ഇതാണ് മികച്ച ഡീൽ: ഈ മുൻനിര ബാങ്കുകൾ കുറഞ്ഞ പലിശ നിരക്കിൽ വ്യക്തി​ഗത വായ്പകൾ നൽകുന്നു

വ്യക്തി​ഗത വായ്പകൾ എടുക്കുവാൻ ആ​ഗ്രഹിക്കുന്നവരുണ്ടോ? എങ്കിൽ അതിനു മുന്നേ പലിശ നിരക്കുകളെ കുറിച്ച് വിശദമായി മനസിലാക്കണം. കുറഞ്ഞ പലിശ നിരക്ക് വാ​ഗ്ദാനം ചെയ്യുന്ന വ്യക്തി​ഗത വായ്പകളായിരിക്കും ആളുകൾ തിരയുന്നത്. രാജ്യത്തെ എല്ലാ ബാങ്കുകളും ബാങ്ക് ഇതര സ്ഥാപനങ്ങളും വ്യക്തി​ഗത വായ്പകൾ വാ​ഗ്ദാനം ചെയ്യുന്നുണ്ട്. ഓരോ സ്ഥാപനവും വ്യത്യസ്ത പലിശയും ചിലർ അമിത ചാർജുകളും ഈടാക്കുന്നു. ഓരോ വായ്പയും തിരഞ്ഞെടുക്കുമ്പോഴും ശ്രദ്ധിക്കണം.

ബാങ്കുകൾക്കു പുറമേ മൊബൈൽ ആപ്പുകളിലൂടെയും ഇത്തരം വായ്പകൾ എടുക്കാം. മിനിറ്റുകൾക്കുള്ളിൽ ലഭിക്കുന്ന ഇത്തരം വായ്പകൾ അമിത പലിശ നിരക്ക് ഈടാക്കാനുള്ള സാധ്യത കൂടുതലാണ്. ബാങ്ക് വായ്പകൾ കുറഞ്ഞ നിരക്കിലാണ് വാ​ഗ്ദാനം ചെയ്യുന്നത്.

വ്യക്തി​ഗത വായ്പകൾ താരതമ്യേന കുറഞ്ഞ രേഖകൾ സമർപ്പിച്ച് ലളിതമായ പ്രക്രിയകളിലൂടെ പൂർത്തിയാക്കുന്ന വായ്പാ മാർ​ഗമാണ്. സുരക്ഷിതമല്ലാത്ത വായ്പകൾ എന്നാണ് വ്യക്തി​ഗത വായ്പകൾ അറിയപ്പെടുന്നത്. കാരണം വ്യക്തി​ഗത വായ്പകൾക്ക് ഈട് നൽകേണ്ട ആവശ്യമില്ല. രാജ്യത്തെ എല്ലാ പൊതുമേഖലാ, സ്വകാര്യ മേഖലാ ബാങ്കുകളും വ്യക്തി​ഗത വായ്പകളെ പ്രോത്സാഹിപ്പിക്കുന്നു. നിങ്ങളുടെ സിബിൽ സ്കോറിനും ക്രെഡിറ്റ് ഹിസ്റ്ററിക്കും അനുസരിച്ച് പലിശ നിരക്കിൽ മാറ്റങ്ങൾ വന്നേക്കാം. എങ്കിലും നിലവിൽ കുറഞ്ഞ പലിശ നിരക്കോടെ വ്യക്തി​ഗത വായ്പ ലഭിക്കുന്ന ബാങ്കുകൾ ഇതാ.... വിശദമായി അറിയാം;

2025 ഏപ്രിൽ മാസത്തെ വ്യക്തിഗത വായ്പ പലിശ നിരക്കുകൾ;

