വിദ്യാഭ്യാസ വായ്പ എടുക്കാം ഏറ്റവും കുറഞ്ഞ പലിശ നിരക്കില്‍ ; ഈ ബാങ്കുകളില്‍ ചെന്നോളൂ

രാജ്യത്തോ വിദേശത്തോ മികച്ച ഉന്നത പഠനം നേടുന്നതിനായി കുറഞ്ഞ നിരക്കില്‍ ഒരു വായ്പ കണ്ടെത്തുക എന്നതിന് പുറമേ വിദ്യാഭ്യാസ വായ്പകള്‍ക്ക് നികുതി നേട്ടങ്ങളുടെ ഗുണകരമായ മറ്റൊരു ഭാഗം കൂടിയുണ്ട്. ആദായ നികുതി നിയമത്തിന്റെ വകുപ്പ് 80ഇ പ്രകാരമാണ് വിദ്യാഭ്യാസ വായ്പകള്‍ക്ക് നികുതി നേട്ടങ്ങള്‍ ലഭിക്കുക. ഉന്നത വിദ്യാഭ്യാസം എന്ന് പറയുന്നത് സെക്കന്ററി സ്‌കൂള്‍ സര്‍ട്ടിഫിക്കറ്റ് (എസ്എസ്‌സി)യോ സമാന പരീക്ഷകളോ പൂര്‍ത്തിയാക്കിയതിന് ശേഷമുള്ള വൊക്കേഷണല്‍ ട്രെയിനിംഗ് കോഴ്‌സുകള്‍ എന്നിവ ഉള്‍പ്പെടെയാണ്.

എട്ട് വര്‍ഷത്തേക്കോ, വായ്പാ തിരിച്ചടവ് അവസാനിക്കും വരെയോ , ഏതാണ് ആദ്യം നടക്കുന്നത് , അതുവരെ വായ്പാ വലിശ ഇനത്തില്‍ അടയ്ക്കുന്ന മുഴുവന്‍ തുകയും നികുതി കിഴിവിന് അര്‍ഹമാണ്. നിങ്ങള്‍ സ്വന്തം പേരില്‍ വിദ്യാഭ്യാസ വായ്പ എടുത്തിട്ടുണ്ടെങ്കിലോ, നിങ്ങളുടെ പങ്കാളിയ്ക്ക് വേണ്ടി വായ്പ എടുത്തിട്ടുണ്ടെങ്കിലോ, കുട്ടികള്‍ക്കായി വിദ്യാഭ്യാസ വായ്പ എടുത്തിരിക്കുന്നുവെങ്കിലോ നിങ്ങള്‍ക്ക് നികുതി ഇളവ് ലഭിക്കും. എന്നാല്‍ ഭവന വായ്പയെ പോലെ ഇഎംഐയിലെ മുതല്‍ തുക നിങ്ങള്‍ക്ക് ഒരു തരത്തിലുള്ള നികുതി കിഴിവുകളും നല്‍കുന്നില്ല.

നിലവില്‍ വിദ്യാഭ്യാസ വായ്പകള്‍ക്ക് ഏറ്റവും കുറഞ്ഞ പലിശ നിരക്ക് ഈടാക്കുന്നത് യൂണിയന്‍ ബാങ്കാണ്. യൂണിയന്‍ ബാങ്ക് 6.8 ശതമാനം പലിശ നിരക്കാണ് വായ്പകള്‍ക്ക് ഈടാക്കുന്നത്.അതേസമയം സെന്‍ട്രല്‍ ബാങ്ക് ഓഫ് ഇന്ത്യ, ബാങ്ക് ഓഫ് ഇന്ത്യ, ബാങ്ക് ഓഫ് ബറോഡ, എസ്ബിഐ എന്നിവ 6.85 ശതമാനം പലിശ നിരക്കാണ് ഈടാക്കുന്നത്.

ഉന്നത വിദ്യാഭ്യാസത്തിനായി വായ്പകളെ ആശ്രയിക്കുന്ന വിദ്യാര്‍ത്ഥികളുടെ എണ്ണം ഓരോ വര്‍ഷവും കൂടി വരികയാണ്. 2016-17ല്‍ 2.98 ലക്ഷം വിദ്യാര്‍ത്ഥികളാണ് വായ്പ നേടിയത്. 2019-20ല്‍ 3.09 ലക്ഷത്തോളം പേര്‍ വായ്പ നേടി. വിദ്യാഭ്യാസ വായ്പകളുടെ 70 ശതമാനവും പൊതുമേഖലാ ബാങ്കുകളാണ് വിതരണം ചെയ്യുന്നത്.

കേന്ദ്ര സര്‍ക്കാര്‍ നടപ്പാക്കിയ വിദ്യാഭ്യാസ വായ്പ ഗാരന്റി സ്‌കീം വഴി സഹകരണ ബാങ്കുകള്‍ ഉള്‍പ്പെടെ ഷെഡ്യൂള്‍ഡ് ബാങ്കുകള്‍ ഏഴര ലക്ഷം രൂപ വരെയുള്ള വായ്പകള്‍ ഈടില്ലാതെ നല്‍കും. വസ്തു പണയം, ആള്‍ ജാമ്യം എന്നിവ ആവശ്യമില്ലാതെ ഇവിടെ നിന്ന് വിദ്യാഭ്യാസ വായ്പകള്‍ ലഭിക്കും. പഠനം പൂര്‍ത്തിയാക്കിയാല്‍ ജോലിയില്‍നിന്നോ സ്വയം തൊഴിലില്‍ നിന്നോ ലഭിക്കാവുന്ന വരുമാനത്തിന്റെ 30 ശതമാനത്തില്‍ താഴെ വരുന്ന തുക മാത്രം തിരിച്ചടവ് വരാവുന്ന തുകയായിരിക്കണം വായ്പയായി എടുക്കേണ്ടത് എന്ന് പ്രത്യേകം ശ്രദ്ധിക്കണം. ആവശ്യത്തിലധികം തുക വായ്പായായി എടുക്കുന്നത് ഭാവിയില്‍ സാമ്പത്തിക പ്രയാസങ്ങള്‍ ഉണ്ടാകാന്‍് കാരണമാകും.

രേഖകളെല്ലാം കൃത്യമെങ്കില്‍ ബാങ്കിതര ധനകാര്യ സ്ഥാപനങ്ങളും വിദ്യാഭ്യാസ വായ്പ അനുവദിച്ചു നല്‍കുന്നുണ്ട്. എന്നാല്‍ പലിശ അധികമായി നല്‍കേണ്ടി വന്നേക്കാം. പലിശ സബ്‌സിഡി, വായ്പ ഗാരന്റി സ്‌കീമുകളൊക്കെ വാണിജ്യ ബാങ്കുകള്‍ നല്‍കുന്ന വായ്പകള്‍ക്കാണ് ലഭ്യമാക്കുക.