സോവറിൻ ഗോൾഡ് ബോണ്ട്: യൂണിറ്റൊന്നിന് 14,167 രൂപ; ഇന്ന് പണം അക്കൗണ്ടിലെത്തും, അറിയേണ്ടതെല്ലാം

സോവറിൻ ഗോൾഡ് ബോണ്ട് (SGB) 2021–22 സിരീസ് VII-ന്റെ കാലാവധിക്ക് മുമ്പുള്ള പണം പിൻവലിക്കലിന് (പ്രീ-മെച്യൂർ റിഡംപ്ഷൻ) ഇന്നു (2026 നവംബർ 2, തിങ്കൾ) അവസരം. യൂണിറ്റൊന്നിന് 14,167 രൂപയാണ് റിസർവ് ബാങ്ക് ഓഫ് ഇന്ത്യ (ആർബിഐ) റിഡംപ്ഷൻ വിലയായി നിശ്ചയിച്ചിരിക്കുന്നത്. മുൻകൂട്ടി അപേക്ഷ നൽകിയ നിക്ഷേപകർക്കാണ് ഈ തുക ലഭിക്കുക. നിക്ഷേപകർ ബോണ്ട് വാങ്ങിയ ഇടനിലക്കാർ വഴിയാണ് തുക അക്കൗണ്ടിലെത്തുക. അപേക്ഷ സമർപ്പിക്കാൻ സാധിക്കാത്തവർ ഇനി അടുത്ത അവസരത്തിനായി കാത്തിരിക്കേണ്ടി വരും. സ്വര്‍ണവിലയിലെ മാറ്റങ്ങളും ആർബിഐയുടെ നിലവിലെ മാനദണ്ഡങ്ങളും അടിസ്ഥാനമാക്കിയാണ് റിഡംപ്ഷൻ തുക നിശ്ചയിച്ചിരിക്കുന്നത്.

ഇന്ത്യ ബുള്ളിയൻ ആൻഡ് ജ്വല്ലേഴ്സ് അസോസിയേഷൻ (IBJA) പ്രസിദ്ധീകരിക്കുന്ന 999 പരിശുദ്ധിയുള്ള സ്വർണത്തിന്റെ അവസാന മൂന്ന് ദിവസത്തെ ശരാശരി ക്ലോസിംഗ് വില അടിസ്ഥാനമാക്കിയാണ് ആർബിഐ റിഡംപ്ഷൻ നിരക്ക് കണക്കാക്കുന്നത്. ഈ സിരീസിന്റെ നിരക്ക് 2026 ഒക്ടോബർ 30-നാണ് പ്രഖ്യാപിച്ചത്. ഡിമാറ്റ്, ബാങ്ക് അക്കൗണ്ടുകൾ വഴിയുള്ള അപേക്ഷകൾ സമർപ്പിക്കാനുള്ള അവസാന തീയതി 2026 ഒക്ടോബർ 23 ആയിരുന്നു. ഈ സമയപരിധിക്കുള്ളിൽ അപേക്ഷിച്ചവരുടെ അക്കൗണ്ടുകളിലേക്കാവും ഇന്ന് തുക എത്തുക.

SGB 2021–22 സിരീസ് VII: റിഡംപ്ഷൻ തുകയും പണം അക്കൗണ്ടിലെത്തുന്ന രീതിയും

നിങ്ങൾ ഏത് രീതിയിലാണ് ബോണ്ട് കൈവശം വെച്ചിരിക്കുന്നത് എന്നതിനെ ആശ്രയിച്ചായിരിക്കും പണം അക്കൗണ്ടിലേക്ക് വരുന്നത്. ഡിമാറ്റ് അക്കൗണ്ട് ഉടമകൾക്ക് എൻഎസ്ഡിഎൽ (NSDL) അല്ലെങ്കിൽ സിഡിഎസ്എൽ (CDSL) വഴി ബന്ധപ്പെട്ട ഡിപ്പോസിറ്ററി പാർട്ടിസിപ്പന്റുകൾ വഴിയാണ് തുക ലഭിക്കുക. ആർബിഐ റീട്ടെയിൽ ഡയറക്ട് (RBI Retail Direct) ഉപയോക്താക്കൾക്ക് ലിങ്ക് ചെയ്ത ബാങ്ക് അക്കൗണ്ടിലേക്ക് നേരിട്ട് തുകയെത്തും. ബാങ്ക് അല്ലെങ്കിൽ പോസ്റ്റ് ഓഫീസ് വഴി സർട്ടിഫിക്കറ്റായി ബോണ്ട് വാങ്ങിയവർക്ക് ആ സ്ഥാപനങ്ങൾ വഴിയാകും തുക കൈമാറുക. റിഡംപ്ഷൻ തീയതിയിൽ തന്നെ പണം അയക്കുമെങ്കിലും, ബാങ്ക് വിവരങ്ങളിലെ പൊരുത്തക്കേടുകളോ ബോണ്ടിന്മേലുള്ള ബാധ്യതകളോ (lien) ഉണ്ടെങ്കിൽ പണം അക്കൗണ്ടിലെത്താൻ വൈകിയേക്കാം.

