കുട്ടികൾക്ക് 'വീക്കിലി ബഡ്ജറ്റ്'; ഗുണങ്ങളും ദോഷങ്ങളും അറിഞ്ഞിരിക്കാം

കുട്ടികൾക്ക് കൃത്യമായ ഇടവേളകളിൽ പോക്കറ്റ് മണി നൽകുന്ന രീതി പണ്ട് മുതലേ ഉള്ളതാണ്. എന്നാൽ ഇപ്പോൾ വിദേശരാജ്യങ്ങളിലെന്ന പോലെ ഇന്ത്യയിലെ മെട്രോ നഗരങ്ങളിലും പുതിയൊരു രീതി തരംഗമാവുകയാണ് 'വീക്കിലി ബഡ്ജറ്റിംഗ്'. കുട്ടികൾക്ക് ആഴ്ചയിലൊരിക്കൽ കൃത്യമായ ഒരു തുക നൽകുകയും, അവരുടെ ആവശ്യങ്ങൾ ആ തുകയ്ക്കുള്ളിൽ നിന്ന് മാനേജ് ചെയ്യാൻ പഠിപ്പിക്കുകയും ചെയ്യുന്ന രീതിയാണിത്. എന്നാൽ ഈ ശീലം കുട്ടികളെ ഉത്തരവാദിത്തമുള്ളവരാക്കുമോ അതോ അനാവശ്യ സമ്മർദ്ദത്തിലാക്കുമോ?

എന്താണ് വീക്കിലി ബഡ്ജറ്റിംഗ്?

വെറുമൊരു പോക്കറ്റ് മണി എന്നതിലുപരി, ഒരു നിശ്ചിത ആഴ്ചയിലേക്കുള്ള ചെലവുകൾ മുൻകൂട്ടി കണ്ട് പണം വിനിയോഗിക്കാൻ കുട്ടികളെ പ്രേരിപ്പിക്കുന്ന രീതിയാണിത്. ഉദാഹരണത്തിന്, ഒരു അഞ്ച് വയസ്സുകാരന് ആഴ്ചയുടെ തുടക്കത്തിൽ ഒരു ചെറിയ തുക നൽകുന്നു. ആ ആഴ്ചയിലെ മിഠായിക്കോ ചെറിയ കളിപ്പാട്ടങ്ങൾക്കോ ആ പണം ഉപയോഗിക്കാം. അത് തീർന്നുപോയാൽ ആഴ്ചാവസാനം വരെ കാത്തിരിക്കണം. പണം ഒരു ഉപകരണം മാത്രമാണെന്നും അത് എങ്ങനെ വിവേകത്തോടെ ഉപയോഗിക്കണമെന്നും കുട്ടിക്കാലം മുതലേ പഠിപ്പിക്കുക എന്നതാണ് ഇതിന്റെ ലക്ഷ്യം.

ഗുണങ്ങൾ 

മാനസികാരോഗ്യ വിദഗ്ധരുടെ അഭിപ്രായത്തിൽ, ചെറുപ്പത്തിലേ ബഡ്ജറ്റിംഗ് പഠിക്കുന്നത് കുട്ടികളിൽ മികച്ച സ്വഭാവരൂപീകരണത്തിന് സഹായിക്കും. കയ്യിലുള്ള പണം ഉടനെ ചെലവാക്കാതെ ഭാവിയിലേക്ക് കരുതിവെക്കാൻ അവർ പഠിക്കുന്നു. ആവശ്യങ്ങളും ആഗ്രഹങ്ങളും തമ്മിലുള്ള വ്യത്യാസം തിരിച്ചറിയാൻ ഇത് അവരെ സഹായിക്കുന്നു. സ്വന്തം സാമ്പത്തിക കാര്യങ്ങൾ സ്വയം നിയന്ത്രിക്കുമ്പോൾ കുട്ടികളിൽ ഒരു ഉത്തരവാദിത്തബോധവും ആത്മവിശ്വാസവും വളരുന്നു.

തിരിച്ചടിയാകുമോ?

ഗുണങ്ങൾ ഉണ്ടെങ്കിലും, ഈ രീതി അമിതമായാൽ ഗുണത്തേക്കാളേറെ ദോഷം ചെയ്തേക്കാമെന്ന് വിദഗ്ധർ പറയുന്നു. പണം ചെലവാക്കുന്ന കാര്യത്തിൽ മാതാപിതാക്കൾ കർക്കശമായ നിയന്ത്രണങ്ങൾ ഏർപ്പെടുത്തിയാൽ അത് കുട്ടികളിൽ ഉത്കണ്ഠയ്ക്കും കുറ്റബോധത്തിനും കാരണമാകും.

കുട്ടികൾ ഓരോ രൂപയും എന്തിന് ചെലവാക്കി എന്ന് നിരന്തരം ചോദ്യം ചെയ്യുന്നത് അവരുടെ സ്വകാര്യതയെ ബാധിക്കുകയും രഹസ്യമായി പണം ചെലവാക്കാൻ അവരെ പ്രേരിപ്പിക്കുകയും ചെയ്തേക്കാം. കുട്ടിയുടെ വൈകാരിക പക്വത കൂടി കണക്കിലെടുത്ത് വേണം ഇത്തരം ശീലങ്ങൾ തുടങ്ങാൻ. വളരെ നേരത്തെ കഠിനമായ ബഡ്ജറ്റിംഗ് രീതികൾ അടിച്ചേൽപ്പിക്കുന്നത് തിരിച്ചടിയായേക്കാം.

മാതാപിതാക്കൾ ശ്രദ്ധിക്കാൻ

പണത്തെക്കുറിച്ചുള്ള പാഠങ്ങൾ കുട്ടികൾക്ക് നൽകേണ്ടത് സ്നേഹത്തോടും വഴക്കത്തോടും കൂടിയായിരിക്കണം. തെറ്റുകൾ വരുത്താൻ അവരെ അനുവദിക്കുക. ബഡ്ജറ്റ് തെറ്റിക്കുമ്പോൾ വഴക്ക് പറയുന്നതിന് പകരം, എവിടെയാണ് പിഴച്ചതെന്ന് അവരെക്കൊണ്ട് തന്നെ ചിന്തിപ്പിക്കുക. പണം എന്നത് ജീവിതവിജയത്തിന്റെ അളവുകോലല്ലെന്നും, മറിച്ച് ജീവിതം സുഗമമാക്കാനുള്ള ഒരു ഉപാധി മാത്രമാണെന്നും അവരെ പഠിപ്പിക്കാം. കുട്ടികൾക്ക് ബഡ്ജറ്റിംഗ് പഠിപ്പിക്കുന്നത് നല്ലൊരു നിക്ഷേപമാണ്. എന്നാൽ അത് അവരെ ഒന്നിനും കൊള്ളാത്തവരാക്കാനോ പേടിപ്പിക്കാനോ ഉള്ളതാകരുത് എന്ന് മാത്രം.