നോണ്‍ ഹോം ബ്രാഞ്ചുകളില്‍ ഇടപാടുകള്‍ നടത്തുമ്പോള്‍

എന്താണ് നോണ്‍ ഹോം ബ്രാഞ്ച് ?

ഒരു ഉപഭോക്താവ് അയാളുടെ അക്കൗണ്ട് തുറന്നിരിക്കുന്ന ബ്രാഞ്ചിനെയാണ് അയാളുടെ ഹോം ബ്രാഞ്ച് എന്ന് പറയുന്നത്. അതായത് അയാളുടെ അക്കൗണ്ട് പരിപാലിക്കുകയും കൈകാര്യം ചെയ്യുകയും ചെയ്യുന്നത് ആ ബ്രാഞ്ച് ആയിരിക്കുമെന്ന് സാരം. ഹോം ബ്രാഞ്ച് അല്ലാതെ ഉപഭോക്താവിന് ബാങ്കിംഗ് സേവനങ്ങള്‍ ലഭിക്കുന്ന മറ്റ് ശാഖകളെയാണ് നോണ്‍ ഹോം ബ്രാഞ്ചുകള്‍ എന്ന് പറയുന്നത്. ഇത്തരം നോണ്‍ ഹോം ബ്രാഞ്ചുകളില്‍ നിന്ന് ഏതെങ്കിലും തരത്തിലുള്ള പണ ഇടപാടുകള്‍ നടത്തുമ്പോള്‍ ഓരോ ഇടപാടിനും നിശ്ചിത തുക അധിക ചാര്‍ജായി ഉപഭോക്താവില്‍ നിന്നും ഈടാക്കാറുണ്ട്. പണം നിക്ഷേപിക്കുന്നതിനും പിന്‍വലിക്കുന്നതിനും കൈമാറ്റം നടത്തുന്നതിനുമൊക്കെ ഈ ഫീസ് ബാധകമാണ്. ഓരോ ബാങ്കും അവരുടെ നയങ്ങള്‍ക്ക് അനുസരിച്ച് വ്യത്യസ്ത തുകയാണ് ഇത്തരം ചാര്‍ജായി ഈടാക്കുന്നത്. ഒരു മൂന്നാം കക്ഷി എന്തെങ്കിലും പണമിടപാട് നടത്തിയാാലും ചില ബാങ്കുകള്‍ ഇത്തരം ചാര്‍ജ് ഈടാക്കാറുണ്ട്.

എസ്ബിഐയുടെ നോണ്‍ ഹോം ബ്രാഞ്ചില്‍ നിന്നും പണം പിന്‍വലിക്കുമ്പോള്‍

എസ്ബിഐ (സ്‌റ്റേറ്റ് ബാങ്ക് ഓഫ് ഇന്ത്യ) യില്‍ നിങ്ങള്‍ക്ക് ഒരു സേവിംഗ്‌സ് അക്കൗണ്ട് ഉണ്ടെന്ന് കരുതുക. 50,000 രൂപ വരെ ഒരു നോണ്‍ ഹോം ബ്രാഞ്ചില്‍ നിന്നും ഒരു ദിവസം നിങ്ങള്‍ക്ക് പിന്‍വലിക്കാന്‍ സാധിക്കും. ഇതിനായി പൂരിപ്പിച്ച വിത്ത്‌ഡ്രോവല്‍ അപേക്ഷാ ഫോമിനൊപ്പം നിങ്ങളുടെ പാസ്ബുക്കും ബാങ്കില്‍ സമര്‍പ്പിക്കുകയാണ് വേണ്ടത്. കറന്റ് അക്കൗണ്ട് ഉടമകള്‍ക്ക് ഒരു ദിവസം പിന്‍വലിക്കാന്‍ സാധിക്കുന്ന തുകയുടെ പരിധി 1 ലക്ഷം രൂപയാണ്. എന്നിരുന്നാലും ഹോം ബ്രാഞ്ചില്‍ നിന്നോ നോണ്‍ ഹോം ബ്രാഞ്ചില്‍ നിന്നോ പണം പിന്‍വലിക്കുമ്പോള്‍ നോ ഫ്രില്‍ ഡിപ്പോസിറ്റുകള്‍ക്കോ, ബേസിക് സേവിംഗസ് ബാങ്ക് അക്കൗണ്ട് ഉടമകള്‍ക്കോ ബാധകമല്ല. ഈടാക്കുന്ന അധിക ചാര്‍ജ് എത്ര തവണ ഇടപാടുകള്‍ നടത്തുന്നു എന്നതിനെ അടിസ്ഥാനമാക്കിയാണ് ഈടാക്കുന്നത്.

