എന്‍എസ്‌സിയോ ബാങ്കിലെ സ്ഥിര നിക്ഷേപമോ? നികുതി കുറയ്ക്കാന്‍ ഏതാണ് ആദായകരം ?

സാമ്പത്തിക വര്‍ഷം അവസാനിക്കാന്‍ ഇനി ദിവസങ്ങള്‍ മാത്രം ബാക്കിയാകുമ്പോള്‍ നികുതി ഇളവ് നേടുന്നതിനായുള്ള അവസാന നിമിഷ ഓട്ടത്തിലാണ് പലരും.

ഇവരില്‍ ഏറ്റവും കൂടുതല്‍ പേര്‍ പരിഗണിക്കുന്നത് രണ്ട് പദ്ധതികളാണ്. നാഷണല്‍ സേവിംഗ് സര്‍ട്ടിഫിക്കേറ്റ് (എന്‍എസ്സി), അല്ലെങ്കില്‍ ബാങ്കുകളിലെ 5 വര്‍ഷ സ്ഥിര നിക്ഷേപവും. രണ്ടും 80C വകുപ്പിന് കീഴില്‍ 1.5 ലക്ഷം രൂപ വരെ നികുതി ഇളവ് ലഭിക്കാവുന്ന പദ്ധതികളാണ്.

രണ്ടിനും 5 വര്‍ഷത്തെ ലോക്ക് ഇന്‍ പിരീഡുണ്ട്. രണ്ട് പദ്ധതികളുടെയും പ്രത്യേകതകള്‍ എന്തൊക്കെയെന്ന് നമുക്ക് നോക്കാം.

പലിശ നിരക്ക് :

സ്ഥിര നിക്ഷേപങ്ങളുടെ പലിശ നിരക്ക് ഓരോ ബാങ്കുകള്‍ക്കുമനുസരിച്ച് വ്യത്യാസപ്പെട്ടിരിക്കും. നിലവില്‍ അത് 5.3 ശതമാനത്തിനും 7 ശതമാനത്തിനും ഇടയിലാണ്. 2021 മാര്‍ച്ചില്‍ അവസാനിക്കുന്ന പാദത്തില്‍ വരെ എന്‍എസ്‌സി നിശ്ചയിച്ചിരിക്കുന്ന പലിശ നിരക്ക് 6.8 ശതമാനമാണ്. ഓരോ പാദത്തിലും സര്‍ക്കാര്‍ എന്‍സ്‌സിയുടെ പലിശ നിരക്ക് പുതുക്കാറുണ്ട്. എന്നാല്‍ ബാങ്കുകളിലെ സ്ഥിര നിക്ഷേപത്തിന്റെ പലിശ നിരക്ക് നിശ്ചയിക്കുന്നത് ബാങ്കുകളാണ്.

ബാങ്കുകളുടെ പലിശ നിരക്കിന്മേല്‍ ടിഡിഎസ് ബാധകമാണ്. അതേ സമയം എന്‍എസ്‌സിയില്‍ ടിഡിഎസ് ബാധകമല്ല.

പലിശയുടെ പുനര്‍നിക്ഷേപം :

എന്‍എസ്‌സിയില്‍ നിന്നും ബാങ്കിലെ സ്ഥിര നിക്ഷേപത്തില്‍ നിന്നും ലഭിക്കുന്ന പലിശ നിക്ഷേപകരില്‍ നിന്നും നികുതി ചുമത്തപ്പെടുന്നവയാണ്. എന്‍എസ്‌സിയില്‍ നിക്ഷേപത്തിന് ലഭിക്കുന്ന പലിശ നിക്ഷേപകര്‍ക്ക് കൈമാറുകയല്ല ചെയ്യുന്നത്, അത് വീണ്ടും പുനര്‍ നിക്ഷേപിക്കപ്പെടുകയും തുക കുന്നുകൂടുകയും ചെയ്യുകയാണ് ചെയ്യുന്നത്.

ബാങ്ക് സ്ഥിര നിക്ഷേപത്തില്‍ നിക്ഷേപകന് രണ്ട് സാധ്യതകളുണ്ട്. ഒന്നുകില്‍ പലിശ കൂട്ടി വച്ച് കാലാവധി പൂര്‍ത്തിയാകുമ്പോള്‍ നിക്ഷേപ തുകയ്‌ക്കൊപ്പം വാങ്ങാം, അല്ലെങ്കില്‍ ഓരോ പാദത്തിലും പലിശ വാങ്ങിക്കാം. എന്നാല്‍ സ്ഥിര നിക്ഷേപത്തിന്മേലുള്ള പലിശയ്ക്ക് സെക്ഷന്‍ 80Cയ്ക്ക് കീഴില്‍ കിഴിവിന് അര്‍ഹതയില്ല. എന്നാല്‍ എന്‍എസ്‌സിയുടെ പലിശയ്ക്ക് ഈ കിഴിവ് ലഭിക്കും.

എന്‍എസ്‌സിയ്ക്കും നികുതി ഇളവിനായുള്ള ബാങ്കിലെ സ്ഥിര നിക്ഷേപത്തിനും ഒരേ കാലാവധിയാണ്. രണ്ടിനും പരമാവധി നിക്ഷേപ തുകയ്ക്ക് പരിധിയുമില്ല. എന്നാല്‍ നിക്ഷേപത്തിനായി കൂടുതല്‍ മികച്ചതായി വിദഗ്ധര്‍ അഭിപ്രായപ്പെടുന്നത് എന്‍എസ്‌സിയാണ്. എന്‍എസ്‌സിയുടെ ഉയര്‍ന്ന പലിശ നിരക്കാണ് ഇതിന് കാരണം.