പുതിയ ഫ്ലാറ്റ് വാങ്ങുന്നവർ സൂക്ഷിക്കുക, പരിശോധിച്ച് ഉറപ്പിക്കേണ്ടത് ഇക്കാര്യങ്ങൾ

നിർത്തിവച്ച റിയൽ എസ്റ്റേറ്റ് പ്രോജക്ടുകൾ പുനരുജ്ജീവിപ്പിക്കാനുള്ള കേന്ദ്ര സർക്കാരിന്റെ പദ്ധതി നിർമാണത്തിലിരിക്കുന്ന ഫ്ലാറ്റുകളെ കൂടുതൽ ആകർഷകമാക്കിയിട്ടുണ്ട്. എന്നാൽ പുതിയ ഫ്ലാറ്റ് ബുക്ക് ചെയ്യാൻ ആഗ്രഹിക്കുന്നുവെങ്കിൽ നിങ്ങൾ തീർച്ചയായും പരിശോധിക്കേണ്ട ചില കാര്യങ്ങളുണ്ട്. അവ എന്തൊക്കെയാണെന്ന് നോക്കാം.

റെറ അംഗീകാരം

ആദ്യമായി പരിശോധിക്കേണ്ടത് വാങ്ങാൻ പോകുന്ന ഫ്ലാറ്റിന് റെറ അംഗീകാരം ഉണ്ടോ എന്നാണ്. മുനിസിപ്പൽ കോർപ്പറേഷനുകൾ, വൈദ്യുതി, ജലവകുപ്പ് മുതലായവയിൽ നിന്ന് എല്ലാ അംഗീകാരങ്ങളും ഉണ്ടെങ്കിൽ മാത്രമേ റെറ ഒരു പദ്ധതിക്ക് അംഗീകാരം നൽകൂ. പദ്ധതിയുടെ നിർമ്മാണം ആരംഭിക്കുന്നതിന് മാത്രമേ ഈ അംഗീകാരങ്ങൾ ആവശ്യമുള്ളൂ.

റെറ വെബ്സൈറ്റ് പരിശോധിക്കുക

ശ്രദ്ധിക്കേണ്ട മറ്റൊരു പ്രധാന കാര്യം, റെറ രജിസ്റ്റർ ചെയ്ത പ്രോജക്റ്റിനെക്കുറിച്ചുള്ള എല്ലാ വിവരങ്ങളും റെറ വെബ്സൈറ്റിൽ ലഭ്യമാണ്. ഒരു പ്രത്യേക പ്രോജക്റ്റിനെക്കുറിച്ചുള്ള പൂർണ്ണ ഡാറ്റ വെബ്‌സൈറ്റിൽ ലഭ്യമല്ലെങ്കിൽ, അത് ഒഴിവാക്കുന്നതാണ് നല്ലത്.

നിർമ്മാതാവിന്റെ സാമ്പത്തികം

ശ്രദ്ധിക്കേണ്ട അടുത്ത പ്രധാന കാര്യം, ഒരു പ്രോജക്റ്റ് റെറ രജിസ്റ്റർ ചെയ്തിട്ടുണ്ടെങ്കിൽ നിങ്ങൾക്ക് വീട് സുഗമമായി ലഭിക്കും എന്ന ധാരണയിലായിരിക്കരുത്, കാരണം റെറ അംഗീകാരം പദ്ധതിയുടെ നിർമ്മാണം ആരംഭിക്കുന്നതിന് മാത്രമാണ്. നിർമ്മാതാവ് സാമ്പത്തികമായി നല്ല നിലയിലാണോയെന്ന് അന്വേഷിച്ചറിയണം.

ഒഴിവാക്കേണ്ടത് ആരെ?

പൂർത്തിയാക്കിയ പദ്ധതികൾ നിങ്ങൾക്ക് നിർമ്മാതാവിന്റെ ട്രാക്ക് റെക്കോർഡിനെക്കുറിച്ച് ഒരു ആശയം നൽകും. കൂടാതെ, മറ്റ് പ്രോജക്റ്റുകളും നിർമ്മാതാവ് സമയബന്ധിതമായി നൽകിയിട്ടുണ്ടോയെന്ന് പരിശോധിക്കുക. എൻ‌സി‌എൽ‌ടി കേസുകളിൽ കുടുങ്ങുന്ന കെട്ടിട നിർമ്മാതാക്കളെ ഒഴിവാക്കുക, ധാരാളം ഉപഭോക്തൃ പരാതികൾ ഉള്ള നിർമ്മാതാക്കളെയും ഒഴിവാക്കുന്നതാണ് നല്ലത്.

ചുറ്റുപാടുകൾ

ശ്രദ്ധിക്കേണ്ട മറ്റൊരു കാര്യം, നിർമ്മാതാവ് സൂചിപ്പിക്കുന്ന എല്ലാ സേവനങ്ങളും സൌകര്യങ്ങളും ഫ്ലാറ്റിലുണ്ടോയെന്ന് പരിശോധിക്കുകയാണ്. വാങ്ങാൻ തീരുമാനിക്കുന്നതിന് മുമ്പ് തന്നെ നിങ്ങൾക്ക് ആവശ്യമായതും നിങ്ങളുടെ പ്രതീക്ഷകളുമായി പൊരുത്തപ്പെടുന്നുണ്ടോയെന്ന് പരിശോധിക്കാൻ സൈറ്റ് സന്ദർശിക്കുന്നത് നല്ലതാണ്. ആശുപത്രികൾ, സ്കൂളുകൾ, മാളുകൾ, മറ്റ് വിനോദ ഓപ്ഷനുകൾ എന്നിവ പോലുള്ള പ്രോജക്റ്റിന് ചുറ്റുമുള്ള സാമൂഹിക ഇൻഫ്രാസ്ട്രക്ചറുകളും പരിശോധിക്കുക.

പൂർത്തീകരിക്കുന്ന തീയതി

റെറ വെബ്‌സൈറ്റിൽ നിന്ന് നിങ്ങൾക്ക് അംഗീകൃത പ്രോജക്റ്റിന്റെ പൂർത്തീകരണ തീയതി പരിശോധിക്കാൻ കഴിയും. സമയപരിധി ലംഘിക്കുകയാണെങ്കിൽ, റെറ കർശനമായ പിഴ ചുമത്തും. വാങ്ങുന്നയാൾ എന്ന നിലയിൽ, നിങ്ങളുടെ പ്രോജക്റ്റിന്റെ പുരോഗതി പതിവായി പരിശോധിക്കേണ്ടത് പ്രധാനമാണ്. പ്രത്യേകിച്ച് അവസാന തീയതിക്ക് 2-3 മാസം മുമ്പ്. ഇത് നിർമ്മാണ പുരോഗതിയെക്കുറിച്ച് വ്യക്തമായ ധാരണ നിങ്ങൾക്ക് നൽകും.