ക്രെഡിറ്റ് കാർഡ് തട്ടിപ്പിന് ഇരയായാൽ എന്ത് ചെയ്യും? ഈ 5 കാര്യങ്ങൾ അറിഞ്ഞിരിക്കണം

സാങ്കേതികവിദ്യയുടെ വളർച്ചയ്ക്കനുസരിച്ച്, രാജ്യത്ത് ക്രെഡിറ്റ് കാർഡിന്റെ ഉപയോഗവും അതുമായി ബന്ധപ്പെട്ട തട്ടിപ്പുകളും വർദ്ധിച്ചുകൊണ്ടിരിക്കുകയാണ്. ഡിജിറ്റൽ സാങ്കേതികവിദ്യയുടെ വ്യാപനവും കാർഡ് ലഭിക്കുന്നതിനുള്ള നടപടിക്രമങ്ങളിലെ എളുപ്പവുമാണ് ഇതിന് പ്രധാന കാരണം.

ഇങ്ങനെയുള്ള സാഹചര്യത്തിൽ, ക്രെഡിറ്റ് കാർഡ് ഉടമയുടെ മൊബൈൽ ഫോണിൽ വരുന്ന ഒരൊറ്റ അനധികൃത ഇടപാട് സന്ദേശമോ ഡെബിറ്റ് സന്ദേശമോ പോലും വലിയ സാമ്പത്തികവും വൈകാരികവുമായ സമ്മർദ്ദത്തിന് കാരണമാകും. ഇത്തരം സന്ദർഭങ്ങളിൽ നഷ്ടം കുറയ്ക്കുന്നതിനും സമയബന്ധിതമായ പരിഹാരം ഉറപ്പാക്കുന്നതിനും വേഗത്തിലും ആസൂത്രിതമായും പ്രവർത്തിക്കുക എന്നത് നിർണായകമാണ്.

ആർ.ബി.ഐ (റിസർവ് ബാങ്ക് ഓഫ് ഇന്ത്യ) മാനദണ്ഡങ്ങൾ അനുസരിച്ച്, അനധികൃത ഇടപാടുകൾക്ക് ക്രെഡിറ്റ് കാർഡ് ഉടമകൾക്ക് സീറോ ലയബിലിറ്റിയാണുള്ളത്. ഈ പരിരക്ഷ ലഭിക്കണമെങ്കിൽ, തട്ടിപ്പ് സംബന്ധിച്ച വിവരം നിശ്ചിത സമയപരിധിക്കുള്ളിൽ കൃത്യമായി റിപ്പോർട്ട് ചെയ്യണം. കൂടാതെ, ബാങ്കിന്റെയോ സിസ്റ്റത്തിന്റെയോ അശ്രദ്ധ പോലുള്ള മറ്റ് നിബന്ധനകൾക്കും ഇത് വിധേയമാണ്. 

അതുകൊണ്ട് തന്നെ, ക്രെഡിറ്റ് കാർഡ് തട്ടിപ്പ് എന്താണെന്നും, അത് എങ്ങനെ തടയാമെന്നും ക്രെഡിറ്റ് കാർഡ് ഉടമകൾ മനസ്സിലാക്കേണ്ടത് അത്യാവശ്യമാണ്. തട്ടിപ്പ് ശ്രദ്ധയിൽപ്പെട്ടാൽ ഉടൻ സ്വീകരിക്കേണ്ട അഞ്ച് സുപ്രധാന നടപടികൾ ഇവയാണ്.

1. കാർഡ് ഉടൻ ബ്ലോക്ക് ചെയ്യുക

ഇത്തരം കേസുകളിൽ സാമ്പത്തിക നഷ്ടം പരിമിതപ്പെടുത്തുക എന്നതാണ് ആദ്യ ലക്ഷ്യം. അതിനായി, ഉടൻ തന്നെ ക്രെഡിറ്റ് കാർഡ് ബ്ലോക്ക് ചെയ്യുക. ബാങ്കിന്റെ മൊബൈൽ ആപ്ലിക്കേഷൻ, നെറ്റ് ബാങ്കിംഗ് പോർട്ടൽ അല്ലെങ്കിൽ 24x7 ഹെൽപ്പ് ലൈൻ വഴി ഇത് ചെയ്യാനാകും. ഈ നടപടി ഉപയോക്താവിന് ആവശ്യമായ ആശ്വാസവും സാഹചര്യം കൈകാര്യം ചെയ്യാനുള്ള സമയവും നൽകും.

