നേടാം

ഈ സ്‌കീമുകളുടെ പലിശനിരക്ക് പലപ്പോഴും പല ബാങ്കുകളും വാഗ്‌ദാനം ചെയ്യുന്ന എഫ്ഡി നിരക്കുകളേക്കാൾ കൂടുതലാണ്. എസ്‌സി‌എസ്‌എസിലെ നിലവിലെ പലിശ നിരക്ക് 8.2% ആണ്. സർക്കാർ പദ്ധതികളിൽ ഏറ്റവും ഉയർന്ന പലിശനിരക്കാണിത്. ഈ സ്കീമിൽ 30 ലക്ഷം നിക്ഷേപിച്ചാൽ, പ്രതിവർഷം ഏകദേശം 2,46,000 രൂപ പലിശ ലഭിക്കും. അതായത്, എല്ലാ മാസവും ഏകദേശം 20,500 രൂപ ലഭിക്കും. ഈ പണം നിങ്ങളുടെ ബാങ്ക് അക്കൗണ്ടിലേക്ക് നേരിട്ട് ട്രാൻസ്ഫർ ചെയ്യപ്പെടും.

നിക്ഷേപ പരിധിയും കാലാവധിയും

ഈ സ്കീമിൽ നേരത്തെ നിക്ഷേപിക്കുന്നതിനുള്ള പരമാവധി നിക്ഷേപ പരിധി 15 ലക്ഷം ആയിരുന്നു. ഇപ്പോൾ അത് 30 ലക്ഷമായി വർധിപ്പിച്ചിട്ടുണ്ട്. സ്കീമിന്റെ കാലാവധി 5 വർഷമാണ്. കാലാവധി പൂർത്തിയാകുമ്പോൾ 3 വർഷത്തേക്ക് കൂടി നീട്ടാവുന്നതാണ്. അതേസമയം, നിക്ഷേപം കാലാവധി പൂർത്തിയാകുന്നതിനു മുൻപ് പിൻവലിച്ചാൽ പിഴ ബാധകമാണ്.

ആർക്കൊക്കെ നിക്ഷേപിക്കാം?

60 വയസ്സും അതിൽ കൂടുതലുമുള്ള ഇന്ത്യൻ പൗരന്മാർക്ക് ഈ പദ്ധതിയിൽ നിക്ഷേപിക്കാം. 55 നും 60 നും ഇടയിൽ പ്രായമുള്ള വിരമിച്ച ജീവനക്കാർക്കും, 50 നും 60 നും ഇടയിൽ പ്രായമുള്ള വിരമിച്ച പ്രതിരോധ ഉദ്യോഗസ്ഥർക്കും ഈ സ്‌കീം പ്രയോജനപ്പെടുത്താൻ കഴിയും. അടുത്തുള്ള പോസ്റ്റ് ഓഫീസിലോ ബാങ്കിലോ എത്തി ഈ സ്കീമിൽ ചേരാവുന്നതാണ്.

നികുതിയും മറ്റു ആനുകൂല്യങ്ങളും

ഈ സ്കീമിൽ നിന്ന് ലഭിക്കുന്ന വരുമാനത്തിന് നികുതി അടയ്ക്കണം. എന്നിരുന്നാലും, എസ്‌സി‌എസ്‌എസിന് കീഴിൽ നികുതി ലാഭിക്കാൻ ചില സൗകര്യങ്ങളുണ്ട്. ആദായനികുതി നിയമത്തിലെ സെക്ഷൻ 80 സി പ്രകാരം ഒരു വർഷത്തിൽ 1.5 ലക്ഷം രൂപ വരെ നികുതിയിളവും ഈ പദ്ധതിയിലെ നിക്ഷേപം വഴി നേടാനാകും.

സുരക്ഷിത നിക്ഷേപം: ഈ സ്കീമിന്റെ നേട്ടമെന്ന് പറയുന്നത് സുരക്ഷിത നിക്ഷേപമാണ്. സർക്കാരാണ് ഈ പദ്ധതി ആരംഭിച്ചതിനാൽ പൂർണമായും സുരക്ഷിതമാണ്.

പ്രതിമാസ വരുമാനം: പ്രതിമാസം ഉറപ്പുള്ള വരുമാനം ലഭിക്കുന്നു. വിരമിച്ച ശേഷം, പതിവ് ചെലവുകൾക്കായി എല്ലാ മാസവും വരുമാനം ലഭിക്കും.

പലിശ നിരക്ക്: നിങ്ങൾക്ക് 8.2% പലിശ ലഭിക്കും.

ഫ്ലെക്സിബിലിറ്റി: അഞ്ച് വർഷത്തിന് ശേഷം നിക്ഷേപ കാലയളവ് നീട്ടാൻ കഴിയും.

നിബന്ധനകളും വ്യവസ്ഥകളും

സ്കീമിൽ നിക്ഷേപിക്കുന്നതിന് മുമ്പ്, എല്ലാ നിബന്ധനകളും വ്യവസ്ഥകളും മനസിലാക്കിയിരിക്കണം. ഈ സ്കീം, വിരമിക്കൽ ജീവിതത്തിന് സാമ്പത്തിക സുരക്ഷ ഉറപ്പാക്കുന്നു. വിരമിക്കലിന് ശേഷം സുഖകരവും സുരക്ഷിതവുമായ ജീവിതം ആഗ്രഹിക്കുന്നുവെങ്കിൽ, ഈ സ്കീമിൽ നിക്ഷേപിക്കുന്നത് ശരിയായ തീരുമാനമായിരിക്കും.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.