ഓണം ബമ്പർ അടിച്ചില്ലേ..? വിഷമിക്കേണ്ട, ലക്ഷങ്ങൾ സമ്പാദിക്കാൻ വേറെയും വഴിയുണ്ട്, നികുതി ഇളവും ലഭിക്കും

ഓണം ബമ്പർ ലോട്ടറി എടുത്ത് ഭാഗ്യം പരീക്ഷിച്ചവരാണോ നിങ്ങൾ..? എന്നാൽ സമ്മാനം ലഭിച്ചില്ലെങ്കിലും സങ്കടപ്പെടേണ്ട കാര്യമില്ല. കാരണം ലക്ഷങ്ങൾ സമ്പാദിക്കാൻ നിരവധി നിക്ഷേപ പദ്ധതികൾ ഇന്ന് വിപണിയിലുണ്ട്. കൃത്യമായി നിക്ഷേപം നടത്തിയാൽ ഭാവിയിൽ സാമ്പത്തിക ഭദ്രത കൈവരിക്കാൻ ഈ നിക്ഷേപങ്ങൾ സഹായിക്കും. അതിൽ ഏറ്റവും സുരക്ഷിതവും ബാങ്ക് സ്ഥിര നിക്ഷേപത്തേക്കാൾ പലിശയും നൽകുന്ന പദ്ധതികളുണ്ട്.

ഇന്ത്യയിലെ യാഥാസ്ഥിതിക നിക്ഷേപകർ എപ്പോഴും ഇഷ്ടപ്പെടുന്ന ഒരു തിരഞ്ഞെടുപ്പാണ് ചെറുകിട സമ്പാദ്യ പദ്ധതികൾ. 2025-26 സാമ്പത്തിക വർഷത്തിന്‍റെ മൂന്നാം പാദത്തിൽ നിരവധി ചെറുകിട സമ്പാദ്യ പദ്ധതികളുടെ പലിശ നിരക്കുകൾ മാറ്റമില്ലാതെ തുടരുമെന്ന് ധനകാര്യ മന്ത്രാലയം പ്രഖ്യാപിച്ചു . 2025 ഒക്ടോബർ മുതൽ ഡിസംബർ വരെ മുൻ പാദത്തിലെ അതേ വരുമാനം നിക്ഷേപകർക്ക് തുടർന്നും ലഭിക്കും. പബ്ലിക് പ്രൊവിഡന്റ് ഫണ്ട് (പിപിഎഫ്) അല്ലെങ്കിൽ നാഷണൽ സേവിംഗ്സ് സർട്ടിഫിക്കറ്റ് (എൻഎസ്‌സി) ഏറ്റവും ഉയർന്ന പലിശ വാഗ്ദാനം ചെയ്യുമെന്ന് പലരും പ്രതീക്ഷിക്കുമെങ്കിലും യഥാർത്ഥത്തിൽ പട്ടികയിൽ ഒന്നാമത് നിൽക്കുന്നത് സുകന്യ സമൃദ്ധി യോജനയാണ്.

പ്രധാന സവിശേഷതകൾ

മകളുടെ ഭാവി സുരക്ഷിതമാക്കുന്നതിനുള്ള വിശ്വസനീയമായ മാർഗമാണ് സുകന്യ സമൃദ്ധി യോജന (SSY). കുറഞ്ഞത് 250 രൂപയും പരമാവധി 1.5 ലക്ഷം രൂപയും വാർഷിക നിക്ഷേപമുണ്ടെങ്കിൽ, പോസ്റ്റ് ഓഫീസുകളിലോ എസ്‌ബി‌ഐ, എച്ച്‌ഡി‌എഫ്‌സി ബാങ്ക്, ഐ‌സി‌ഐ‌സി‌ഐ ബാങ്ക് പോലുള്ള അംഗീകൃത ബാങ്കുകളിലോ അക്കൗണ്ടുകൾ തുറക്കാം. ഉന്നത വിദ്യാഭ്യാസത്തിനായി പണം പിൻവലിക്കൽ അനുവദനീയമാണ്, പെൺകുട്ടി 18 വയസ്സ് തികഞ്ഞതിനുശേഷം വിവാഹിതയായാൽ അകാലത്തിൽ നിക്ഷേപം അവസാനിപ്പിക്കാൻ സാധിക്കും. ഇന്ത്യയിലെവിടെയും അക്കൗണ്ടുകൾ മാറ്റാനും കഴിയും. കൂടാതെ പദ്ധതി ആരംഭിച്ച് 21 വർഷത്തിനുള്ളിൽ കാലാവധി പൂർത്തിയാകുകയും ചെയ്യും.