SGB നികുതി വ്യവസ്ഥകൾ: ഈ സാമ്പത്തിക വർഷം മുതൽ വന്ന മാറ്റങ്ങൾ

2026 ഏപ്രിൽ 1 മുതൽ സോവറിൻ ഗോൾഡ് ബോണ്ടുകളുടെ കാലാവധി പൂർത്തിയാകുന്നതിന് മുമ്പുള്ള റിഡംപ്ഷന് മൂലധന ലാഭ നികുതി (Capital Gains Tax) ബാധകമാണ്. ബോണ്ട് ഇഷ്യൂ ചെയ്യുമ്പോൾ തന്നെ വാങ്ങി, 8 വർഷത്തെ കാലാവധി പൂർത്തിയാക്കുന്നവർക്ക് മാത്രമേ നിലവിൽ പൂർണ്ണ നികുതി ഇളവ് ലഭിക്കൂ എന്ന് ബജറ്റ് രേഖകളും സാമ്പത്തിക വിദഗ്ധരും വ്യക്തമാക്കുന്നുണ്ട്. ബോണ്ടിൽ നിന്ന് ലഭിക്കുന്ന പ്രതിവർഷ 2.5 ശതമാനം പലിശയ്ക്ക് നിങ്ങളുടെ ടാക്സ് സ്ലാബ് അനുസരിച്ച് നികുതി നൽകണം (സാധാരണയായി ടിഡിഎസ് ഈടാക്കാറില്ല). സെക്കൻഡറി മാർക്കറ്റ് വഴിയുള്ള വിൽപ്പനയ്ക്കും നികുതി ബാധകമാണ്; എന്നാൽ നിയമങ്ങൾക്കനുസൃതമായി ഇൻഡക്സേഷൻ ആനുകൂല്യത്തോടെയുള്ള ലോങ് ടേം ക്യാപിറ്റൽ ഗെയിൻസ് ആനുകൂല്യം ലഭിച്ചേക്കാം.

അടുത്ത റിഡംപ്ഷൻ വിൻഡോ എന്ന്? അപേക്ഷിക്കേണ്ടത് എങ്ങനെ?

ഈ സിരീസിന്റെ അടുത്ത റിഡംപ്ഷൻ അവസരം അടുത്ത പലിശ വിതരണ തീയതിയായ 2027 മേയ് 2-നാണ് വരുന്നത്. ഡിമാറ്റ് അക്കൗണ്ടുള്ളവർ ബ്രോക്കർ വഴിയോ ഡിപ്പോസിറ്ററി പാർട്ടിസിപ്പന്റ് വഴിയോ വേണം അപേക്ഷ നൽകാൻ. ഫിസിക്കൽ സർട്ടിഫിക്കറ്റുള്ളവർ അതത് ബാങ്ക്, പോസ്റ്റ് ഓഫീസ് എന്നിവ വഴിയോ ആർബിഐ റീട്ടെയിൽ ഡയറക്ട് പോർട്ടൽ വഴിയോ അപേക്ഷിക്കണം. അപേക്ഷിക്കാനുള്ള അവസാന തീയതികൾ ശ്രദ്ധിക്കുകയും ബോണ്ടിൽ പ്ലെഡ്ജ് (pledge) അല്ലെങ്കിൽ ബാധ്യതകൾ ഒന്നുമില്ലെന്ന് ഉറപ്പുവരുത്തുകയും വേണം. നിങ്ങളുടെ സാമ്പത്തിക ആവശ്യങ്ങളും സ്വർണ നിക്ഷേപ രീതികളും കണക്കിലെടുത്ത് ബോണ്ട് തുടരണോ അതോ പിൻവലിക്കണോ എന്ന് തീരുമാനിക്കാവുന്നതാണ്.