ഡിസംബർ 31നുള്ളിൽ നിക്ഷേപിക്കാൻ റെഡിയാണോ? ഉയർന്ന പലിശയുള്ള ഈ പ്രത്യേക എഫ്.ഡിയിൽ നിക്ഷേപിക്കാം

നിങ്ങളുടെ സ്ഥിര നിക്ഷേപങ്ങൾ ഏത് ബാങ്കിലാണ്? പഞ്ചാബ് ആൻഡ് സിന്ദ് ബാങ്കും ഐ.ഡി.ബി.ഐ ബാങ്കും ഉയർന്ന പലിശ നിരക്കുള്ള പ്രത്യേക എഫ്.ഡികൾ വാ​ഗ്ദാനം ചെയ്യുന്നു. എന്നാൽ ഇതിന്റെ കാലാവധി 2024 ഡിസംബർ 31 വരെയാണ്. ഉയർന്ന പലിശ നിരക്കുള്ള സ്ഥിര നിക്ഷേപങ്ങൾ തിരയുന്നവർക്ക് ഈ സ്കീമുകൾ നല്ലതായിരിക്കും. ഡിസംബർ 31നുള്ളിൽ ഈ സ്ഥിര നിക്ഷേപത്തിൽ ചേർന്നാൽ പ്രത്യേക ആനുകൂല്യങ്ങളും ഉറപ്പാക്കാം.

ഐ.ഡി.ബി.ഐ ബാങ്കിൻ്റെ പ്രത്യേക എഫ്ഡി

ഐ.ഡി.ബി.ഐ ബാങ്ക് നൽകുന്ന പ്രത്യേക എഫ്.ഡിയിൽ ചേർന്നാൽ ഉയർന്ന പലിശ ഉറപ്പാക്കാം. അതായത് പ്രത്യേക എഫ്.ഡികളായ 300 ദിവസം, 375 ദിവസം, 444 ദിവസം, 700 ദിവസം എന്നിവയാണ് ഉയർന്ന പലിശ നൽകുന്നത്. ഈ കാലാവധിയുള്ള എഫ്.ഡികളിൽ നിക്ഷേപിക്കാനുള്ള അവസാന തീയതി 2024 ഡിസംബർ 31 ആണ്. അതിനു മുന്നേ ഈ സ്കീമിന്റെ ഭാ​ഗമാവാം.

300 ദിവസം, 375 ദിവസം, 444 ദിവസം, 700 ദിവസം എന്നീ കാലാവധിയിൽ സാധാരണ ജനങ്ങൾക്ക് യഥാക്രമം 7.05%, 7.25%, 7.35%, 7.20% എന്നീ നിരക്കിലാണ് പലിശ നൽകുന്നത്. ഇതേ കാലാവധിയിൽ മുതിർന്ന പൗരന്മാർക്ക് യഥാക്രമം 7.55%, 7.75%, 7.85%, 7.70% എന്നിവയാണ് പലിശ ഉറപ്പാക്കുന്നത്. സാധാരണ എഫ്.ഡിയേക്കാൾ ഉയർന്ന പലിശയാണ് ഈ പ്രത്യേക എഫ്.ഡി നൽകുന്നത്.

ഐ.ഡി.ബി.ഐ ബാങ്കിന്റെ പ്രത്യേക എഫ്.ഡിയുടെ നിബന്ധനകളും വ്യവസ്ഥകളും

• NRE നിക്ഷേപങ്ങൾക്ക് 300 ദിവസത്തെ കാലാവധി ബാധകമല്ല.

• കാലാവധിക്കു മുന്നേ പിൻവലിക്കൽ / അടച്ചുപൂട്ടൽ എന്നിവ അനുവദനീയമാണ്.

• സ്റ്റാഫ്, സീനിയർ സിറ്റിസൺ നിരക്കുകൾ NRO, NRE ടേം ഡെപ്പോസിറ്റുകൾക്ക് ബാധകമല്ല.

• ടേം ഡെപ്പോസിറ്റിൻ്റെ മറ്റെല്ലാ സവിശേഷതകളും നിബന്ധനകളും വ്യവസ്ഥകളും മാറ്റമില്ലാതെ തുടരും.

പഞ്ചാബ് & സിന്ദ് ബാങ്ക് പ്രത്യേക എഫ്ഡി

പഞ്ചാബ് & സിന്ദ് ബാങ്ക് വ്യത്യസ്ത കാലയളവുകളുള്ള പ്രത്യേക എഫ്.ഡികൾ വാഗ്ദാനം ചെയ്യുന്നു. ഈ നിക്ഷേപങ്ങളിൽ ചേരുന്നതിനുള്ള അവസാന തീയതി 2024 ഡിസംബർ 31 ആണ്.

222 ദിവസത്തെ ദൈർഘ്യമുള്ള പ്രത്യേക എഫ്.ഡിയ്ക്ക് 6.30% നിരക്കിലാണ് പലിശ വാഗ്ദാനം ചെയ്യുന്നത്. 333 ദിവസത്തെ കാലാവധിയുള്ള പ്രത്യേക നിക്ഷേപങ്ങൾക്ക് 7.20% നിരക്കിലാണ് പലിശ നൽകുന്നത്. 444 ദിവസത്തെ കാലാവധിയിൽ 7.30% പലിശയാണ് ഈ ബാങ്ക് വാഗ്ദാനം ചെയ്യുന്നത്.

555 ദിവസത്തെ കോളബിൾ ഡെപ്പോസിറ്റിന് ബാങ്ക് 7.45% എന്ന നിരക്കിലാണ് പലിശ വാഗ്ദാനം ചെയ്യുന്നത്. 777 ദിവസത്തെ പ്രത്യേക എഫ്.ഡിയ്ക്ക് 7.25% പലിശനിരക്കും 999 ദിവസത്തെ കോളബിൾ ഡെപ്പോസിറ്റുകൾക്ക് 6.65% പലിശനിരക്കുമാണ് ബാങ്ക് വാ​ഗ്ദാനം ചെയ്യുന്നത്.

മുതിർന്ന പൗരൻമാർക്കുള്ള പലിശ നിരക്ക്

മുതിർന്ന പൗരന്മാർക്ക് 3 കോടി രൂപയിൽ താഴെയുള്ള ടേം ഡെപ്പോസിറ്റുകളിൽ 0.50% അധിക പലിശ ലഭിക്കും. 555 ദിവസത്തെ കാലാവധിയുള്ള കോളബിൾ ഡെപ്പോസിറ്റുകൾക്ക് 4% മുതൽ 7.95% വരെയാണ് ബാങ്ക് പലിശ നിരക്ക് വാഗ്ദാനം ചെയ്യുന്നത്.

സൂപ്പർ സീനിയർ സിറ്റിസൺസ് എഫ്.ഡി നിരക്കുകൾ

80 വയസ്സും അതിനു മുകളിലുമുള്ള സൂപ്പർ സീനിയർ സിറ്റിസൺസിന് 222 ദിവസം, 333 ദിവസം, 444 ദിവസം, 555 ദിവസം, 777 ദിവസം, 999 ദിവസം എന്നീ കാലാവധിയുള്ള എഫ്.ഡികൾക്ക് 0.15% അധിക പലിശ ലഭിക്കും. 555 ദിവസത്തെ കാലാവധിയുള്ള എഫ്.ഡിയ്ക്ക് 8.10% എന്ന ഉയർന്ന പലിശ നിരക്കാണ് സൂപ്പർ സീനിയർ സിറ്റിസൺസിന് ഈ ബാങ്ക് വാ​ഗ്ദാനം ചെയ്യുന്നത്.