സേവിംഗ്‌സ് അക്കൗണ്ടില്‍ ഏറ്റവും കൂടുതല്‍ പലിശ തരുന്ന ബാങ്കുകള്‍ ഏതെന്ന് അറിയാമോ?

സ്ഥിര നിക്ഷേപങ്ങളെ അപേക്ഷിച്ച് നോക്കുമ്പോള്‍ സാധാരണഗതിയില്‍ സേവിംഗ്‌സ്് ബാങ്ക് അക്കൗണ്ടുകളില്‍ നിന്നും ലഭിക്കുന്ന പലിശ നിരക്ക് കുറഞ്ഞ അളവിലാണ് ലഭിക്കുന്നത്.

സ്വകാര്യ മേഖലയിലെ ബാങ്കുകള്‍ നല്‍കുന്നതിനേക്കാളും കുറഞ്ഞ നിരക്കിലുള്ള പലിശയാണ് പൊതുമേഖലാ ബാങ്കുകള്‍ നല്‍കുന്നത്.

പൊതുമേഖലാ ബാങ്കുകളില്‍ ഐഡിബിഐ ബാങ്കും പഞ്ചാബ് നാഷണല്‍ ബാങ്കും സേവിംഗ്‌സ് അക്കൗണ്ടില്‍ 3.5 ശതമാനം വരെ പലിശ നിരക്ക് വാഗ്ദാനം ചെയ്യുന്നുണ്ട്. ബാങ്ക് ഓഫ് ബറോഡയും കാനറ ബാങ്കും നല്‍കുന്നത് 3.2 ശതമാനമാണ്.

മുന്‍നിര സ്വകാര്യ മേഖലയിലെ ബാങ്കുകളുമായി താരതമ്യം ചെയ്യുമ്പോള്‍ ഈ നിരക്കുകള്‍ മത്സരക്ഷമതയുള്ളവയാണ്.
എച്ച്ഡിഎഫ്‌സി ബാങ്കും ഐസിഐസിഐ ബാങ്കും 3 ശതമാനം മുതല്‍ 3.5 ശതമാനം വരെ പലിശ നിരക്കാണ് സേവിംഗ്‌സ് അക്കൗണ്ട് ഉപയോക്താക്കള്‍ക്ക് നല്‍കുന്നത്. കൊഡാക്ക് മഹീന്ദ്ര ബാങ്ക് നല്‍കുന്നത് 3.5 മുതല്‍ 4 ശതമാനം വരെയാണ്.

എന്നിരുന്നാലും വലിയ പൊതുമേഖലാ സ്ഥാപനങ്ങള്‍ സേവിംഗ്‌സ് അക്കൗണ്ട് ഉപയോക്താക്കള്‍ക്ക് തീരെ ചെറിയ പലിശ നിരക്കാണ് നല്‍കി വരുന്നത്. സ്റ്റേറ്റ് ബാങ്ക് ഓഫ് ഇന്ത്യ 2.70 ശതമാനമാണ് ഉപയോക്താക്കള്‍ക്ക് വാഗ്ദാനം ചെയ്യുന്നത്. യൂകോ ബാങ്ക് 2.50 ശതമാനവും.

ചെറുകിട ബാങ്കുകളായ എയു സ്‌മോള്‍ ഫിനാന്‍സ് ബാങ്കും ഉജ്ജീവന്‍ സ്‌മോള്‍ ഫിനാന്‍സ് ബാങ്കും 7 ശതമാനം വരെ സേവിംഗ്‌സ് അക്കൗണ്ടുകള്‍ക്ക് പലിശ നിരക്ക് നല്‍കി വരുന്നുണ്ട്.

പൊതുമേഖലാ ബാങ്കുകളില്‍ സുക്ഷിക്കേണ്ടുന്ന മിനിമം ബാലന്‍സ് ചുരുങ്ങിയ തുക 250 രൂപ മുതലാണ്. സ്റ്റേറ്റ് ബാങ്ക് ഓഫ് ഇന്ത്യയില്‍ മിനിമം ബാലന്‍സ് ആവശ്യമില്ല. ആക്‌സിസ് ബാങ്കിനും എച്ച്ഡിഎഫ്‌സി ബാങ്കിനും മിനിമം ബാലന്‍സ് 2,500 മുതല്‍ 10,000 രൂപ വരെയാണ്. ഐസിഐസി ബാങ്കില്‍ ഇത് 1,000 മുതല്‍ 10,000 രൂപ വരെയാണ്.