നിങ്ങളുടെ ആദായം പരമാവധിയാക്കുവാന്‍ പിപിഎഫില്‍ എപ്പോള്‍ നിക്ഷേപിക്കണമെന്നറിയാമോ?

ദീര്‍ഘകാല നിക്ഷേപത്തിനായി ഇന്ത്യയ്ക്കാര്‍ക്ക് ഏറ്റവും പ്രിയപ്പെട്ട ചെറുകിട നിക്ഷേപ പദ്ധതിയാണ് പി.പി.എഫ്. അത് സ്ഥിരമായ ആദായം നിക്ഷേപകന് വാഗ്ദാനം ചെയ്യുന്നു. ബാങ്ക് സ്ഥിര നിക്ഷേപങ്ങളെക്കാളും നികുതി കിഴിവുകളും പിപിഎഫില്‍ ലഭിക്കും. പിപിഎഫില്‍ നിക്ഷേപിക്കുന്ന തുകയും പിപിഎഫില്‍ നിന്നും ലഭിക്കുന്ന പലിശ ആദായവും നികുതി മുക്തമാണ്.

നിലവില്‍ 7.1 ശതമാനമാണ് പിപിഎഫ് നിക്ഷേപങ്ങളില്‍ നിന്നും ലഭിക്കുന്ന പലിശ. 2021 ജൂണ്‍ 30ന് അവസാനിക്കുന്ന പാദത്തില്‍ വരെ നിങ്ങളുടെ പിപിഎഫ് നിക്ഷേപത്തിന്മേല്‍ നിങ്ങള്‍ക്ക് 7.1 ശതമാനം നിരക്കില്‍ പലിശ ലഭിക്കും. ഓരോ പാദത്തിലും കേന്ദ്ര സര്‍ക്കാര്‍ പിപിഎഫ് പലിശ നിരക്ക് വിലയിരുത്തി പുതുക്കി നിശ്ചയിക്കാറുണ്ട്.

എന്നാല്‍ പലിശ നിരക്ക് മാത്രമല്ലാതെ പിപിഎഫില്‍ നിക്ഷേപിക്കുമ്പോള്‍ മറ്റു ചില കാര്യങ്ങള്‍ കൂടി നിക്ഷേപകര്‍ ശ്രദ്ധിക്കേണ്ടതുണ്ട്.

ഓരോ സാമ്പത്തിക വര്‍ഷത്തിന്റെയും തുടക്കത്തില്‍ പിപിഎഫില്‍ നിക്ഷേപം നടത്തുന്നതാണ് അഭികാമ്യം. ഈ രീതിയില്‍ നിക്ഷേപം നടത്തിയാല്‍ ഒരു വര്‍ഷത്തേക്ക് മുഴുവനായും നിങ്ങള്‍ക്ക് നിക്ഷേപത്തിന്മേല്‍ പലിശ നേടാന്‍ സാധിക്കും. മിക്കവരും സാമ്പത്തിക വര്‍ഷത്തിന്റെ അവസാനമാകുമ്പോള്‍, മിക്കവാറും മാര്‍ച്ച് മാസത്തിലാണ് 80C വകുപ്പ് പ്രകാരമുള്ള നികുതിയളവ് ലഭിക്കുന്നതിനായി വലിയ അളവിലുള്ള നിക്ഷേപം നടത്തുന്നത്. ഒരു വര്‍ഷം പരമാവധി 1.5 ലക്ഷം രൂപ വരെയുള്ള നിക്ഷേപത്തിന് പലിശ ഇളവ് ലഭിക്കുക.

മാസത്തിലെ അഞ്ചാമത്തെ ദിവസത്തെയും അവസാന ദിവസത്തെയും മിനിമം ബാലന്‍സിന്മേലാണ് പിപിഎഫ് നിക്ഷേപത്തിന്റെ പലിശ കണക്കാക്കുക. ഉദാഹരണത്തിന് ഏപ്രില്‍ 1ന് നിങ്ങളുടെ പിപിഎഫ് അക്കൗണ്ട ബാലന്‍സ് 50,000 രൂപയാണ്. ഏപ്രില്‍ ആറിന് നിങ്ങള്‍ ഒരു 20,000 രൂപ കൂടി നിക്ഷേപം നടത്തുന്നു. അപ്പോള്‍ നിങ്ങളുടെ ഏപ്രില്‍ മാസത്തെ നിക്ഷേപത്തിന്മേല്‍ പലിശ കണക്കാക്കുന്നത് 70,000 രൂപയ്ക്ക് അല്ല 50,000 രൂപയ്ക്ക് ആയിരിക്കും.

അതായത് നിങ്ങള്‍ പ്രതിമാസം പിപിഎഫില്‍ നിക്ഷേപം നടത്താന്‍ ആഗ്രഹിക്കുന്ന വ്യക്തിയാണെങ്കില്‍ അത് എല്ലാ മാസവും 5ാം തീയ്യതിയ്ക്ക് മുമ്പ് നടത്തുന്നതാണ് അഭികാമ്യം. എന്നിരുന്നാലും പരമാവധി പലിശ ആദായം നിങ്ങള്‍ക്ക് ലഭിക്കണമെങ്കില്‍ സാമ്പത്തിക വര്‍ഷത്തിന്റെ തുടക്കത്തില്‍ തന്നെ മുഴുവനായും നിക്ഷേപം നടത്തുക തന്നെ വേണം.