ഷോപ്പിംഗ് ഇനി ലാഭകരമാക്കാം; 2026-ൽ മികച്ച ക്യാഷ്ബാക്ക് നൽകുന്ന 5 ക്രെഡിറ്റ് കാർഡുകൾ

നിത്യേനയുള്ള ഷോപ്പിംഗിനും ബില്ലുകൾ അടയ്ക്കാനും ക്രെഡിറ്റ് കാർഡുകൾ ഉപയോഗിക്കുന്നവർക്ക് വമ്പൻ നേട്ടങ്ങളുമായി 2026. ശരിയായ രീതിയിൽ ക്രെഡിറ്റ് കാർഡുകൾ ഉപയോഗിച്ചാൽ വലിയ തുക ലാഭിക്കാൻ സാധിക്കും. സൂപ്പർ മാർക്കറ്റ് പർച്ചേസുകൾ, വൈദ്യുതി ബില്ലുകൾ, റീചാർജുകൾ എന്നിവയ്‌ക്കെല്ലാം മികച്ച ക്യാഷ്ബാക്ക് ഓഫറുകൾ നൽകുന്ന അഞ്ച് ക്രെഡിറ്റ് കാർഡുകളെക്കുറിച്ചാണ് ഇനി പറയുന്നത്.

1. യെസ് ബാങ്ക് പൈസാബസാർ 'പൈസാ സേവ്' ക്രെഡിറ്റ് കാർഡ്

യാത്രകൾക്കും ഡൈനിംഗിനും കൂടുതൽ പണം ചിലവഴിക്കുന്നവർക്ക് ഈ കാർഡ് മികച്ചതാണ്. യാത്രകൾക്കും ഭക്ഷണത്തിനുമായി ചിലവാക്കുന്ന തുകയ്ക്ക് 6% വരെ ക്യാഷ്ബാക്ക് ലഭിക്കും. ജോയിനിംഗ് ഫീസില്ല. വാർഷിക ഫീസ് 500 രൂപയാണ്. എന്നാൽ വർഷത്തിൽ 1.2 ലക്ഷം രൂപയിൽ കൂടുതൽ ചിലവാക്കിയാൽ ഈ ഫീസ് ഒഴിവാക്കി കിട്ടും. ഇന്ധന സർചാർജ് ഇളവ് മാസത്തിൽ 250 രൂപ വരെ ലഭിക്കും.

2. ബി.ഒ.ബി കാർഡ് ക്യാഷ്ബാക്ക് ക്രെഡിറ്റ് കാർഡ് 

ഓൺലൈൻ ഷോപ്പിംഗ് പ്രിയർക്ക് അനുയോജ്യമായ കാർഡാണിത്. ഓൺലൈൻ ഇടപാടുകൾക്ക് 5% ക്യാഷ്ബാക്കും മറ്റ് ഇടപാടുകൾക്ക് പരിധിയില്ലാത്ത 1% ക്യാഷ്ബാക്കും ലഭിക്കും. വലിയ തുകയ്ക്കുള്ള പർച്ചേസുകൾ എളുപ്പത്തിൽ ഇഎംഐ ആയി മാറ്റാം. കുടുംബാംഗങ്ങൾക്കായി മൂന്ന് 'ആഡ്-ഓൺ' കാർഡുകൾ സൗജന്യമായി ലഭിക്കും.

3. എസ്.ബി.ഐ ക്യാഷ്ബാക്ക് ക്രെഡിറ്റ് കാർഡ്

രാജ്യത്തെ ഏറ്റവും ജനപ്രിയമായ ക്യാഷ്ബാക്ക് കാർഡുകളിൽ ഒന്നാണിത്. എല്ലാ ഓൺലൈൻ പർച്ചേസുകൾക്കും 5% ക്യാഷ്ബാക്കും ഓഫ്‌ലൈൻ പർച്ചേസുകൾക്ക് 1% ക്യാഷ്ബാക്കും ലഭിക്കും. ജോയിനിംഗ് ഫീസും വാർഷിക ഫീസും 999 രൂപ വീതമാണ്. വർഷം 2 ലക്ഷം രൂപയിൽ കൂടുതൽ ചിലവാക്കുന്നവർക്ക് വാർഷിക ഫീസ് ഒഴിവാക്കും.

4. എച്ച്.ഡി.എഫ്.സി മില്ലേനിയ ക്രെഡിറ്റ് കാർഡ്

യുവാക്കൾക്കിടയിൽ ഏറെ തരംഗമായ കാർഡാണിത്. ആമസോൺ, ഫ്ലിപ്കാർട്ട്, മിന്ത്ര, സൊമാറ്റോ, ബുക്ക് മൈ ഷോ തുടങ്ങിയ പ്രമുഖ പ്ലാറ്റ്‌ഫോമുകളിലെ ചിലവുകൾക്ക് 5% ക്യാഷ്ബാക്ക് ലഭിക്കും. മറ്റ് വിഭാഗങ്ങളിലെ ചിലവുകൾക്ക് 1% ക്യാഷ്ബാക്ക് ലഭിക്കും. ജോയിനിംഗ് ഫീസ് 1,000 രൂപയാണ്.

5. എയർടെൽ ആക്സിസ് ബാങ്ക് ക്രെഡിറ്റ് കാർഡ്

യൂട്ടിലിറ്റി ബില്ലുകൾക്കും റീചാർജുകൾക്കും ഏറ്റവും ലാഭകരമായ ഓപ്ഷൻ. എയർടെൽ താങ്ക്സ് ആപ്പ് വഴി നടത്തുന്ന എയർടെൽ റീചാർജുകൾക്കും ഡിടിഎച്ച് ബില്ലുകൾക്കും 25% വരെ ക്യാഷ്ബാക്ക് ലഭിക്കും. സൊമാറ്റോ, സ്വിഗ്ഗി, ബിഗ് ബാസ്കറ്റ് തുടങ്ങിയവയിൽ നടത്തുന്ന ഓർഡറുകൾക്ക് 10% ക്യാഷ്ബാക്ക് ലഭിക്കും. 500 രൂപയാണ് വാർഷിക ഫീസ്.

നിങ്ങളുടെ ചിലവുകൾ പ്രധാനമായും ഏത് മേഖലയിലാണെന്ന് തിരിച്ചറിഞ്ഞ് വേണം കാർഡുകൾ തിരഞ്ഞെടുക്കാൻ. കൃത്യസമയത്ത് തിരിച്ചടവ് ഉറപ്പാക്കുന്നത് വഴി ക്രെഡിറ്റ് സ്കോർ വർദ്ധിപ്പിക്കാനും കൂടുതൽ സാമ്പത്തിക ആനുകൂല്യങ്ങൾ നേടിയെടുക്കാനും സാധിക്കും.