2. ബാങ്കിൽ ഔദ്യോഗികമായി പരാതി നൽകുക

തട്ടിപ്പ് സംബന്ധിച്ച് ക്രെഡിറ്റ് കാർഡ് നൽകിയ ബാങ്കിനോ സാമ്പത്തിക സ്ഥാപനത്തിനോ രണ്ടാമതായി പരാതി നൽകണം. ഇടപാട് ഐഡി, തുക, തീയതി എന്നിവ കൃത്യമായി രേഖപ്പെടുത്തിയ ഡിസ്‌പ്യൂട്ട് ഫോം പൂരിപ്പിച്ച് നൽകണം. ഈ ഇടപാട് താനല്ല നടത്തിയതെന്ന് ഉപയോക്താവ് സ്ഥിരീകരിക്കേണ്ടതുണ്ട്.

3. ഔദ്യോഗിക ചാനലുകൾ വഴി പരാതി സമർപ്പിക്കുക

പ്രശ്‌നത്തിന് വേഗത്തിൽ പരിഹാരം കാണുന്നതിനായി എല്ലാ ഔദ്യോഗിക പ്ലാറ്റ്‌ഫോമുകളിലും പരാതികൾ സമർപ്പിക്കുന്നത് ഉറപ്പാക്കുക. ബാങ്കിന്റെ കസ്റ്റമർ കെയർ, ആർബിഐയുടെ ഔദ്യോഗിക പരാതി പരിഹാര സംവിധാനം എന്നിവ കൂടാതെ, ഏറ്റവും അടുത്തുള്ള പോലീസ് സ്റ്റേഷനിൽ പരാതി നൽകുകയോ ഓൺലൈൻ പരാതി നൽകുകയോ ചെയ്യുന്നതും പ്രധാനമാണ്.

4. തെളിവുകൾ സൂക്ഷിക്കുക

എസ്എംഎസ് അലേർട്ടുകൾ, എഫ്ഐആറിന്റെ പകർപ്പുകൾ, തട്ടിപ്പ് ഇടപാടിന്റെ സ്ക്രീൻഷോട്ടുകൾ, ബാങ്കുമായി കൈമാറിയ ഇമെയിലുകൾ, ബാങ്കിൽ നിന്ന് ലഭിച്ച മറുപടികളുടെ സ്ക്രീൻഷോട്ടുകൾ എന്നിവ ഉൾപ്പെടെയുള്ള എല്ലാ രേഖകളും തെളിവായി സൂക്ഷിക്കുക. ഈ രേഖകൾ നിങ്ങളുടെ കേസിനെ പിന്തുണയ്ക്കുകയും നഷ്ടപ്പെട്ട പണം തിരികെ ലഭിക്കാൻ സഹായിക്കുകയും ചെയ്യും.

5. അക്കൗണ്ട് സ്ഥിരമായി നിരീക്ഷിക്കുക

പരാതി സമർപ്പിക്കൽ നടപടിക്രമങ്ങൾ പൂർത്തിയാക്കിയ ശേഷം, തുകയുടെ തിരിച്ചടവ് സംബന്ധിച്ച അപ്‌ഡേറ്റുകൾ ശ്രദ്ധിക്കുകയും അക്കൗണ്ട് സ്ഥിരമായി നിരീക്ഷിക്കുകയും ചെയ്യുക. ചാർജ്ബാക്ക് സമയപരിധികൾ ശ്രദ്ധിക്കുകയും ഭാവിയിലെ സ്റ്റേറ്റ്‌മെന്റുകളിൽ എന്തെങ്കിലും പിഴവുകളുണ്ടോ എന്ന് പരിശോധിക്കുകയും വേണം.

ഭാവിയിലെ തട്ടിപ്പുകൾ തടയാൻ ശ്രദ്ധിക്കേണ്ട കാര്യങ്ങൾ

* വിദേശ, ഓൺലൈൻ ഇടപാടുകൾ ആവശ്യമുള്ളപ്പോൾ മാത്രം പ്രവർത്തനക്ഷമമാക്കുക.

* ഇടപാട് പരിധി നിശ്ചയിക്കുകയും തത്സമയ അലേർട്ടുകൾ ഉറപ്പാക്കുകയും ചെയ്യുക.

* ഓൺലൈൻ പേയ്‌മെന്റുകൾ നടത്തുമ്പോൾ സുരക്ഷിതമായ നെറ്റ്‌വക്കുകൾ മാത്രം ഉപയോഗിക്കുക.

* എടിഎം പിൻ, ക്രെഡിറ്റ് കാർഡ് ലോഗിൻ പാസ്‌വേഡുകൾ എന്നിവ ഇടയ്ക്കിടെ മാറ്റുന്നത് സുരക്ഷ വർദ്ധിപ്പിക്കും.