പോസ്റ്റ് ഓഫീസിലെ ഈ പദ്ധതിയിലൂടെ നേടാം 25 ലക്ഷം രൂപ; എങ്ങനെ?

സുരക്ഷിതമായ നിക്ഷേപത്തിലൂടെ വലിയൊരു തുക സമ്പാദിക്കാൻ ആഗ്രഹിക്കുന്നവർക്ക് പോസ്റ്റ് ഓഫീസ് പദ്ധതികൾ എപ്പോഴും മികച്ച തിരഞ്ഞെടുപ്പാണ്. സർക്കാർ ഗ്യാരണ്ടി ഉള്ളതുകൊണ്ടുതന്നെ നിക്ഷേപത്തിന് യാതൊരുവിധ റിസ്ക്കുമില്ല. അത്തരത്തിൽ 25 ലക്ഷം രൂപ വരെ സമ്പാദിക്കാൻ സഹായിക്കുന്ന ഒരു പോസ്റ്റ് ഓഫീസ് പദ്ധതിയാണ് പോസ്റ്റ് ഓഫീസ് ആർഡി സ്കീം.

എന്താണ് പോസ്റ്റ് ഓഫീസ് ആർഡി സ്കീം

സർക്കാർ പിന്തുണയോടെ ഭാവിയിൽ നല്ലൊരു തുക നേടുന്നതിനായി എല്ലാ മാസവും ഒരു ചെറിയ തുക നിക്ഷേപിക്കാൻ ആഗ്രഹിക്കുന്നവർക്കുള്ളതാണ് പോസ്റ്റ് ഓഫീസ് റിക്കറിംഗ് ഡെപ്പോസിറ്റ് പദ്ധതി. ഇത് പൂർണ്ണമായും സർക്കാർ പിന്തുണയുള്ള ഒരു പദ്ധതിയാണ്, 100 രൂപ നിക്ഷേപിച്ച് ഈ പദ്ധതിയിൽ ഒരു അക്കൗണ്ട് തുറക്കാൻ കഴിയും, പരമാവധി നിക്ഷേപത്തിന് പരിധിയില്ല, അതായത് നിങ്ങളുടെ വരുമാനത്തിനനുസരിച്ച് തുക വർധിപ്പിക്കാൻ കഴിയും.

ഈ പദ്ധതിക്ക് നിലവിൽ 6.7 ശതമാനം പലിശയാണ് ലഭിക്കുന്നത്. സാധാരണയായി 5 വർഷത്തേക്കാണ് ഈ പദ്ധതി. എന്നാൽ ആവശ്യമെങ്കിൽ വീണ്ടും 5 വർഷത്തേക്ക് കൂടി നീട്ടാൻ സാധിക്കും. ഇങ്ങനെ 10 വർഷം നിക്ഷേപം തുടരുന്നതിലൂടെയാണ് 25 ലക്ഷം രൂപ എന്ന ലക്ഷ്യത്തിലേക്ക് എത്താൻ കഴിയുന്നത്.

25 ലക്ഷം രൂപ എങ്ങനെ നേടാം?

പോസ്റ്റ് ഓഫീസ് ആർ‌ഡിയിൽ എല്ലാ മാസവും 15,000 രൂപ നിക്ഷേപിക്കുകയാണെങ്കിൽ, നിക്ഷേപ തുക 5 വർഷത്തിനുള്ളിൽ ഏകദേശം 10.7 ലക്ഷം രൂപയാകും. ഈ സ്കീമിൽ നിങ്ങൾക്ക് 6.70% പലിശ നിരക്ക് ലഭിക്കും. പത്ത് വർഷത്തേക്ക് ഈ പദ്ധതിയിൽ നിക്ഷേപം തുടർന്നാൽ പലിശയിൽ നിന്നുള്ള വരുമാനം ഏകദേശം 7.5 ലക്ഷം രൂപയിലെത്തും. ആകെ നിക്ഷേപങ്ങളും പലിശയും ചേർത്ത്, കാലാവധി പൂർത്തിയാകുമ്പോൾ ലഭിക്കുന്ന ഫണ്ട് ഏകദേശം 25.6 ലക്ഷം രൂപയായിരിക്കും. ചുരുക്കത്തിൽ, പത്ത് വർഷം തുടർച്ചയായി മാസം 15,000 രൂപ നിക്ഷേപിച്ചാൽ നിങ്ങൾക്ക് 25 ലക്ഷത്തിലധികം രൂപ കൈയ്യിൽ ലഭിക്കും.

വായ്പാ സൗകര്യം ലഭ്യമാണ്

ആവശ്യമുള്ളപ്പോൾ വായ്പ എടുക്കാനുള്ള സൗകര്യവും ഈ പദ്ധതി നൽകുന്നു. കുറഞ്ഞത് ഒരു വർഷമെങ്കിലും ആർ‌ഡി അക്കൗണ്ട് നിലനിർത്തിയിട്ടുണ്ടെങ്കിൽ, നിക്ഷേപിച്ച തുകയുടെ 50 ശതമാനം വരെ വായ്പ ലഭിക്കും. ഈ വായ്പയുടെ പലിശ നിരക്ക് വളരെ കുറവാണ്.

വലിയൊരു തുക ഒരുമിച്ച് നിക്ഷേപിക്കാൻ സാധിക്കാത്തവർക്ക് ഓരോ മാസവും ചെറിയ തുക മാറ്റിവെച്ച് ഭാവിയിലേക്ക് സമ്പാദിക്കാൻ ഈ റിക്കറിംഗ് ഡെപ്പോസിറ്റ് പദ്ധതി ഏറെ സഹായകമാണ്. സർക്കാർ ഓരോ മൂന്ന് മാസം കൂടുമ്പോഴും പലിശ നിരക്കുകളിൽ മാറ്റം വരുത്താറുണ്ട്. അതിനാൽ നിലവിലെ നിരക്ക് പരിശോധിക്കുന്നത് നല്ലതാണ്. ബാങ്ക് നിക്ഷേപങ്ങളെ അപേക്ഷിച്ച് പോസ്റ്റ് ഓഫീസ് പദ്ധതികൾക്ക് കേന്ദ്ര സർക്കാരിന്റെ നേരിട്ടുള്ള സുരക്ഷയുണ്ട്.