നിങ്ങളുടെ സ്വര്‍ണ, റിയല്‍ എസ്റ്റേറ്റ് നിക്ഷേപങ്ങളിലെ നികുതി അറിയാം

സാധാരണ ഇന്ത്യന്‍ നിക്ഷേപകരുടെ പോര്‍ട്ട്‌ഫോളിയോകളില്‍ വലിയൊരു ഭാഗവും ഉള്‍ക്കൊള്ളുന്നത് റിയല്‍ എസ്‌റ്റേറ്റും സ്വര്‍ണവുമാണ്. എന്നാല്‍ കഴിഞ്ഞ കുറച്ചു വര്‍ഷങ്ങളിലായി റിയല്‍ എസ്‌റ്റേറ്റില്‍ നിന്നും ലഭിക്കുന്ന ആദായം താഴ്ന്നു വരികയാണ് ചെയ്യുന്നത്. അതേ സമയം സ്വര്‍ണത്തില്‍ നിന്നും ദീര്‍ഘകാലാടിസ്ഥാനത്തില്‍ ആകര്‍ഷകമായ ആദായം ലഭിക്കുന്നുമില്ല ഒപ്പം സ്വര്‍ണത്തിന് ഉയര്‍ന്ന ഇടപാട് ചിലവുകളുമുണ്ട്.

സ്വര്‍ണവും റിയല്‍ എസ്റ്റേറ്റും അവയുടെ തനതായ ഉപയോഗങ്ങളില്‍ തുടരുക എന്നതല്ലാതെ ഈ രണ്ട് ആസ്തികളില്‍ നിക്ഷേപം നടത്തുന്നത് സാമ്പത്തിക നേട്ടങ്ങള്‍ മുന്‍നിര്‍ത്തി നോക്കുമ്പോള്‍ യുക്തിപരമല്ലാത്ത തീരുമാനമാണ്.

എന്നാല്‍ പെട്ടെന്ന് സ്വര്‍ണത്തില്‍ നിന്നപം റിയല്‍ എസ്റ്റേറ്റില്‍ നിന്നും പിന്‍വാങ്ങുമ്പോള്‍ അതില്‍ ബാധിക്കപ്പെടുന്ന നികുതി നിയമങ്ങളെക്കുറിച്ച് അറിയേണ്ടതുണ്ട്.

സ്വര്‍ണത്തില്‍ നിന്നും റിയല്‍ എസ്റ്റേറ്റില്‍ നിന്നും ലഭിക്കുന്ന ദീര്‍ഘകാല - ഹ്രസ്വകാല ആദായങ്ങള്‍ക്ക് ബാധകമാകുന്ന നികുതികള്‍ ഏതൊക്കെയെന്ന് നമുക്ക് നോക്കാം.

സ്വര്‍ണത്തിലെ ദീര്‍ഘകാല നിക്ഷേപമെന്നത് 3 വര്‍ഷത്തിലേറെയുള്ള നിക്ഷേപങ്ങളാണ്. നിക്ഷേപത്തിലെ ഹ്രസ്വകാല മൂലധന നേട്ടങ്ങള്‍ക്ക് സ്ലാബ് നിരക്കും ദീര്‍ഘകാല മൂലധന നേട്ടങ്ങള്‍ക്ക് 20.8 ശതമാനവുമാണ് നികുതി.

സോവറീന്‍ ഗോള്‍ഡ് ബോണ്ടുകള്‍ ലിസ്റ്റ് ചെയ്തവയാണെങ്കില്‍ 1 വര്‍ഷവും ലിസ്റ്റ് ചെയ്യാത്തവയാണെങ്കില്‍ 3 വര്‍ത്തേക്കുള്ളവയുമാണ് ദീര്‍ഘകാല നിക്ഷേപമെന്ന് പറയുന്നത്. ഇവയുടെ പലിശ നിരക്കിന്മേലുള്ള നികുത സ്ലാബ് നിരക്കിലാണ്. ഹ്രസ്വകാല മൂലധന നേട്ടങ്ങളുടെയും നികുതി നിരക്ക് സ്ലാബ് നിരക്കിലാണ്. ദീര്‍ഘകാല മൂലധന നേട്ടങ്ങള്‍ക്കുള്ള നികുതി നിരക്ക് 20.8 ശതമാനമാണ്.

റിയല്‍ എസ്റ്റേറ്റില്‍ രണ്ട് വര്‍ഷത്തിന് മുകളിലുള്ള നിക്ഷേപങ്ങള്‍ക്കാണ് ദീര്‍ഘകാല നിക്ഷേപങ്ങള്‍ എന്ന് പറയുന്നത്. ഇതില്‍ ഹ്രസ്വകാല മൂലധന നേട്ടങ്ങളുടെ നികുതി നിരക്ക് സ്ലാബ് നിരക്കിലാണ്. ദീര്‍ഘകാല മൂലധന നേട്ടങ്ങളുടെ നികുതി 20.8 ശതമാനവും.