സ്ഥിര നിക്ഷേപങ്ങളേക്കാൾ ഉയർന്ന പലിശ: ഈ സർക്കാർ പദ്ധതികളുടെ പലിശ നിരക്കുകൾ പരിഷ്കരിക്കുന്നുണ്ടോ?

സമ്പാദ്യ ശീലം നേരത്തെ തുടങ്ങുന്നതാണ് കൂടുതൽ നല്ലത്. എന്നാൽ നിലവിലെ സാഹചര്യത്തിൽ എഫ്ഡിയിൽ നിക്ഷേപിക്കാൻ പലരും മടിക്കുന്നു. അതിനു കാരണം നിലവിലെ കുറഞ്ഞ പലിശ നിരക്കാണ്. 2025ൽ മൂന്ന് തവണയായി റിപ്പോ നിരക്ക് വെട്ടിക്കുറച്ചതോടെ സ്ഥിര നിക്ഷേപങ്ങളുടെ പലിശ നിരക്ക് കുറഞ്ഞു. എന്നാൽ പോസ്റ്റ് ഓഫീസ് വാ​ഗ്ദാനം ചെയ്യുന്ന ചെറുകിട സമ്പാദ്യ പദ്ധതികളുടെ പലിശ നിരക്ക് ഇപ്പോഴും മികച്ചതായി തുടരുന്നു.

പബ്ലിക് പ്രൊവിഡന്റ് ഫണ്ട് (പിപിഎഫ്), നാഷണൽ സേവിംഗ്സ് സർട്ടിഫിക്കറ്റ് (എൻഎസ്‌സി), പോസ്റ്റ് ഓഫീസ് സേവിംഗ്സ്, സുകന്യ സമൃദ്ധി യോജന തുടങ്ങിയ ചെറുകിട സമ്പാദ്യ പദ്ധതികൾ എഫ്ഡിയേക്കാൾ മികച്ച പലിശ നിരക്ക് വാ​ഗ്ദാനം ചെയ്യുന്നുണ്ട്. ഈ പദ്ധതികൾ സർക്കാർ പിന്തുണയോടെ പ്രവർത്തിക്കുന്നതിനാൽ നിക്ഷേപകർക്ക് വിശ്വാസ്യതയും കൂടുതലാണ്. മാത്രമല്ല ഇത് പെൻഷൻകാർക്കും മധ്യവർഗ കുടുംബങ്ങൾക്കും ഏറ്റവും നല്ല തിരഞ്ഞെടുപ്പായി മാറുന്നു.

സ്ഥിര നിക്ഷേപങ്ങളുടെ പലിശ നിരക്ക് കുറച്ചിട്ടും ഇത്തരം ചെറുകിട സമ്പാ​ദ്യ പദ്ധതികളുടെ പലിശ നിരക്ക് ഇനിയും കുറച്ചിട്ടില്ല. കോവിഡ് കാലത്ത് പോലും ഈ പലിശ നിരക്ക് കുറച്ചിട്ടില്ല എന്നതാണ് രസകരമായ കാര്യം. എന്തുകൊണ്ടായിരിക്കും ഇത്തരം സർക്കാർ സമ്പാദ്യ പദ്ധതികളുടെ പലിശ നിരക്ക് കുറക്കാത്തത്? വിശദമായി നോക്കാം;

പലിശ നിരക്ക് കുറക്കാത്തത് എന്തുകൊണ്ട്?

വർദ്ധിച്ചുവരുന്ന പലിശ ചെലവുകൾ കൈകാര്യം ചെയ്യുന്നതിനുള്ള ഒരു മാർഗമായി സർക്കാർ ഈ പദ്ധതികളെ കണക്കാക്കുന്നുണ്ട്. അതായത് ബാങ്കുകൾ സ്ഥിര നിക്ഷേപ നിരക്കുകൾ കുറയ്ക്കുമ്പോഴും അത് ചെറുകിട സമ്പാദ്യ പദ്ധതികളുടെ നിരക്കുകളെ ബാധിക്കാത്തതിനാൽ മൊത്തത്തിലുള്ള പലിശ ഭാരം സന്തുലിതമാക്കാൻ സഹായിക്കുന്നു.

എങ്കിലും പണപ്പെരുപ്പത്തിന് അനുസരിച്ച് ഈ പലിശ നിരക്കിൽ മാറ്റം വന്നേക്കാം. അതായത് ഭാവിയിൽ പണപ്പെരുപ്പം കുത്തനെ ഉയരുകയോ, പണലഭ്യത കുറയുകയോ ചെയ്താൽ നിരക്കുകൾ പരിഷ്കരിക്കുന്നതിനെക്കുറിച്ച് സർക്കാർ പരിഗണിക്കാൻ സാധ്യതയുണ്ട്. നിലവിൽ പലിശ നിരക്കിൽ മാറ്റമില്ല. 2022 ജൂൺ 30-ന് പരിഷ്കരിച്ച ചെറുകിട സമ്പാദ്യ പദ്ധതികളുടെ പലിശ നിരക്കുകൾ ഇപ്പോഴും മാറ്റമില്ലാതെ തുടരുന്നു.

ജനപ്രിയ പദ്ധതികളുടെ നിലവിലെ പലിശ നിരക്കുകൾ

• പബ്ലിക് പ്രൊവിഡന്റ് ഫണ്ട് (PPF): 7.10 ശതമാനം
• നാഷണൽ സേവിംഗ്സ് സർട്ടിഫിക്കറ്റ് (NSC): 7.7 ശതമാനം
• പോസ്റ്റ് ഓഫീസ് പ്രതിമാസ വരുമാന പദ്ധതി: 7.4 ശതമാനം
• സുകന്യ സമൃദ്ധി യോജന: 8.2 ശതമാനം
• സീനിയർ സിറ്റിസൺസ് സേവിംഗ്സ് സ്കീം (SCSS): 8.2 ശതമാനം
• കിസാൻ വികാസ് പത്ര: 7.5 ശതമാനം

ഈ നിക്ഷേപങ്ങളെല്ലാം വ്യത്യസ്ത കാലാവധിയിലുള്ളവയാണ്. എങ്കിലും ഇതിൽ മിക്ക നിക്ഷേപങ്ങളിൽ നിന്നും ലഭിക്കുന്ന പലിശ വരുമാനം നികുതി രഹിതമാണ്. ഈ ആനുകൂല്യം പലപ്പോഴും എഫ്ഡിയിൽ ലഭിക്കുന്നില്ല. മാത്രമല്ല, ചില നിക്ഷേപങ്ങൾ കൂട്ടു പലിശയുടെ നേട്ടവും വാ​ഗ്ദാനം ചെയ്യുന്നു.

അറിയിപ്പ്:
മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗുഡ്റിട്ടേൺസ് മലയാളവും ലേഖകനും ഉത്തരവാദികളല്ല.