എസ്ഐപി VS സുകന്യ സമൃദ്ധി യോജന: 5,000 രൂപ നിക്ഷേപിച്ചാൽ കുട്ടികൾക്ക് ഉയർന്ന വരുമാനം കിട്ടുന്ന സ്കീം ഏത്?

കുട്ടികളുടെ ഭാവി സുരക്ഷിതമാക്കാൻ നേരത്തെ തന്നെ നിക്ഷേപം ആരംഭിക്കുന്നതാണ് ഉചിതം. എല്ലാ മാസവും ചെറിയ തുക നിക്ഷേപിക്കാൻ സാധിച്ചാൽ കുട്ടികളുടെ വിദ്യാഭ്യാസം, വിവാഹം തുടങ്ങിയ ആവശ്യങ്ങളെല്ലാം പൂർത്തികരിക്കാൻ സാധിക്കും. നിലവിൽ വലിയ ഫണ്ട് സ്വരൂപിക്കാൻ മ്യൂച്വൽ ഫണ്ട് എസ്ഐപികളാണ് കൂടുതൽ നല്ലത്. എന്നാൽ നിങ്ങൾക്ക് പെൺകുട്ടികളുണ്ടെങ്കിൽ പോസ്റ്റ് ഓഫീസിൻ്റെ സു​കന്യ സമൃദ്ധി യോജനയും മികച്ച തിരഞ്ഞെടുപ്പായിരിക്കും.

ഇവ രണ്ടും രണ്ട് നിക്ഷേപ പദ്ധതികളാണ്. ശ്രദ്ധയോടെ നിക്ഷേപിച്ചാൽ നിങ്ങൾക്ക് വലിയ തുക സമ്പാദിക്കാം. ഈ രണ്ട് സ്കീമുകളിൽ പ്രതിമാസം 5,000 രൂപ വീതം 15 വർഷത്തേക്ക് നിക്ഷേപിച്ചാൽ ഏത് സ്കീം ഉയർന്ന വരുമാനം നൽകും? അതിനു മുന്നേ ഈ രണ്ട് സ്കീമുകളെ കുറിച്ച് വിശദമായി പരിശോധിക്കാം.

എസ്ഐപി

മ്യൂച്വൽ ഫണ്ടുകളിൽ ഒരു നിശ്ചിത ഇടവേളകളിൽ നിക്ഷേപിക്കുന്ന രീതിയാണ് സിസ്റ്റമാറ്റിക് ഇൻവെസ്റ്റ്മെൻ്റ് പ്ലാൻ അഥവാ എസ്ഐപി എന്നറിയപ്പെടുന്നത്. ഇത് വിപണിയുമായി ബന്ധപ്പെട്ട പദ്ധതിയായതിനാൽ ഇതിൽ നിന്നും ലഭിക്കുന്ന വരുമാനത്തിന് അപകട സാധ്യതയുണ്ട്. മാത്രമല്ല നിങ്ങൾക്ക് എല്ലായ്പോഴും ഒരുപോലെ വരുമാനം ലഭിക്കണമെന്നും നിർബന്ധമില്ല. പക്ഷേ ദീർഘകാലത്തേക്ക് നിക്ഷേപിച്ചാൽ കൂട്ടുപലിശയുടെ നേട്ടം ഉറപ്പാക്കാൻ സാധിക്കും.

സുകന്യ സമൃദ്ധി യോജന

10 വയസ്സിനു താഴെ പ്രായമുള്ള പെൺകുട്ടികൾക്ക് ചേരാവുന്ന സർക്കാർ നിയന്ത്രണത്തിലുള്ള നിക്ഷേപ പദ്ധതിയാണിത്. പെൺമക്കളുടെ പേരിൽ അവരുടെ മാതാപിതാക്കൾക്ക് ഈ സ്കീമിൽ അക്കൗണ്ട് തുറക്കാം. പെൺകുട്ടികളുടെ ഭാവി സുരക്ഷിതമാക്കുക എന്ന ലക്ഷ്യത്തോടെയാണ് ഈ പദ്ധതി പ്രവർത്തിക്കുന്നത്. 21 വർഷത്തിനു ശേഷമാണ് ഈ പദ്ധതിയുടെ കാലാവധി പൂർത്തിയാവുന്നത്. പക്ഷേ 18 വയസ്സിനു ശേഷം പെൺകുട്ടി വിവാഹിതയായാൽ എപ്പോൾ വേണമെങ്കിലും അക്കൗണ്ട് ക്ലോസ് ചെയ്യാൻ സാധിക്കും.

