പോസ്റ്റ് ഓഫീസിൽ പോയി ക്യൂ നിൽക്കേണ്ട; ഇനി വീട്ടിലിരുന്ന് എസ്‌സിഎസ്എസ് അക്കൗണ്ടുകൾ നിയന്ത്രിക്കാം

മുതിർന്ന പൗരന്മാർക്കായി തപാൽ വകുപ്പ് നടപ്പിലാക്കുന്ന മികച്ച സമ്പാദ്യ പദ്ധതിയായ 'സീനിയർ സിറ്റിസൺ സേവിങ്‌സ് സ്കീം' ഇനി മുതൽ ഡിജിറ്റലായി കൈകാര്യം ചെയ്യാം. അക്കൗണ്ട് വിവരങ്ങൾ പരിശോധിക്കാനും കാലാവധി നീട്ടാനും അക്കൗണ്ട് ക്ലോസ് ചെയ്യാനുമായി ഇനി പോസ്റ്റ് ഓഫീസുകളിൽ നേരിട്ട് എത്തി ക്യൂ നിൽക്കേണ്ടതില്ല. തപാൽ വകുപ്പിന്റെ ഇന്റർനെറ്റ് ബാങ്കിംഗ് സൗകര്യം വഴിയാണ് ഈ സേവനങ്ങൾ ലഭ്യമാകുന്നത്. 

പുതിയ നിക്ഷേപം നടത്തുക, അക്കൗണ്ടിലെ ബാലൻസും പലിശ വിവരങ്ങളും നിരീക്ഷിക്കുക, അക്കൗണ്ട് കാലാവധി പൂർത്തിയാകുമ്പോൾ അത് നീട്ടുക, അക്കൗണ്ട് ക്ലോസ് ചെയ്യുക എന്നിവയെല്ലാം ഇനി മുതൽ വീട്ടിലിരുന്ന് തന്നെ ചെയ്യാം. ഡിജിറ്റലൈസേഷന്റെ ഭാഗമായി രാജ്യത്തെ 1.64 ലക്ഷം പോസ്റ്റ് ഓഫീസുകളെയും ഈ സംവിധാനവുമായി ബന്ധിപ്പിച്ചിട്ടുണ്ട്. 

ഓൺലൈനായി എങ്ങനെ ചെയ്യാം?

തപാൽ വകുപ്പിന്റെ ഇന്റർനെറ്റ് ബാങ്കിംഗ് പോർട്ടലിൽ ലോഗിൻ ചെയ്ത ശേഷം താഴെ പറയുന്ന ഘട്ടങ്ങൾ പിന്തുടരുക.

അക്കൗണ്ട് ക്ലോസ് ചെയ്യാൻ: 'General Services' ടാബിൽ പോയി 'Service Requests' തിരഞ്ഞെടുക്കുക. അതിൽ 'New Requests' നൽകി 'Closure/Pre-closure of SCSS Accounts' എന്നത് സെലക്ട് ചെയ്യുക. തുക ക്രെഡിറ്റ് ചെയ്യേണ്ട സേവിങ്‌സ് അക്കൗണ്ട് നൽകി ട്രാൻസാക്ഷൻ പാസ്‌വേഡ് ഉപയോഗിച്ച് സബ്മിറ്റ് ചെയ്യാം.

കാലാവധി നീട്ടാൻ: 'Extension of SCSS Account' എന്ന ഓപ്ഷൻ തിരഞ്ഞെടുത്ത് നിബന്ധനകൾ അംഗീകരിച്ച ശേഷം സബ്മിറ്റ് ചെയ്യുക. പുതിയ കാലാവധിയും പലിശ നിരക്കും സ്ക്രീനിൽ കാണാൻ സാധിക്കും.

എന്തുകൊണ്ട് എസ്‌സിഎസ്എസ് ആകർഷകം?

മുതിർന്ന പൗരന്മാർക്ക് വിരമിച്ചതിനുശേഷം സ്ഥിരമായ വരുമാനവും നിക്ഷേപ സുരക്ഷയും ഉറപ്പാക്കുന്നതിനായി കേന്ദ്ര സർക്കാർ ആവിഷ്കരിച്ച പദ്ധതിയാണ് സീനിയർ സിറ്റിസൺസ് സേവിംഗ്സ് സ്കീം. ബാങ്ക് നിക്ഷേപങ്ങളെ അപേക്ഷിച്ച് ഉയർന്ന പലിശ നിരക്കും നികുതി ഇളവുകളും ഈ പദ്ധതിയുടെ പ്രത്യേകതയാണ്. നിലവിൽ 8.2% പലിശ നിരക്കാണ് ഈ പദ്ധതി വാഗ്ദാനം ചെയ്യുന്നത്. ഇത് മുൻനിര ബാങ്കുകൾ സ്ഥിരനിക്ഷേപങ്ങൾക്ക് നൽകുന്ന പലിശയേക്കാൾ കൂടുതലാണ്. 

കൃത്യമായ ഇടവേളകളിൽ വരുമാനം ആഗ്രഹിക്കുന്ന മുതിർന്ന പൗരന്മാർക്ക് ഏറ്റവും സുരക്ഷിതമായ നിക്ഷേപ മാർഗമാണിത്. 60 വയസ്സ് പൂർത്തിയായ ഏതൊരു ഇന്ത്യൻ പൗരനും ഈ പദ്ധതിയിൽ ചേരാം. 55 വയസ്സിനും 60 വയസ്സിനും ഇടയിൽ പ്രായമുള്ളവർക്ക്, 'റിട്ടയർമെന്റ് ബെനഫിറ്റുകൾ' ലഭിച്ച് ഒരു മാസത്തിനുള്ളിൽ ഈ പദ്ധതിയിൽ നിക്ഷേപിക്കാവുന്നതാണ്. റിട്ടയർമെന്റ് ജീവിതം സാമ്പത്തിക ഭദ്രതയുള്ളതാക്കാൻ ആഗ്രഹിക്കുന്നവർക്ക് തിരഞ്ഞെടുക്കാവുന്ന ഏറ്റവും വിശ്വസനീയമായ പദ്ധതിയാണിത്.