8.2% പലിശ നിരക്കിൽ ലക്ഷങ്ങൾ സമ്പാദിക്കാം; പെൺമക്കൾക്കുള്ള മികച്ച സ്കീം ഇതാണ്

ഈ ശിശുദിനത്തിൽ നിങ്ങളുടെ കുട്ടികൾക്ക് സാമ്പത്തിക സുരക്ഷയൊരുക്കാം. നിലവിൽ നമുക്ക് ചുറ്റും നിരവധി നിക്ഷേപ പദ്ധതികളുണ്ട്. പലരും പല സാമ്പത്തിക നേട്ടം ലക്ഷ്യം വെച്ചു കൊണ്ടായിരിക്കും ഇത്തരം നിക്ഷേപങ്ങളുടെ ഭാ​ഗമാവുന്നത്. എന്നാൽ പ്രായപൂർത്തിയാകാത്ത കുട്ടികളുടെ സുരക്ഷയും പ്രധാനമാണ്. വിദ്യാഭ്യാസം, ആരോ​ഗ്യം തുടങ്ങി വിവിധ ആവശ്യങ്ങൾക്കായി നിക്ഷേപം ആരംഭിക്കാം. എന്നാൽ പെൺകുട്ടികൾക്ക് മാത്രമായി സാമ്പത്തിക സുരക്ഷയൊരുക്കാം. അതിനാണ് സുകന്യ സമൃദ്ധി യോജന.

സുകന്യ സമൃദ്ധി യോജന

ഇന്ത്യയിലെ ഏത് മാതാപിതാക്കൾക്കും 10 വയസ്സിൽ താഴെയുള്ള പെൺമക്കൾക്കായി സുകന്യ സമൃദ്ധി യോജനയിൽ നിക്ഷേപം ആരംഭിക്കാം. നിലവിൽ 8.2% ശതമാനം പലിശയാണ് ഈ പദ്ധതി ഉറപ്പ് നൽകുന്നത്. എന്നാൽ നിക്ഷേപത്തിന് പരിധിയുണ്ട്. പ്രതിവർഷം കുറഞ്ഞത് 250 രൂപയും പരമാവധി 1.50 ലക്ഷം രൂപയും നിങ്ങൾക്ക് നിക്ഷേപിക്കാം. ഈ പദ്ധതി പ്രകാരം 15 വർഷം വരെ നിങ്ങൾക്ക് നിക്ഷേപിക്കാം. എന്നാൽ ഇത് പെൺകുട്ടികൾക്ക് മാത്രമുള്ള സ്കീം ആണ്.

അതായത് മകൾക്ക് 21 വയസ്സാവുമ്പോൾ ഈ നിക്ഷേപത്തിന്റെ കാലാവധി പൂർത്തിയാവും. ഏറ്റവും കുറ‍ഞ്ഞ വയസ്സിൽ തന്നെ നിക്ഷേപം ആരംഭിച്ചാൽ വേ​ഗം തന്നെ കാലാവധി പൂർത്തിയാവുകയും ആ തുക പെട്ടെന്ന് തന്നെ ഉപയോ​ഗിക്കാനും സാധിക്കും.

ജനന സമയത്ത് ആരംഭിക്കാം....

ജനിച്ച സമയം മുതൽ സുകന്യ സമൃദ്ധി യോജനയിൽ നിക്ഷേപിക്കാം. എങ്കിൽ നിങ്ങളുടെ മകൾക്ക് 21 വയസ്സ് പൂർത്തിയാവുമ്പോൾ വലിയൊരു തുക ഉറപ്പായും ലഭിക്കും. 1000, 2000, 3000, 5000 എന്നീ തുകകൾ നിങ്ങൾക്ക് സുകന്യ സമൃദ്ധിയിൽ നിക്ഷേപിക്കാം. ഈ തുകകൾ നിക്ഷേപിക്കുന്നതിലൂടെ കാലാവധി പൂർത്തിയാകുന്നതുവരെ നിങ്ങൾക്ക് എത്ര ലാഭം കിട്ടുമെന്ന് പരിശോധിക്കാം.

 

• 1000 രൂപ നിക്ഷേപിച്ചാൽ എത്ര കിട്ടും?

