എസ്ഐപി VS ആർഡി: 5,000 രൂപ നിക്ഷേപിച്ചാൽ 1 ലക്ഷത്തിലധികം പലിശ കിട്ടും, അറിയാം ഈ സ്കീമിനെ കുറിച്ച്

ഏത് പ്രായത്തിൽ സമ്പാദിക്കുന്നു എന്നതു പോലെ എങ്ങനെ സമ്പാദിക്കുന്നു എന്നതും പ്രധാനമാണ്. അപകട സാധ്യതയുള്ളതും ഇല്ലാത്തതുമായി നിരവധി സമ്പാദ്യ പദ്ധതികളുണ്ട്. അത്തരത്തിൽ ഉയർന്ന വരുമാനം നൽകുന്ന രണ്ട് പദ്ധതികളാണ് പോസ്റ്റ് ഓഫീസ് റിക്കറിംഗ് ഡെപ്പോസിറ്റും, എസ്ഐപിയും. ഈ രണ്ട് നിക്ഷേപങ്ങളും വ്യത്യസ്തമായ രീതിയിൽ സമ്പത്ത് സൃഷ്ടിക്കുന്നു. ഒന്ന് വിപണിയുമായി ബന്ധപ്പെട്ട നിക്ഷേപമാണെങ്കിൽ, മറ്റേത് സുരക്ഷിത വരുമാനം നൽകുന്ന സർക്കാർ പദ്ധതിയാണ്.

ആർഡിയും, എസ്ഐപിയും വ്യത്യസ്ത രീതിയിൽ സമ്പത്ത് വളർത്തുന്നു. ഇതിൽ ഏത് നിക്ഷേപ പദ്ധതിയാണ് ഉയർന്ന വരുമാനം നൽകുന്നത്? എങ്ങനെ അറിയാം? ഈ രണ്ട് നിക്ഷേപങ്ങളിലും അഞ്ച് വർഷത്തേക്ക് പ്രതിമാസം 5,000 രൂപ വീതം നിക്ഷേപിച്ചാൽ എത്ര രൂപയാണ് കാലാവധി പൂർത്തിയാവുമ്പോൾ ലഭിക്കുന്നത്? കണക്കുകൾ നോക്കാം;

പോസ്റ്റ് ഓഫീസ് ആർ‌ഡി സ്കീം

സർക്കാർ നിയന്ത്രണത്തിൽ പ്രവർത്തിക്കുന്ന ഒരു സുരക്ഷിത നിക്ഷേപ ഓപ്ഷനാണിത്. ആർഡി സ്കീം സാധാരണയായി പ്രതിമാസ നിക്ഷേപത്തിലൂടെ സമ്പത്ത് വളർത്താൻ സഹായിക്കുന്നു. അപകട സാധ്യത കുറവായതിനാൽ സ്ഥിരമായ വരുമാനമാണ് ആർഡി സ്കീമിലൂടെ ലഭിക്കുന്നത്. നിലവിൽ പ്രതിവർഷം 6.7% പലിശ നിരക്കാണ് ആർഡി വാഗ്ദാനം ചെയ്യുന്നത്. ഇവിടെ ഓരോ മാസവും 5,000 രൂപ നിക്ഷേപിച്ചാൽ എത്ര രൂപ സമ്പാദിക്കാം?

ഓരോ മാസവും 5,000 രൂപ നിക്ഷേപിച്ചാൽ ഒരു വർഷം കൊണ്ട് നിക്ഷേപം 60,000 രൂപയാവും. ഇത് അഞ്ച് വർഷം കൊണ്ട് 3 ലക്ഷം രൂപയാവും. നിലവിലെ പലിശ നിരക്ക് പ്രകാരം ഈ നിക്ഷേപത്തിലൂടെ ലഭിക്കുന്ന മൊത്തം പലിശ വരുമാനം 56,830 രൂപയാണ്. അതായത് ലഭിക്കുന്ന മൊത്തം നേട്ടം 3,56,830 രൂപയായിരിക്കും.

എസ്ഐപി നിക്ഷേപം

മ്യൂച്വൽ ഫണ്ടുകളിൽ നിക്ഷേപിക്കുന്നതിനുള്ള ഒരു നിക്ഷേപ രീതിയാണ് എസ്ഐപി അഥവാ സിസ്റ്റമാറ്റിക് ഇൻവെസ്റ്റ്മെൻ്റ് പ്ലാൻ. ഇത് വിപണിയുമായി ബന്ധപ്പെട്ടിരിക്കുന്നു. അതിനാൽ തന്നെ ഇതിലൂടെ ലഭിക്കുന്ന വരുമാനം സ്ഥിരമായിരിക്കില്ല, ഒപ്പം നിക്ഷേപത്തിന് അപകട സാധ്യതയും കൂടുതലായിരിക്കും. എസ്ഐപിയിലൂടെ വലിയ സാമ്പത്തിക ലക്ഷ്യമുള്ളവർ ദീർഘകാല നിക്ഷേപങ്ങൾ തിരഞ്ഞെടുക്കുന്നതാണ് നല്ലത്. കാരണം, കൂട്ടുപലിശയുടെ നേട്ടം എസ്ഐപിയിലൂടെ ലഭിക്കും.

എസ്ഐപിയുടെ ശരാശരി വാർഷിക വരുമാനം ഏകദേശം 12% ആയിരിക്കും. വിപണി നേട്ടത്തിലാണെങ്കിൽ അത് ചിലപ്പോൾ 13 ശതമാനമോ അല്ലെങ്കിൽ 14 ശതമാനമോ ആയി ഉയർന്നേക്കാം. എന്നാൽ 5 വർഷത്തെ നിക്ഷേപത്തിലൂടെ എത്ര രൂപ സമ്പാദിക്കാമെന്ന് പരിശോധിക്കാം;

നിങ്ങൾ എല്ലാ മാസവും 5,000 രൂപ എസ്ഐപിയിൽ നിക്ഷേപിച്ചാൽ 5 വർഷം കൊണ്ട് നിക്ഷേപം മൊത്തം 3 ലക്ഷം രൂപയാവുന്നു. ഇവിടെ 12% പലിശ നിരക്ക് കണക്കാക്കിയാൽ, ലഭിക്കുന്ന പലിശ വരുമാനം ഏകദേശം 1,05,518 രൂപയായിരിക്കും. അതായത് നിങ്ങൾക്ക് ലഭിക്കുന്ന മൊത്തം നേട്ടം 4,05,518 രൂപയാകും. വിപണിയിൽ കാര്യമായ ഇടിവുകൾ സംഭവിച്ചിട്ടില്ലെങ്കിൽ ചിലപ്പോൾ ഇതിലും ഉയർന്ന വരുമാനം ലഭിക്കും.

ഈ രണ്ട് നിക്ഷേപങ്ങളിൽ കൂടുതൽ സമ്പാദ്യം നേടുന്നത് എസ്ഐപിയിലൂടെയാണ്. അതിനു കാരണം ഉയർന്ന പലിശ നിരക്കും, കൂട്ടുപലിശയുടെ ശക്തിയും കാരണമാണ്. ആർഡി സ്ഥിരമായ വരുമാനം നൽകുന്നതിനാൽ കാര്യമായ കോർപ്പസ് സൃഷ്ടിക്കാൻ സാധിക്കില്ല. അപകട സാധ്യതകൾ പ്രശ്നമില്ലാത്തവർക്ക് തീർച്ചയായും എസ്ഐപി തന്നെ തിരഞ്ഞെടുക്കാം.