പൂജ്യത്തിൽ നിന്ന് തുടങ്ങാം; ക്രെഡിറ്റ് ചരിത്രവും സ്കോറും നിർമ്മിക്കാനുള്ള ലളിതമായ വഴികൾ

ക്രെഡിറ്റ് കാർഡിനോ ഏതെങ്കിലും തരത്തിലുള്ള വായ്പകൾക്കോ അപേക്ഷിക്കുമ്പോൾ പലരും നേരിടുന്ന പ്രധാന പ്രശ്നമാണ് ക്രെഡിറ്റ് ചരിത്രമില്ലാത്തതിനാൽ അവരുടെ അപേക്ഷകൾ നിരസിക്കപ്പടുന്നത്. മുൻപ് വായ്പ തിരിച്ചടവുകൾ മുടക്കിയിട്ടില്ലെങ്കിൽ പോലും ഈ പ്രശ്നമുണ്ടാകാൻ സാധ്യതയുണ്ട്. വായ്പ എടുക്കന്നയാൾക്ക് ഉത്തരവാദിത്തത്തോടെ പണം തിരിച്ചടയ്ക്കാൻ കഴിയുമോ എന്നത് പരിശോധിക്കുന്നതിനാണ് വായ്പ ദാതക്കൾ മുൻകാല വായ്പാ പെരുമാറ്റരീതി പരിശോധിക്കുന്നത്. ഇത് വ്യക്തമാക്കുന്ന രേഖകളില്ലാതെ അപകടസാധ്യത വിലയിരുത്താൻ അവർക്ക് ബുദ്ധിമുട്ടായിരിക്കും. 

കടം വാങ്ങിയ പണം ഒരാൾ എങ്ങനെ കൈകാര്യം ചെയ്യുന്നു എന്നതിന്റെ സാമ്പത്തിക രേഖ പോലെയാണ് ക്രെഡിറ്റ് ചരിത്രം പ്രവർത്തിക്കുന്നത്. വായ്പകൾ, ക്രെഡിറ്റ് കാർഡുകൾ, തിരിച്ചടവ് രീതികൾ എന്നിവയെക്കുറിച്ചുള്ള വിവരങ്ങൾ ഇതിൽ ഉൾപ്പെടുന്നു. ഒരു വ്യക്തി മുമ്പ് ഒരിക്കലും ക്രെഡിറ്റ് ഉപയോഗിച്ചിട്ടില്ലെങ്കിൽ, ചെറുതും കൈകാര്യം ചെയ്യാവുന്നതുമായ വായ്പകളിലൂടെ ആ റെക്കോർഡ് പതുക്കെ നിർമ്മിക്കുക എന്നതാണ് ആദ്യപടി.

തുടക്കക്കാർക്ക്, അടിസ്ഥാന ക്രെഡിറ്റ് കാർഡ് അല്ലെങ്കിൽ സ്ഥിര നിക്ഷേപത്തിന്റെ പിന്തുണയുള്ള സുരക്ഷിത ക്രെഡിറ്റ് കാർഡ് പോലുള്ള ലളിതമായ ക്രെഡിറ്റ് ഉത്പന്നങ്ങൾ ഉപയോഗിച്ച് ക്രെഡിറ്റ് ചരിത്രം നിർമ്മിച്ചു തുടങ്ങാമെന്ന് സാമ്പത്തിക വിദഗ്ധർ അഭിപ്രായപ്പെടുന്നു. ഇത്തരം കാർഡുകൾ സാധാരണയായി കുറഞ്ഞ പരിധികളോടെയാണ് വരുന്നത്, ഇത് ആദ്യമായി ഉപയോക്താക്കൾക്ക് അംഗീകാരം ലഭിക്കുന്നത് എളുപ്പമാക്കുന്നു. വലിയ തുകകൾ കടം വാങ്ങുകയല്ല, മറിച്ച് തിരിച്ചടവുകളുടെ ഒരു റെക്കോർഡ് സൃഷ്ടിക്കാൻ തുടങ്ങുക എന്നതാണ് ലക്ഷ്യം.

പലചരക്ക് സാധനങ്ങൾ, ഇന്ധനം, യൂട്ടിലിറ്റി പേയ്‌മെന്റുകൾ തുടങ്ങിയ ചെറിയ ചെലവുകൾക്കായി ഇടയ്ക്കിടെ കാർഡ് ഉപയോഗിക്കുന്നത് ക്രെഡിറ്റ് വർദ്ധിപ്പിക്കാൻ സഹായിക്കും. ഏറ്റവും പ്രധാനപ്പെട്ട കാര്യം നിശ്ചിത തീയതിക്ക് മുമ്പ് മുഴുവൻ ബില്ലും കൃത്യസമയത്ത് അടയ്ക്കുക എന്നതാണ്. സ്ഥിരവും സമയബന്ധിതവുമായ തിരിച്ചടവുകൾ ക്രമേണ വായ്പ നൽകുന്നവരുമായുള്ള വിശ്വാസം വളർത്തുകയും കടം വാങ്ങുന്നയാളുടെ ക്രെഡിറ്റ് പ്രൊഫൈൽ മെച്ചപ്പെടുത്തുകയും ചെയ്യുന്നു.

മറ്റൊരു പ്രധാന ശീലം മുഴുവൻ ക്രെഡിറ്റ് പരിധിയും ഉപയോഗിക്കുന്നത് ഒഴിവാക്കുക എന്നതാണ്. ലഭ്യമായ പരിധിയുടെ ഏകദേശം 30 ശതമാനത്തിൽ താഴെ ക്രെഡിറ്റ് ഉപയോഗം നിലനിർത്താൻ സാമ്പത്തിക ഉപദേഷ്ടാക്കൾ പലപ്പോഴും ശുപാർശ ചെയ്യുന്നു. കടം വാങ്ങുന്നയാൾക്ക് ക്രെഡിറ്റ് ലഭ്യമാണെന്നും എന്നാൽ അതിനെ വളരെയധികം ആശ്രയിക്കുന്നില്ലെന്നും ഇത് വായ്പ നൽകുന്നവരെ കാണിക്കുന്നു. 

എല്ലാ പേയ്‌മെന്റുകളും ശരിയായി രേഖപ്പെടുത്തിയിട്ടുണ്ടെന്നും പിഴവുകളില്ലെന്നും ഉറപ്പാക്കാൻ ഇടയ്ക്കിടെ ക്രെഡിറ്റ് റിപ്പോർട്ടുകൾ പരിശോധിക്കുന്നതും ഉപയോഗപ്രദമാണ്. കാലക്രമേണ, സ്ഥിരമായ തിരിച്ചടവ് പെരുമാറ്റം ശക്തമായ ഒരു ക്രെഡിറ്റ് ചരിത്രം കെട്ടിപ്പടുക്കാൻ സഹായിക്കും, ഇത് ഭാവിയിൽ വലിയ വായ്പകൾക്കും മികച്ച സാമ്പത്തിക ഉൽപ്പന്നങ്ങൾക്കും യോഗ്യത നേടുന്നത് എളുപ്പമാക്കുന്നു.