നോണ്‍ ഹോം എസ്ബിഐ ബ്രാഞ്ചിലെ പണ നിക്ഷേപം

എസ്ബിഐയുടെ നോണ്‍ ഹോം ബ്രാഞ്ചില്‍ ഒരു ദിവസം നടത്താവുന്ന നിക്ഷേപത്തിന്റെ പരമാവധി തുക 2 ലക്ഷം രൂപ വരെയാണ്.

എസ്ബിഐ നോണ്‍ ഹോം ബ്രാഞ്ചുകളിലെ അനുവദനീയമല്ലാത്ത ഇടപാടുകള്‍
നിങ്ങള്‍ക്ക് എസ്ബിഐയിലാണ് അക്കൗണ്ട് ഉള്ളത് എങ്കില്‍ നോണ്‍ ഹോം ബ്രാഞ്ചുകള്‍ നിങ്ങള്‍ക്ക് ഡ്യൂപ്ലിക്കേറ്റ് സ്ഥിര നിക്ഷേപ റിസീപ്റ്റുകള്‍ തരില്ല. കൂടാതെ അക്കൗണ്ട് കൈമാറ്റം വഴിയോ പണമടച്ചോ വായ്പ തീര്‍പ്പാക്കുന്നതും എസ്ബിഐ നോണ്‍ ഹോം ബ്രാഞ്ചുകളില്‍ അനുവദിക്കാറില്ല. കൂടാതെ നോണ്‍ ഹോം ബ്രാഞ്ചില്‍ അപേക്ഷ നല്‍കുന്നത് വഴി കാലാവധി പൂര്‍ത്തിയായ പബ്ലിക് പ്രൊവിഡന്റ് ഫണ്ട് നിക്ഷേപം നീട്ടാനും നിങ്ങള്‍ക്ക് സാധിക്കില്ല.

ഐസിഐസിഐ ബാങ്ക് ചാര്‍ജുകള്‍

ഐസിഐസിഐ ബാങ്ക് ലി. ഒരു മാസത്തെ ആദ്യ നോണ്‍ ഹോം ബ്രാഞ്ച് ഇടപാടിന് ശേഷമുള്ള ഓരോ നോണ്‍ ഹോം ഇടപാടിനും 150 രൂപ ഈടാക്കും. നോണ്‍ ഹോം ബ്രാഞ്ചില്‍ ഒരു ഉപഭോക്താവിന് നടത്താവുന്ന പരമാവധി ഇടപാട് തുക 50,000 രൂപയാണ്. മൂന്നാം കക്ഷി ഇടപാടുകളുടെ പരിധി 15,000 രൂപയും.

എച്ച്ഡിഎഫ്‌സി ബാങ്ക്

എച്ച്ഡിഎഫ്‌സി ബാങ്ക് 1 ലക്ഷം വരെ സൗജന്യ പിന്‍വലിക്കല്‍ സേവനം അനുവദിക്കുന്നുണ്ട്. അതില്‍ കൂടുതല്‍ ഉള്ള തുകയ്ക്ക് 1,000 രൂപയ്ക്ക് 2 രൂപ നിരക്കില്‍ ചുരുങ്ങിയത് 50 രൂപയെങ്കിലും ഓരോ ഇടപാടിനും ഈടാക്കും. മൂന്നാം കക്ഷി ഇടപാടുകളുടെ പരിധി 50,000 രൂപയാണ്.