1. എച്ച്.ഡി.എഫ്‌.സി ബാങ്ക്

രാജ്യത്തെ ഏറ്റവും വലിയ സ്വകാര്യ ബാങ്കാണ് എച്ച്.ഡി.എഫ്‌.സി. താരതമ്യേന കുറഞ്ഞ പലിശ നിരക്കാണ് എച്ച്.ഡി.എഫ്.സി ബാങ്ക് ഈടാക്കുന്നത്. വ്യക്തി​ഗത വായ്പകളിൽ നിന്നും പ്രതിവർഷം 10.90 ശതമാനം മുതൽ 24 ശതമാനം വരെ ഈടാക്കുന്നു. ഇതിനൊപ്പം പ്രോസസ്സിംഗ് ചാർജുകൾ ഏകദേശം 6,500 രൂപയും ജി.എസ്.ടിയും ഈടാക്കുന്നു.

2. ഐ.സി.ഐ.സി.ഐ ബാങ്ക്

രാജ്യത്തെ വലിയ സ്വകാര്യ ബാങ്കുകളിൽ പ്രധാനപ്പെട്ടതാണ് ഐ.സി.ഐ.സി.ഐ ബാങ്ക്. വ്യക്തി​ഗത വായ്പക്കാരിൽ നിന്ന് പ്രതിവർഷം 10.85 ശതമാനം മുതൽ 16.65 ശതമാനം വരെയാണ് പലിശ ഈടാക്കുന്നത്. വായ്പയുടെ 2 ശതമാനവും നികുതിയും പ്രോസസ്സിംഗ് ചാർജായി ഈടാക്കുന്നു.

3. കൊട്ടക് മഹീന്ദ്ര ബാങ്ക്

ഈ സ്വകാര്യ ബാങ്ക് നൽകുന്ന വ്യക്തി​ഗത വായ്പകൾക്ക് വാർഷിക പലിശ നിരക്ക് 10.99 മുതൽ 16.99 ശതമാനം വരെയാണ്. അതേസമയം, പ്രോസസ്സിംഗ് ചാർജുകൾ വായ്പ തുകയുടെ 5 ശതമാനം വരെയും ഒപ്പം നികുതിയും ചേർന്നതാണ്.

4. ഫെഡറൽ ബാങ്ക്

ഫെഡറൽ ബാങ്കിൽ നിങ്ങൾക്ക് വ്യക്തി​ഗത വായ്പയുണ്ടോ? ഈ സ്വകാര്യ ബാങ്ക് വായ്പക്കാരിൽ നിന്ന് പ്രതിവർഷം 11.49 മുതൽ 14.49 ശതമാനം വരെ പലിശ ഈടാക്കുന്നു.

5. ബാങ്ക് ഓഫ് ബറോഡ

ഈ പൊതുമേഖലാ ബാങ്ക് മികച്ച പലിശ നിരക്കാണ് നൽകുന്നത്. നിലവിലെ കണക്ക് പ്രകാരം സ്വകാര്യ, പൊതുമേഖലാ സ്ഥാപനങ്ങളിലെ ജീവനക്കാരായ വായ്പക്കാർക്ക് പ്രതിവർഷം 13.05 മുതൽ 15.30 ശതമാനം വരെ പലിശ ഈടാക്കുന്നു.

6. യൂണിയൻ ബാങ്ക് ഓഫ് ഇന്ത്യ

ഈ പൊതുമേഖലാ ബാങ്ക് വ്യക്തിഗത വായ്പകൾക്ക് പ്രതിവർഷം 11.50 ശതമാനം മുതൽ 15.2 ശതമാനം വരെ പലിശ ഈടാക്കുന്നു.

ഈ ബാങ്കുകളെല്ലാം താരതമ്യേന കുറഞ്ഞ പലിശ നിരക്കാണ് വാ​ഗ്ദാനം ചെയ്യുന്നത്. 2025 ഏപ്രിൽ മാസത്തിൽ പണത്തിന് ആവശ്യമുള്ളവർക്ക് ഈ ബാങ്കുകളിലൂടെ വായ്പ എടുക്കാവുന്നതാണ്.