എസ്ഐപിയിൽ 5,000 രൂപ നിക്ഷേപിച്ചാൽ എത്ര വർഷം കൊണ്ട് ഇരട്ടിയിലധികം കോർപ്പസ് വളരും?

ഒരു സിസ്റ്റമാറ്റിക് ഇൻവെസ്റ്റ്‌മെന്റ് പ്ലാൻ (എസ്.ഐ.പി) നിങ്ങളുടെ സാമ്പത്തിക വളർച്ചക്ക് സുപ്രധാനമായ ഒരു നിക്ഷേപ മാർ​ഗമാണ്. മ്യൂച്വൽ ഫണ്ടുകളിലൂടെ സമ്പാദിക്കാൻ എസ്.ഐ.പി തന്നെയാണ് മികച്ച മാർ​ഗം. ഇതിലൂടെ മ്യൂച്വൽ ഫണ്ടിൽ നിക്ഷേപകർക്ക് സ്ഥിരമായി നിക്ഷേപിക്കാൻ സാധിക്കുന്നു. ദീർഘകാല നിക്ഷേപങ്ങളിലൂടെയാണ് നിങ്ങളുടെ സാമ്പത്തിക ലക്ഷ്യത്തിലേക്ക് എത്തിച്ചേരാൻ സാധിക്കുന്നത്. അതിന് എസ്.ഐ.പി വഴിയൊരുക്കും.

എസ്.ഐ.പി ദീർഘകാല നിക്ഷേപത്തിലൂടെ കൂട്ടുപലിശയുടെ നേട്ടവും ഉറപ്പാക്കാൻ സാധിക്കും. അതിനാൽ നിക്ഷേപിക്കുന്ന തുകയേക്കാൾ ഇരട്ടി നേട്ടം ലഭിക്കും. എന്നാൽ നിശ്ചിത ഇടവേളകളിൽ കൃത്യമായി നിങ്ങളുടെ നിക്ഷേപം നടത്തണം. കൂട്ടുപലിശയുണ്ടെങ്കിൽ നിങ്ങളുടെ നിക്ഷേപം കാലക്രമേണ ഗണ്യമായി വർദ്ധിപ്പിക്കുകയും വലിയ തുക സമ്പാദിക്കാനും സാധിക്കുന്നു. അതായത് ചിലപ്പോൾ ഇരട്ടിയിലധികം നേട്ടം വരെ കൂട്ടുപലിശയിലൂടെ ഉറപ്പാക്കാം.

ഇവിടെ നിങ്ങളുടെ നിക്ഷേപത്തെ മൂന്ന് രീതിയിൽ പരിശോധിക്കാം. അതായത് നിങ്ങൾ 15 വർഷത്തേക്ക് പ്രതിമാസ എസ്ഐപി 5,000 രൂപ എന്ന കണക്കിൽ നിക്ഷേപിക്കുന്നു. എങ്കിൽ എത്ര രൂപ മെച്യൂരിറ്റിയായി ലഭിക്കും? ഇനി 7.5 വർഷത്തേക്ക് നിങ്ങൾ 10,000 രൂപ പ്രതിമാസ എസ്ഐപിയിൽ നിക്ഷേപിച്ചാൽ ലാഭം എത്ര? എന്നാൽ 5 വർഷത്തെ കാലാവധിയിൽ പ്രതിമാസ എസ്ഐപി 15,000 രൂപ അടച്ചാൽ എത്ര രൂപയായി നിക്ഷേപം വളരും? വിശദമായി നോക്കാം. ഇവിടെ 12 ശതമാനം വാർഷിക വരുമാനം കണക്കാക്കിയാൽ നേട്ടം എത്രയാണ്?

15 വർഷത്തെ കാലാവധിയിൽ നിക്ഷേപിക്കാം...

