അടുത്ത വ‍ർഷം 7.15% വരെ പലിശ നേടാം, കൈയിലുള്ള കാശ് നിക്ഷേപിക്കാൻ ഏറ്റവും മികച്ച സേവിംഗ്സ് അക്കൗണ്ടുകൾ

റിപ്പോ നിരക്ക്, സാമ്പത്തിക സാഹചര്യങ്ങൾ, ബാങ്കുകളുടെ പണലഭ്യത നില എന്നിവ പോലുള്ള റിസർവ് ബാങ്കിന്റെ ധനനയത്തിലെ ക്രമീകരണങ്ങളാണ് സേവിംഗ്സ് അക്കൗണ്ടിലെയും സ്ഥിര നിക്ഷേപങ്ങളിലെയും പലിശ നിരക്ക് തീരുമാനിക്കുന്നത്. റിസർവ് ബാങ്ക് (ആർ‌ബി‌ഐ) ഡിസംബറിലെ ധനനയത്തിൽ ബെഞ്ച്മാർക്ക് പലിശ നിരക്ക് 4 ശതമാനമാക്കി നിലനി‍ർത്തി. അതിനാൽ ഇത്തവണ ബാങ്കുകളും പലിശ നിരക്ക് കുറച്ചില്ല.

കാശ് എവിടെ നിക്ഷേപിക്കാം?

നിലവിലുള്ള സ്വകാര്യ ബാങ്കുകളുമായും പൊതുമേഖലാ ബാങ്കുകളുമായും താരതമ്യപ്പെടുത്തുമ്പോൾ, ചെറിയതും പുതിയതുമായ ചില സ്വകാര്യ ബാങ്കുകൾ സേവിംഗ്സ് അക്കൗണ്ടുകളിൽ ഉയർന്ന പലിശ വാഗ്ദാനം ചെയ്യുന്നുണ്ട്. നിങ്ങളുടെ പണം ഈ ബാങ്കുകളുടെ സേവിംഗ്സ് അക്കൗണ്ടിൽ നിക്ഷേപിച്ചാൽ ലഭിക്കുന്ന നേട്ടം പരിശോധിക്കാം.

ഉയ‍ർന്ന പലിശ ഈ ബാങ്കുകളിൽ

ബന്ദൻ ബാങ്കും ഐ‌ഡി‌എഫ്‌സി ഫസ്റ്റ് ബാങ്കും സേവിംഗ്സ് അക്കൗണ്ടുകളിൽ യഥാക്രമം 7.15%, 7% വരെ പലിശ നൽകുന്നു. ചെറുകിട ധനകാര്യ ബാങ്കുകളായ എ‌യു സ്‌മോൾ ഫിനാൻസ് ബാങ്ക്, ഉജ്ജീവൻ സ്‌മോൾ ഫിനാൻസ് ബാങ്ക് എന്നിവ യഥാക്രമം 7%, 6.5% വരെ പലിശനിരക്ക് നൽകുന്നു. സ്വകാര്യ, വൻകിട പൊതുമേഖലാ ബാങ്കുകളുമായി താരതമ്യം ചെയ്യുമ്പോൾ ഈ പലിശനിരക്ക് വളരെ കൂടുതലാണ്.

പലിശ കുറഞ്ഞ ബാങ്കുകൾ

എച്ച്ഡിഎഫ്സി ബാങ്കും ഐസിഐസിഐ ബാങ്കും അവരുടെ സേവിംഗ്സ് അക്കൗണ്ടുകൾക്ക് 3 മുതൽ 3.5 ശതമാനം വരെ പലിശ മാത്രമാണ് നൽകുന്നത്. സ്റ്റേറ്റ് ബാങ്ക് ഓഫ് ഇന്ത്യ (എസ്ബിഐ), ബാങ്ക് ഓഫ് ബറോഡ എന്നിവ യഥാക്രമം 2.70 ശതമാനവും 2.75 ശതമാനം പലിശയാണ് സേവിംഗ്സ് അക്കൗണ്ടുകളിൽ വാഗ്ദാനം ചെയ്യുന്നത്.

മിനിമം ബാലൻസ്

സ്വകാര്യ ബാങ്ക് സേവിംഗ്സ് അക്കൗണ്ടുകളിലെ മിനിമം ബാലൻസ് പരിധി 500 രൂപ മുതൽ 10,000 രൂപ വരെയാണ്. പൊതുമേഖലാ ബാങ്കുകളിൽ മിനിമം ബാലൻസ് ഇതിലും കൂടുതലാണ്. ഐ.ഡി.എഫ്.സി ഫസ്റ്റ് ബാങ്കിലെയും ബന്ദൻ ബാങ്കിലെയും ഏറ്റവും കുറഞ്ഞ ബാലൻസ് പരിധി യഥാക്രമം 10,000 രൂപയും 5,000 രൂപയുമാണ്. പ്രമുഖ സ്വകാര്യ ബാങ്കുകളായ ആക്സിസ് ബാങ്ക്, എച്ച്ഡിഎഫ്സി ബാങ്ക് തുടങ്ങിയ ബാങ്കുകളിൽ 2,500 മുതൽ 10,000 രൂപ വരെയാണ് മിനിമം ബാലൻസ് മാനദണ്ഡം.