മ്യൂച്വൽ ഫണ്ടിലൂടെ റിട്ടയർമെന്റ് ജീവിതം ആനന്ദകരമാക്കാം; മികച്ച നിക്ഷേപ പദ്ധതികളെക്കുറിച്ചറിയാം

റിട്ടയർമെന്റിന് ശേഷമുള്ള ജീവിതം സുഗമമാക്കണമെങ്കിൽ കൃത്യമായ സാമ്പത്തിക ആസൂത്രണമുണ്ടാകണം. റിട്ടയർമെന്റ് സമയത്ത് ലഭിക്കുന്ന തുക ഏതെങ്കിലും നിക്ഷേപ പദ്ധതികളിൽ നിക്ഷേപിക്കുന്നതാണ് നല്ലത്. സാധാരണയായി നിക്ഷേപം രണ്ട് തരത്തിലാണ് ക്രമീകരിക്കാറുള്ളത്. ഒന്ന് നിക്ഷേപകന്റെ ഹ്രസ്വകാല ചെലവുകൾ നിറവേറ്റുന്നതിനായുള്ള നിക്ഷേപവും രണ്ടാമത്തേതായി പണപ്പെരുപ്പത്തെ മറികടക്കാനും ജീവിതകാലം മുഴുവൻ സാമ്പത്തിക ആവശ്യങ്ങൾ നിറവേറ്റുന്നതിൽ വീഴ്ച വരുത്താതിരിക്കാനുമുള്ള നിക്ഷേപവും.

മ്യൂച്വൽ ഫണ്ടിൽ നിക്ഷേപം നടത്തുന്നതാണ് ഏറ്റവും നല്ലത്. വിരമിച്ചവർക്ക് അവരുടെ സാമ്പത്തിക ലക്ഷ്യങ്ങൾ കൈവരിക്കാൻ സഹായിക്കുന്നതിന് ആകർഷകമായ നിക്ഷേപ ഓപ്ഷനുകൾ മ്യൂച്വൽ ഫണ്ട് വാഗ്ദാനം ചെയ്യുന്നു. അതുകൊണ്ടു തന്നെ നിക്ഷേപകർ അവരുടെ പണം ഒരൊറ്റ മ്യൂച്വൽ ഫണ്ട് സ്കീമിലേക്ക് നീക്കിവയ്ക്കുന്നത് ഒഴിവാക്കണം. പകരം സാമ്പത്തിക ലക്ഷ്യവുമായി സമന്വയിപ്പിച്ച് വ്യത്യസ്ത ഓപ്ഷനുകളിലേക്ക് നിക്ഷേപം വൈവിധ്യവത്കരിക്കണം.

ഇക്വിറ്റി മ്യൂച്വൽ ഫണ്ട്

വിരമിക്കുന്നവർക്ക് നിക്ഷേപത്തിലൂടെ ഉയർന്ന വരുമാനം നേടാനും അവരുടെ പോർട്ട്ഫോളിയോ റിട്ടേൺ വർദ്ധിപ്പിക്കാനും സഹായിക്കുന്നതാണ് ഇക്വിറ്റി മ്യൂച്വൽ ഫണ്ട്. അതുവഴി ദീർഘകാലാടിസ്ഥാനത്തിൽ പണപ്പെരുപ്പത്തെ എളുപ്പത്തിൽ മറികടക്കാൻ കഴിയും. ഇക്വിറ്റികളായി അഥവാ കമ്പനികളുടെ ഓഹരികളായി പണം നിക്ഷേപിക്കുന്ന മ്യൂച്വൽ ഫണ്ടുകളാണ് ഇക്വിറ്റി ഫണ്ട്. ദീർഘകാല നിക്ഷേപങ്ങൾക്ക് അനുയോജ്യമായ സ്കീമാണ് ഇത്. ഇക്വിറ്റി ഫണ്ടുകളിൽ ഉയർന്ന വരുമാനം ലഭിക്കാനുള്ള സാധ്യതയും കൂടുതലാണ്. ഇക്വറ്റി മ്യൂച്ചൽ ഫണ്ടുകൾക്ക് കീഴിൽ വ്യത്യസ്ത നിക്ഷേപ പദ്ധതികൾ ഉണ്ട്

1.ലാർജ് ക്യാപ് ഫണ്ട്: വൻകിട ബിസിനസുകൾ നടത്തുന്ന സ്ഥാപനങ്ങളിൽ മാത്രം നിക്ഷേപിക്കുന്ന മ്യൂച്വൽ ഫണ്ടാണ് ലാർജ് ക്യാപ് ഫണ്ട്.

2. മിഡ് ക്യാപ് ഫണ്ട്: ഇടത്തരം കമ്പനികളിൽ നിക്ഷേപിക്കുന്ന ഫണ്ടാണ് മിഡ് ക്യാപ് മ്യൂച്വൽ ഫണ്ട്.

3. സ്മോൾ ക്യാപ് ഫണ്ട്: ചെറുകിട കമ്പനികളിൽ നിക്ഷേപിക്കുന്ന ഫണ്ടാണ് സ്‌മോൾ ക്യാപ് ഫണ്ട്.

4. മൾട്ടി ക്യാപ് ഫണ്ട്: വൻകിട, ഇടത്തരം, ചെറുകിട കമ്പനികളിൽ ഒരേസമയം നിക്ഷേപിക്കുന്ന ഫണ്ടാണ് മൾട്ടി ക്യാപ് ഫണ്ട്.

