തൊഴില്‍ മേഖല പാടേ തകര്‍ത്ത് കോവിഡ്; തൊഴിലില്ലായ്മ നിരക്ക് കുത്തനെ വര്‍ധിക്കുന്നു

രാജ്യത്ത് ശക്തമായിക്കൊണ്ടിരിക്കുന്ന കോവിഡ് രണ്ടാം തരംഗത്തില്‍ തൊഴില്‍ മേഖലയിലും വലിയ പ്രതിസന്ധികള്‍ ഉടലെടുക്കുന്നു. സെന്റര്‍ ഫോര്‍ മോണിറ്ററിംഗ് ഇന്ത്യന്‍ ഇക്കണോമിയുടെ റിപ്പോര്‍ട്ടുകള്‍ പ്രകാരം ഇന്ത്യയിലെ പ്രതിമാസ തൊഴിലില്ലായ്മ നിരക്ക് എട്ട് ശതമാനത്തിലെത്തി നില്‍ക്കുകയാണ്.

കഴിഞ്ഞ മാസത്തില്‍ ഇത് 6.5 ശതമാനമായിരുന്നു. 2021 ഏപ്രില്‍ മാസത്തിലെ ആദ്യ നാല് ആഴ്ചകളില്‍ 8.2%, 8.6%, 8.4%, 7.4% എന്നിങ്ങനെയാണ് ഇന്ത്യയിലെ തൊഴിലില്ലായ്മ നിരക്ക് സെന്റര്‍ ഫോര്‍ മോണിറ്ററിംഗ് ഇന്ത്യന്‍ ഇക്കണോമിയുടെ കണക്കുകളില്‍ പറയുന്നത്.

കോവിഡ് രണ്ടാം തരംഗം രൂക്ഷമാകുന്ന സാഹചര്യത്തില്‍ പല സംസ്ഥാനങ്ങളും പ്രാദേശികമായി ലോക്ക് ഡൗണ്‍ ഉള്‍പ്പെടെയുള്ള കര്‍ശന നിയന്ത്രണ നയങ്ങള്‍ നടപ്പിലാക്കുന്നത് തൊഴില്‍ മേഖലയില്‍ ഈ പ്രതിബന്ധങ്ങള്‍ ഉണ്ടാകുവാനും തൊഴിലില്ലായ്മ നിരക്ക് വര്‍ധിക്കുകയും ചെയ്യുന്നതിനുള്ള കാരണമായി വിലയിരുത്തപ്പെടുന്നത്.

ഏപ്രിലില്‍ ആദ്യ രണ്ടാഴ്ചയില്‍ തന്നെ രാജ്യത്തെ തൊഴിലില്ലായ്മ നിരക്ക് ഉയരാന്‍ തുടങ്ങിയിരുന്നു. എന്നാല്‍ മാര്‍ച്ച് മാസവുമായി താരതമ്യം ചെയ്യുമ്പോള്‍ പ്രതിമാസ തൊഴിലില്ലായ്മ നിരക്ക് എട്ട് ശതമാനമാണ്. ഏപ്രില്‍ മാസത്തെ മൂന്നാമത്തെയും നാലാമത്തെയും ആഴ്ചയില്‍ തൊഴിലില്ലായ്മ നിരക്ക് കുറഞ്ഞതായാണ് കാണിക്കുന്നത്. എന്നാല്‍ പ്രതിമാസ തൊഴിലില്ലായ്മ നിരക്ക് എട്ട് ശതമാനമാണെന്ന് സിഎംഇഇ വ്യക്തമാക്കുന്നു.

സിഎംഐഇയുടെ റിപ്പോര്‍ട്ടുകള്‍ പ്രകാരം രാജ്യത്ത് തൊഴില്‍ രഹിതരായി 43.8 ദശലക്ഷം ആളുകളാണുള്ളത്. യുവതീയുവാക്കളാണ് തൊഴില്‍ രഹിതരില്‍ വലിയൊരു ഭാഗവും. 44 ദശലക്ഷത്തില്‍ 38 ദശലക്ഷം പേരും 15 നും 29 നും ഇടയില്‍ പ്രായമുള്ളവരാണ്. ഇവരില്‍ 28 ദശലക്ഷത്തോളം പേരും സജീവമായി തൊഴില്‍ അന്വേഷിക്കുന്നവരാണെങ്കിലും ഇവര്‍ക്ക് ജോലി കണ്ടെത്താന്‍ സാധിക്കുന്നില്ല എന്നും റിപ്പോര്‍ട്ടില്‍ പറയുന്നു.