ഏറ്റവും ഉയർന്ന പലിശ

എല്ലാ ചെറുകിട സമ്പാദ്യ പദ്ധതികളിലും സുകന്യ സമൃദ്ധി യോജന ആണ് ഏറ്റവും ഉയർന്ന പലിശ നിരക്ക് വാഗ്ധാനം ചെയ്യുന്നത്. പിപിഎഫ് അക്കൗണ്ട് 7.1% വാഗ്ദാനം ചെയ്യുന്നുണ്ട്. അതേസമയം എൻ‌എസ്‌സി 7.7% നൽകുന്നു. എന്നാൽ സുകന്യ സമൃദ്ധി യോജന 8.20 ശതമാനം പലിശ നൽകുന്നു.

നികുതി ആനുകൂല്യങ്ങൾ

പദ്ധതി ഇഇഇ (എക്സംപ്റ്റ്-എക്സംപ്റ്റ്-എക്സംപ്റ്റ്) വിഭാഗത്തിൽ പെടുന്നു. അതായത് നിക്ഷേപങ്ങൾ, പലിശ നേടൽ, പിൻവലിക്കലുകൾ എന്നിവയെല്ലാം നികുതി രഹിതമാണ്. എസ്‌എസ്‌വൈയിലെ നിക്ഷേപങ്ങൾക്ക് ആദായനികുതി നിയമത്തിലെ സെക്ഷൻ 80 സി പ്രകാരമുള്ള കിഴിവുകളും ലഭിക്കും. 10 വയസ്സിന് താഴെയുള്ള പെൺകുട്ടിയുടെ പേരിൽ ഒരു അക്കൗണ്ട് തുറക്കാൻ അവരുടെ മാതാപിതാക്കൾക്കോ ​​നിയമപരമായ രക്ഷിതാക്കൾക്കോ ​​മാത്രമേ കഴിയൂ. ഇത് പെൺകുട്ടിയുടെ വിദ്യാഭ്യാസത്തിനും ഭാവിക്കും സുരക്ഷിതമാക്കുന്നതിന് പദ്ധതിയെ അനുയോജ്യമാക്കുന്നു.

55 ലക്ഷം സമ്പാദിക്കാം

പ്രതിമാസം 10,000 രൂപ വീതം പദ്ധതിയില്‍ നിക്ഷേപിക്കുകയാണെങ്കില്‍ 15 വര്‍ഷം കൊണ്ട് മൊത്തം നിക്ഷേപം 18 ലക്ഷമാകും. 8.20 ശതമാനം പലിശ കൂടി കൂട്ടുമ്പോള്‍ അക്കൗണ്ടില്‍ 37.42 ലക്ഷം രൂപ ഉണ്ടാവും. അക്കൗണ്ട് തുറന്ന് 21 വര്‍ഷമാകുമ്പോള്‍ പലിശസഹിതം ആകെ 55.42 ലക്ഷം രൂപ സമ്പാദിക്കാം.

അറിയിപ്പ്: ഇവിടെ പ്രകടിപ്പിച്ചിട്ടുള്ള അഭിപ്രായങ്ങളും നിർദ്ദേശങ്ങളും വ്യക്തിഗത വിശകലന വിദഗ്ദ്ധരുടെയോ സ്ഥാപനങ്ങളുടെയോ മാത്രം കാഴ്ചപ്പാടുകളാണ്. ഇത് Goodreturns.in-ന്റെയോ Greenium Information Technologies Private Limited-ന്റെയോ നിലപാടുകളെ പ്രതിഫലിക്കുന്നില്ല. ഈ ഉള്ളടക്കത്തിന്റെ കൃത്യത, പൂർണ്ണത, അല്ലെങ്കിൽ വിശ്വാസ്യത എന്നിവയ്ക്ക് ഞങ്ങൾ യാതൊരു ഉറപ്പും നൽകുന്നില്ല, മാത്രമല്ല അതിന് ഉത്തരവാദിത്തം ഏറ്റെടുക്കുന്നുമില്ല.

ഞങ്ങൾ ഏതെങ്കിലും തരത്തിലുള്ള നിക്ഷേപ ഉപദേശങ്ങൾ നൽകുകയോ, ഓഹരികൾ വാങ്ങാനോ വിൽക്കാനോ ശുപാർശ ചെയ്യുകയോ ചെയ്യുന്നില്ല. ഈ വിവരങ്ങൾ വിജ്ഞാനപ്രദമായ ആവശ്യങ്ങൾക്ക് മാത്രമുള്ളതാണ്. അതിനാൽ, ഏതെങ്കിലും നിക്ഷേപ തീരുമാനങ്ങൾ എടുക്കുന്നതിന് മുൻപ്, ലൈസൻസുള്ള ഒരു സാമ്പത്തിക ഉപദേഷ്ടകനുമായി കൂടിയാലോചിക്കുന്നത് നിർബന്ധമാണ്.