പെൻഷൻ വരുമാനത്തിൽ നിന്ന് ഒരു നിശ്ചിത തുക ഇക്വിറ്റി സിസ്റ്റമാറ്റിക് ഇൻവെസ്റ്റ്‌മെന്റ് പ്ലാനിൽ (എസ്‌ഐപി) നിക്ഷേപിക്കാവുന്നതാണ്. കുറഞ്ഞ അപകടസാധ്യതയുള്ള ഓപ്ഷനുകൾക്കായി, ഒരു ആർബിട്രേജ് ഫണ്ടും പര്യവേക്ഷണം ചെയ്യാം.

ഡെറ്റ് ഫണ്ട്

മ്യൂച്ചല്‍ഫണ്ടോ എക്സ്ചേഞ്ച് ട്രേഡഡ് ഫണ്ടോ പോലെയുള്ള നിക്ഷേപക പൂളാണ് ഡെറ്റ് ഫണ്ടുകള്‍.ഇവ ഹ്രസ്വകാല,ദീര്‍ഘകാല ബോണ്ടുകള്‍,സെക്യരിറ്റികള്‍,മണി മാര്‍ക്കറ്റ് പ്ലാനുകള്‍ എന്നിവയിലൊക്കെയാണ് നിക്ഷേപിക്കുന്നത്. ഡെറ്റ് ഫണ്ടുകളിലെ ഫീസ് അനുപാതം ഇക്വിറ്റി ഫണ്ടുകളേക്കാള്‍ കുറവാണ്. കാരണം ഇക്വിറ്റിഫണ്ടുകള്‍ മാനേജ് ചെയ്യുന്ന ചെലവിനേക്കാള്‍ കുറവാണ് ഇവയ്ക്ക്. മൂലധനം സംരക്ഷിക്കുന്നതിനൊപ്പം നഷ്ടസാധ്യത കുറഞ്ഞ പദ്ധതികള്‍ക്കുമായി അന്വേഷിക്കുന്ന നിക്ഷേപകര്‍ക്ക് നല്ലൊരു ഓപ്ഷനാണിത്.

വിവിധ ആവശ്യങ്ങൾക്കായി വ്യത്യസ്ത തരത്തിലുള്ള ഡെറ്റ് മ്യൂച്വൽ ഫണ്ട് സ്കീമുകൾ തിരഞ്ഞെടുക്കാം. ഉദാഹരണത്തിന്, ഹ്രസ്വകാല സാമ്പത്തിക ലക്ഷ്യങ്ങൾ കൈവരിക്കുന്നതിന്, വളരെ ഹ്രസ്വകാല കാലാവധിയുള്ള സെക്യൂരിറ്റികൾ സൂക്ഷിക്കുന്ന ഒരു ലിക്വിഡ് ഫണ്ടിലോ അൾട്രാ-ഹ്രസ്വകാല ഡെറ്റ് ഫണ്ടിലോ നിങ്ങൾക്ക് നിക്ഷേപിക്കാം.

ഹൈബ്രിഡ്, ബാലൻസ്ഡ് അഡ്വാന്റേജ് ഫണ്ട്

ബാലന്‍സ് ഫണ്ടും ബാലന്‍സ്ഡ് അഡ്വാന്റേജ് ഫണ്ടും തമ്മിലുള്ള വ്യത്യാസമെന്തെന്നാല്‍, ബാലന്‍സ്ഡ് ഫണ്ടില്‍ ഇക്വിറ്റി നിക്ഷേപവും ഡെബ്റ്റ് നിക്ഷേപവും ഫിക്‌സ്ഡാണ്. എന്നാല്‍ ബാലന്‍സ്ഡ് അഡ്വാന്റേജ് ഫണ്ടില്‍ കാര്യങ്ങള്‍ ഇങ്ങനെയല്ല. ഇക്വിറ്റിയുടെ വിഹിതം ഓഹരി വിപണിയുടെ സ്വഭാവം അനുസരിച്ച് മാറും. അതായത് അതായത് മാര്‍ക്കറ്റ് ഉയരങ്ങളിലെത്തുമ്പോള്‍ ഇക്വിറ്റിയുടെ ലാഭം ബുക്ക് ചെയ്തിട്ട് ഇക്വിറ്റിയിലെ നിക്ഷേപം കുറച്ച് ഡെബ്റ്റിലെ നിക്ഷേപം കൂട്ടും. ഉപഭോക്താക്കളെ സംബന്ധിച്ച് ഇത് വളരെ റിസ്‌ക് കുറവായിരിക്കും.

മൂലധനം ഉയർന്ന അപകടസാധ്യതയിൽ ഏർപ്പെടാതെ, അസ്ഥിരമായ ഒരു വിപണി ഉണ്ടായിരുന്നിട്ടും നിക്ഷേപത്തിൽ മികച്ച വരുമാനം നേടാൻ ഒരു ഹൈബ്രിഡ് ഫണ്ടിന് സഹായിക്കാനാകുമെന്ന് സാരം. വിരമിച്ചവർക്കായി മ്യൂച്വൽ ഫണ്ടുകൾ ആകർഷകമായ നിരവധി നിക്ഷേപ ഓപ്ഷനുകൾ വാഗ്ദാനം ചെയ്യുന്നുണ്ടെങ്കിലും, അവരുടെ നിക്ഷേപ പോർട്ട്‌ഫോളിയോയ്ക്ക് മികച്ച വൈവിധ്യവൽക്കരണവും കൂടുതൽ സ്ഥിരതയും നൽകുന്നതിന് ചെറുകിട സമ്പാദ്യ പദ്ധതികൾ, സ്ഥിര നിക്ഷേപങ്ങൾ (എഫ്‌ഡി) തുടങ്ങിയ മറ്റ് നിക്ഷേപ പദ്ധതികൾ ഉൾപ്പെടുത്തേണ്ടത് പ്രധാനമാണ്.

അറിയിപ്പ്:

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.