എസ്ഐപി നിക്ഷേപത്തിലൂടെ 12 ശതമാനം വാർഷിക പലിശ കണക്കാക്കിയാൽ 15 വർഷത്തേക്ക് 5,000 രൂപ എല്ലാ മാസവും നിക്ഷേപിച്ചാൽ എത്ര രൂപ നേട്ടം പ്രതീക്ഷിക്കാം. ഈ 15 വർഷം കൊണ്ട് നിങ്ങളുടെ മൊത്തം നിക്ഷേപം ഏകദേശം 9 ലക്ഷം രൂപയായിരിക്കും. പക്ഷേ കാലാവധി പൂർത്തിയാവുമ്പോൾ ഈ 9 ലക്ഷം വളർന്ന് 25.23 ലക്ഷം രൂപയുടെ കോർപ്പസായി മാറും. അതായക് ഇവിടെ 16.23 ലക്ഷം രൂപയാണ് പലിശയിനത്തിൽ ലഭിക്കുന്നത്.

7.5 വർഷത്തെ കാലാവധിയിൽ നിക്ഷേപിച്ചാൽ കോർപ്പസ് എത്ര?

നിങ്ങൾ എസ്ഐപിയിൽ എല്ലാ മാസവും 10,000 രൂപ നിക്ഷേപം ആരംഭിച്ചാൽ 7.5 വർഷത്തേക്ക് നിക്ഷേപിച്ചാൽ മൊത്തം നിക്ഷേപ തുക 9 ലക്ഷം രൂപയായിരിക്കും. അങ്ങനെങ്കിൽ നിങ്ങളുടെ നിക്ഷേപം കാലാവധി അവസാനിക്കുമ്പോൾ ഏകദേശം 14.63 ലക്ഷം രൂപയായി വളരുന്നു. ഇവിടെ 12 ശതമാനം പലിശ കണക്കാക്കിയാൽ ലഭിക്കുന്ന മൊത്തം വരുമാനം 5.63 ലക്ഷം രൂപയാണ്.

5 വർഷത്തേക്ക് എസ്ഐപിയിൽ നിക്ഷേപിച്ചാൽ നേട്ടം എത്ര?

5 വർഷത്തേക്ക് പ്രതിമാസം 15,000 രൂപയുടെ എസ്‌ഐപി നിക്ഷേപം നടത്തിയാൽ 9 ലക്ഷം രൂപയാണ് മൊത്തം നിക്ഷേപ തുകയായി കണക്കാക്കുന്നത്. ഈ തുക കാലാവധി പൂർത്തിയാവുമ്പോൾ ഏകദേശം 12.37 ലക്ഷം രൂപയായി വളരുന്നു. എന്നാൽ പലിശയിനത്തിൽ ലഭിക്കുന്നത് 3.37 ലക്ഷം രൂപയാണ്.

ഈ മൂന്ന് നിക്ഷേപ രീതികളും വ്യത്യസ്തമാണ്. അതായത് മൂന്ന് രീതിയിലും മൊത്തം നിക്ഷേപ തുക 9 ലക്ഷമാണ്. പക്ഷേ ലഭിക്കുന്ന മെച്യൂരിറ്റി തുക വേറിട്ടതാണ്. 15 വർഷത്തേക്ക് നിക്ഷേപിക്കുമ്പോൾ ലഭിക്കുന്നത് 22.53 ലക്ഷമാണ്. അതായത് പലിശ മാത്രം 16 ലക്ഷത്തിനു മുകളിൽ നേടാം. എന്നാൽ 7.5 വർഷത്തെ നിക്ഷേപത്തിനും 5 വർഷത്തെ നിക്ഷേപത്തിനും കുറഞ്ഞ കോർപ്പസാണ് ലഭിക്കുന്നത്. ഇതിനർത്ഥം ദീർഘകാലത്തെ നിക്ഷേപത്തിലൂടെയാണ് സമ്പാദ്യ വളരുന്നതും കൂട്ടുപലിശയുടെ ശക്തി ഉയരുന്നതും.