ഈ സ്കീമിൽ പ്രതിമാസം 1000 രൂപ നിക്ഷേപിച്ചാൽ പ്രതിവർഷം 12,000 രൂപയാവും. സ്കീമിന്റെ കാലാവധി പൂർത്തിയാമ്പോൾ നിങ്ങൾ മൊത്തം 1,80,000 രൂപ നിക്ഷേപിച്ചിട്ടുണ്ടാവും. പലിശ മാത്രം 3,74,206 രൂപ നിങ്ങൾക്ക് ലഭിക്കും. ഇതേ പലിശ നിരക്കോടെ കാലാവധി പൂർത്തിയാവുമ്പോൾ മൊത്തം തുകയായി 5,54,206 രൂപ നേടാനും സാധിക്കും.

• 2000 രൂപ നിക്ഷേപിച്ചാൽ എത്ര ലാഭം കിട്ടും?

സുകന്യ സമൃദ്ധി യോജനയിൽ നിങ്ങളുടെ പെൺമക്കൾക്കു വേണ്ടി പ്രതിമാസം 2000 രൂപ നിക്ഷേപിച്ചാൽ ഒരു വർഷത്തേക്ക് നിങ്ങളുടെ നിക്ഷേപ തുക 24,000 രൂപയാവും. മൊത്തം നിക്ഷേപം 3,60,000 രൂപയും പലിശ വരുമാനം 7,48,412 രൂപയും ആയിരിക്കും. അങ്ങനെയെങ്കിൽ കാലാവധി പൂർത്തിയാകുമ്പോൾ ആകെ തുക 11,08,412 രൂപയായിരിക്കും.

• 3000 രൂപ നിക്ഷേപിച്ചാൽ ?

പ്രതിമാസം സുകന്യ സമൃദ്ധി യോജനയിൽ ഓരോ മാസവും 3000 രൂപ നിക്ഷേപിച്ചാൽ ഒരു വർഷത്തേക്ക് 36,000 രൂപ നിങ്ങൾ നിക്ഷേപിക്കും. അപ്പോൾ നിങ്ങളുടെ മൊത്തം നിക്ഷേപം 5,40,000 രൂപയായിരിക്കും. 11,22,619 രൂപ മാത്രം പലിശയിനത്തിൽ കണക്കാക്കും. എങ്കിൽ കാലാവധി പൂർത്തിയാകുമ്പോൾ നിങ്ങൾക്ക് ലഭിക്കുന്ന ആകെ തുക 16,62,619 രൂപയായിരിക്കും.

• 4000 രൂപ നിക്ഷേപിച്ചാൽ?

സുകന്യ സമൃദ്ധി യോജനയിൽ 4000 രൂപ പ്രതിമാസം നിക്ഷേപിക്കാം. എങ്കിൽ പ്രതിവർഷം 48,000 രൂപയാവും നിങ്ങളുടെ നിക്ഷേപം. 15 വർഷത്തിനുള്ളിൽ മൊത്തം നിക്ഷേപം 7,20,000 രൂപയാകും. ഇതിൽ പലിശ മാത്രം 14,96,825 രൂപയായിരിക്കും. കാലാവധി പൂർത്തിയാകുമ്പോൾ, മൊത്തം 22,16,825 രൂപ മകളുടെ ഭാവി സുരക്ഷിതമാക്കാൻ ലഭിക്കും.

• 5000 രൂപ നിക്ഷേപിച്ചാൽ എത്ര ലാഭം നേടാം?

പ്രതിമാസം 5000 രൂപ നിക്ഷേപിച്ചാൽ ഓരോ വർഷവും 60,000 രൂപയാകും നിക്ഷേപം. എങ്കിൽ 15 വർഷം കൊണ്ടുള്ള നിങ്ങളുടെ നിക്ഷേപം 9,00,000 രൂപയാവും. ഈ നിക്ഷേപത്തിലൂടെ 18,71,031 രൂപ പലിശ ഉറപ്പാക്കാം. മാത്രമല്ല കാലാവധി പൂർത്തിയാകുമ്പോൾ മൊത്തം തുകയായി 27,71,031 രൂപയും ലഭിക്കും.