മാത്രമല്ല നിക്ഷേപം ആരംഭിച്ച് കാലാവധി പൂർത്തിയാവുന്നതിനു മുന്നേ നിങ്ങൾക്ക് ആവശ്യമെങ്കിൽ ഭാ​ഗികമായി പണം പിൻവലിക്കാനും സാധിക്കും. ഓരോ വർഷവും പരമാവധി 1.5 ലക്ഷം രൂപ വരെയാണ് നിക്ഷേപിക്കാൻ സാധിക്കുന്നത്. മാത്രമല്ല ഏറ്റവും കുറഞ്ഞത് 15 വർഷം വരെ നിക്ഷേപിക്കാം. ഈ സ്കീം പ്രതിവർഷം 8.2% പലിശ വരുമാനം നൽകുന്നുണ്ട്.

SIP Vs സുകന്യ സമൃദ്ധി യോജന

രണ്ട് സ്കീമുകളിലും 15 വർഷത്തേക്ക് പ്രതിമാസം 5,000 രൂപ നിക്ഷേപിച്ചാൽ എത്ര രൂപ വളരും?. ഏത് സ്കീം ഉയർന്ന നേട്ടം നൽകും? വിശദമായി അറിയാം.

എസ്‌ഐ‌പിയിൽ പ്രതിമാസം 5,000 രൂപ നിക്ഷേപിച്ചാൽ 15 വർഷം കൊണ്ട് നിങ്ങളുടെ മൊത്തം നിക്ഷേപം 9 ലക്ഷം രൂപയായിരിക്കും. പ്രതിവർഷം 12% പലിശ നിരക്ക് കണക്കാക്കിയാൽ നിങ്ങൾക്ക് ലഭിക്കുന്ന പലിശ വരുമാനം 14,79,657 ലക്ഷം രൂപയായിരിക്കും. അങ്ങനെയെങ്കിൽ നിക്ഷേപത്തിൻ്റെ കാലാവധി പൂർത്തിയാകുമ്പോൾ ലഭിക്കുന്ന മൊത്തം നേട്ടം 23,79,657 ലക്ഷം രൂപയാണ്.

സുകന്യ സമൃദ്ധി യോജനയിൽ ഇതുപോലെ പ്രതിമാസം 5,000 രൂപ എന്ന കണക്കിൽ നിക്ഷേപിച്ചാൽ ഒരു വർഷം കൊണ്ട് 60,000 രൂപ നിക്ഷേപത്തിലേക്ക് എത്തുന്നു. 15 വർഷം കൊണ്ട് ഇത് 9 ലക്ഷമായിരിക്കും. ഇവിടെ പ്രതിവർഷം 8.2% പലിശ നിരക്ക് കണക്കാക്കിയാൽ 15 വർഷം കൊണ്ട് ലഭിക്കുന്ന പലിശ വരുമാനം 18,71,031 രൂപയാണ്. അതായത് കാലാവധി പൂർത്തിയാകുമ്പോൾ ലഭിക്കുന്ന മൊത്തം നേട്ടം 27.73 ലക്ഷം രൂപയായിരിക്കും.

നിങ്ങൾ വിപണിയിലെ അപകട സാധ്യതകളെ ഭയപ്പെടാതെ വലിയ തുക ലക്ഷ്യം കാണുന്നുണ്ടെങ്കിൽ എസ്ഐപിയിൽ ദീർഘകാലം നിക്ഷേപിച്ച് സമ്പാദിക്കാം. എന്നാൽ നികുതി ആനുകൂല്യങ്ങളോടെ സുരക്ഷിതമായി സമ്പാദിക്കാൻ ആ​ഗ്രഹിക്കുന്നവർക്ക് സുകന്യ സമൃദ്ധി യോജനയാണ് ഉചിതം.