നിങ്ങൾക്ക് 5 ലക്ഷം രൂപ വരെ സമ്പാദ്യമുണ്ടോ? മികച്ച നേട്ടത്തിന് നിക്ഷേപിക്കേണ്ടത് ഈ നാല് സ്ഥലങ്ങളിൽ

പലിശനിരക്ക് കുറയുകയും ഓഹരി വില തകരുകയും ചെയ്യുമ്പോൾ നിക്ഷേപം നടത്തുന്നത് എല്ലായ്പ്പോഴും കൂടുതൽ ആലോചിച്ച് വേണം. നിങ്ങൾ 1-3 വർഷത്തേക്ക് നിക്ഷേപിക്കാൻ തയ്യാറാണെങ്കിൽ നിരവധി നിക്ഷേപ ഓപ്ഷനുകളുണ്ട്. ഇത്തരത്തിൽ 5 ലക്ഷം രൂപ വരെ നിക്ഷേപിക്കാൻ കഴിയുന്ന നാല് നിക്ഷേപ മാർഗങ്ങളിതാ..

ബജാജ് ഫിനാൻസ് എഫ്ഡി

ബാങ്ക് നിക്ഷേപത്തിന്റെ പലിശ നിരക്ക് 5.6 ശതമാനം മുതൽ 6 ശതമാനം വരെയാണ്. എന്നാൽ 24 മാസത്തെ ബജാജ് ഡിപ്പോസിറ്റിന് 7 ശതമാനം പലിശനിരക്ക് ലഭിക്കും. സ്ഥാപനത്തിൽ 24 മുതൽ 35 മാസം വരെ നിക്ഷേപം നടത്തുമ്പോഴാണ് 7 ശതമാനം പലിശനിരക്ക് ലഭിക്കുന്നത്. അതിനപ്പുറം കാലാവധിയിൽ നിക്ഷേപിക്കാൻ നിങ്ങൾ തയ്യാറാണെങ്കിൽ 7.10 ശതമാനം പലിശനിരക്ക് ലഭിക്കും. നിക്ഷേപങ്ങൾ AAA റേറ്റുചെയ്തതിനാൽ നിക്ഷേപവും പലിശ നിരക്കും സുരക്ഷിതമായിരിക്കും. ലോക്ക്ഡൌൺ കാരണം കമ്പനികൾ ബുദ്ധിമുട്ടുന്ന സമയത്ത്, മികച്ച റേറ്റിംഗുള്ള കമ്പനികളിൽ നിക്ഷേപിക്കുന്നതാണ് നല്ലത്.

ഐഡിഎഫ്സി ഫസ്റ്റ് ബാങ്ക് സേവിംഗ്സ് അക്കൗണ്ട്

ഒരു ലക്ഷം രൂപയിൽ കൂടുതലുള്ള ബാങ്കിന്റെ സേവിംഗ്സ് അക്കൗണ്ടിലെ ബാലൻസിന് നിങ്ങൾക്ക് 7 ശതമാനം പലിശ ലഭിക്കും. സേവിംഗ്സ് ബാങ്ക് അക്കൗണ്ടിൽ നിന്ന് നേടുന്ന 10,000 രൂപ വരെയുള്ള പലിശ വരുമാനം നികുതി രഹിതമാണ്. സേവിംഗ്സ് അക്കൗണ്ടിലെ ബാക്കി തുക ഒരു ലക്ഷം രൂപയിൽ കുറവാണെങ്കിൽ, നിങ്ങൾക്ക് 6 ശതമാനം പലിശനിരക്ക് ലഭിക്കും. ഈ പലിശ നിരക്ക് രാജ്യത്തെ മിക്ക സർക്കാർ ബാങ്കുകളുടെയും എഫ്ഡി പലിശനിരക്കിനേക്കാൾ മികച്ചതാണ്. ഇതുകൂടാതെ ഒരാൾക്ക് 25 ലക്ഷം രൂപ വരെ വ്യക്തിഗത അപകട ഇൻഷുറൻസ് പരിരക്ഷയും ഒരു സൌജന്യ ഡെബിറ്റ് കാർഡും ബുക്ക് മൈഷോയിലെ സിനിമകൾ, നാടകങ്ങൾ അല്ലെങ്കിൽ ഇവന്റുകൾക്ക് ഓരോ മാസവും 250 രൂപ ക്യാഷ് ബാക്കും ഇതുവഴി ലഭിക്കും.

മഹീന്ദ്ര ഫിനാൻസിന്റെ എഫ്ഡി

നിങ്ങൾക്ക് 5 ലക്ഷം രൂപ വരെ നിക്ഷേപിക്കാനുണ്ടെങ്കിൽ മഹീന്ദ്ര ഫിനാൻസിന്റെ നിക്ഷേപവും പരിഗണിക്കാം. പലിശനിരക്ക് ബജാജ് ഫിനാൻസിനേക്കാൾ അല്പം കൂടുതലാണ്. 27 മാസത്തേക്ക് 7.05 ശതമാനവും 33 മാസത്തിന് 7.20 ശതമാനവും 40 മാസത്തേക്ക് 7.30 ശതമാനവുമാണ് പലിശ നിരക്ക്. കമ്പനി സ്ഥിര നിക്ഷേപങ്ങളെ സംബന്ധിച്ചിടത്തോളം, പലിശ വരുമാനം 5,000 രൂപയിൽ കൂടുതൽ ആയാൽ ടിഡിഎസ് ബാധകമാണെന്ന കാര്യം ഓർമിക്കേണ്ടതുണ്ട്. അതിനാൽ നിക്ഷേപകർ അതനുസരിച്ച് ആസൂത്രണം ചെയ്യണം. AAA റേറ്റിംഗുള്ളതിനാൽ ഇവിടെ നിക്ഷേപിക്കുന്നത് വളരെ സുരക്ഷിതമാണ്.

പോസ്റ്റ് ഓഫീസ് ടൈം ഡിപ്പോസിറ്റ്

ബാങ്കുകളേക്കാൾ മികച്ച പലിശ നിരക്കാണ് നിക്ഷേപങ്ങൾക്ക് പോസ്റ്റ് ഓഫീസ് ടൈം ഡിപ്പോസിറ്റ് വാഗ്ദാനം ചെയ്യുന്നത്. 5 വർഷത്തെ നിക്ഷേപം നോക്കുകയാണെങ്കിൽ 6.7 ശതമാനം പലിശനിരക്ക് വാഗ്ദാനം ചെയ്യുന്നു. ഇപ്പോൾ, സർക്കാർ ഉടമസ്ഥതയിലുള്ള ബാങ്കുകളോ സ്വകാര്യ ബാങ്കുകളോ എഫ്ഡിഎസിൽ ഉയർന്ന പലിശനിരക്ക് വാഗ്ദാനം ചെയ്യുന്നില്ലാത്ത സാഹചര്യത്തിൽ ഈ പലിശ നിരക്ക് മികച്ചതും നിക്ഷേപം കൂടുതൽ സുരക്ഷിതവുമാണ്.