ഏറ്റവും ഉയര്‍ന്ന സേവിംഗ്‌സ് അക്കൗണ്ട് പലിശ നിരക്കാണോ നിങ്ങള്‍ക്ക് വേണ്ടത്? ഈ മൂന്ന് ബാങ്കുകളില്‍ ചെന്നോളൂ

സേവിംഗ്‌സ് അക്കൗണ്ടിന്റെ പലിശ നിരക്ക് ഏതൊരു ബാങ്ക് നിക്ഷേപകനും എപ്പോഴും അറിഞ്ഞിരിക്കേണ്ട കാര്യമാണ്. അടിയന്തിര സാഹചര്യങ്ങളില്‍ പണം ആവശ്യമായി വരുന്ന നിക്ഷേപകര്‍ക്ക് സേവിംഗ്‌സ് അക്കൗണ്ടില്‍ പണം നിക്ഷേപിക്കുക എന്നത് ഇപ്പോഴും മികച്ച ഒരു തെരഞ്ഞെടുപ്പ് തന്നെയാണ്.

ഹ്രസ്വകാല നിക്ഷേപങ്ങള്‍ക്കായി അനുയോജ്യമായ നിക്ഷേപ പദ്ധതികള്‍ കണ്ടെത്തുവാന്‍ സാധിക്കാത്ത നിക്ഷേപകര്‍ക്കും സേവിംഗ്‌സ് അക്കൗണ്ടിനെ ആശ്രയിക്കാവുന്നതാണ്. എന്നാല്‍ ഏറ്റവും മികച്ച ആദായം ഉറപ്പുവരുത്തിയെങ്കില്‍ മാത്രമേ ഇത്തരം നിക്ഷേപങ്ങള്‍ അര്‍ഥപൂര്‍ണമാവുകയുള്ളൂ. ഉപയോക്താക്കള്‍ക്ക് സേവിംഗ് ബാങ്ക് അക്കൗണ്ടിന്മേല്‍ ഏറ്റവും ഉയര്‍ന്ന പലിശ നിരക്ക് വാഗ്ദാനം ചെയ്യുന്ന മൂന്ന് ബാങ്കുകള്‍ ആര്‍ബിഎല്‍ ബാങ്ക്, ബന്ധന്‍ ബാങ്ക്, യെസ് ബാങ്ക് എന്നിവയാണ്.

ഇന്ത്യന്‍ ബാങ്കുകളില്‍ ഏറ്റവും ഉയര്‍ന്ന സേവിംഗ്‌സ് അക്കൗണ്ട് പലിശ നിരക്ക് നല്‍കുന്നത് ആര്‍ബിഎല്‍ ബാങ്കാണ്. ആര്‍ബിഎല്‍ ബാങ്കിന്റെ ഔദ്യോഗിക വെബ്‌സൈറ്റ് പ്രകാരം സേവിംഗ്‌സ് അക്കൗണ്ടുകള്‍ക്ക് നല്‍കുന്ന പലിശ നിരക്ക് 4.5 ശതമാനം മുതല്‍ 6.25 ശതമാനം വരെയാണ്. 1 ലക്ഷം രൂപ വരെയുള്ള ഡെയിലി ബാലന്‍സിന് മേല്‍ 4.5 ശതമാനമാണ് പലിശ നിരക്ക്. 1 ലക്ഷം രൂപ മുതല്‍ 10 ലക്ഷം രൂപ വരെയുള്ള നിക്ഷേപത്തിന് 6 ശതമാനമാണ് പലിശ നിരക്ക്. 10 ലക്ഷം രൂപയ്ക്ക് മുകളിലുള്ള നിക്ഷേപത്തിന് 6.25 ശതമാനവും പലിശ നിരക്ക് ലഭിക്കും.

ഡെയ്‌ലി ബാലന്‍സിന്റെ അടിസ്ഥാനത്തില്‍ 3 ശതമാനം മുതല്‍ 6 ശതമാനം വരെയാണ് ബന്ധന്‍ ബാങ്ക് സേവിംഗ്‌സ് അക്കൗണ്ടില്‍ പലിശ വാഗ്ദാനം ചെയ്യുന്നത്. 1 ലക്ഷം രൂപ വരെയുള്ള ബാലന്‍സിന് 3 ശതമാനവും, 1 ലക്ഷം രൂപ മുതല്‍ 10 ലക്ഷം രൂപ വരെയുള്ള ബാലന്‍സ് തുകയ്ക്ക് 4 ശതമാനവുമാണ് പലിശ നിരക്ക്. 10 ലക്ഷം രൂപയ്ക്ക് മുകളിലുള്ള അക്കൗണ്ട് ബാലന്‍സിന് 6 ശതമാനം പലിശ നിരക്കാണ് ബന്ധന്‍ ബാങ്ക് നിക്ഷേപകര്‍ക്കായി നല്‍കുന്നത്.

യെസ് ബാങ്ക് 4 ശതമാനം മുതല്‍ 5.5 ശതമാനം വരെ പലിശ നിരക്കാണ് സേവിംഗ്‌സ് അക്കൗണ്ടില്‍ നിക്ഷേപകര്‍ക്ക് നല്‍കുന്നത്. 1 ലക്ഷം രൂപ വരെയുള്ള ബാലന്‍സിന് 4 ശതമാനമാണ് പലിശ നിരക്ക്. 1 ലക്ഷം മുതല്‍ 10 ലക്ഷം വരെയുള്ള ബാലന്‍സ് തുകയ്ക്ക് 4.75 ശതമാനമാണ് പലിശ നിരക്ക് നല്‍കുന്നത്. 1 ലക്ഷം മുതല്‍ 100 കോടി വരെയുള്ള നിക്ഷേപങ്ങള്‍ക്ക് 5.5 ശതമാനമാണ് യെസ് ബാങ്ക് പലിശ നിരക്ക് വാഗ്ദാനം ചെയ്യുന്നത്.