ക്രെഡിറ്റ് കാര്‍ഡോ സാലറി ഓവര്‍ ഡ്രാഫ്‌റ്റോ , ഏതാണ് ലാഭകരം?

മാസാവസാനമാകുമ്പോള്‍ കൈയ്യില്‍ പണമില്ലാതെ പ്രയാസപ്പെടുന്ന യുവാക്കളെയാണ് വായ്പാ സ്ഥാപനങ്ങളെല്ലാം പ്രധാനമായും ലക്ഷ്യം വയക്കുന്നത്. എന്നാല്‍ ചില ബാങ്കുകള്‍ സാലറി ഓവര്‍ ഡ്രാഫ്റ്റ് എന്ന പേരില്‍ സമാനമായ മറ്റൊരു ഉത്പ്പന്നം കൂടി വാഗ്ദാനം ചെയ്യുന്നു. എന്താണ് സാലറി ഓവര്‍ ഡ്രാഫ്റ്റെന്ന് നമുക്ക് നോക്കാം.

പല ആവശ്യങ്ങള്‍ക്കുമായി പല തരത്തിലുള്ള വായ്പകള്‍ ബാങ്കുകള്‍ ഉപയോക്താക്കള്‍ക്കായി നല്‍കുന്നുണ്ട്. അവയില്‍ കൈകാര്യം ചെയ്യാന്‍ ഏറ്റവും എളുപ്പമുള്ള ഒന്നാണ് സാലറി ഓവര്‍ ഡ്രാഫ്റ്റ്. ഹ്രസ്വകാലത്തേക്ക് പണം കണ്ടെത്തുവാനുള്ള ഏറ്റവും അനുയോജ്യമായ മാര്‍ഗമാണിത്. ഇതെങ്ങനെയാണ് ഉപയോഗപ്പെടുത്തുക എന്നറിയണ്ടേ?

നിങ്ങളുടെ സാലറി അക്കൗണ്ടിന്മേല്‍ വായ്പ അനുവദിക്കുന്ന പദ്ധതിയാണ് സാലറി ഓവര്‍ ഡ്രാഫ്റ്റ്. ലളിതമായി പറഞ്ഞാല്‍ സാലറി ഓവര്‍ ഡ്രാഫ്റ്റ് ക്രെഡിറ്റ് കാര്‍ഡിന് സമാനമാണ്. ഇത് പ്രകാരം നിങ്ങള്‍ക്ക് ആവശ്യമുളള സമയത്ത് ബാങ്കിന്റെ നിബന്ധനകള്‍ അനുസരിച്ച് ഒരു നിശ്ചിത തുക പിന്‍വലിക്കുവാന്‍ സാധിക്കും. എത്ര തുക പിന്‍വലിക്കാം എന്നതിന് ഓരോ ബാങ്കുകള്‍ക്കും ഓരോ തരത്തിലുള്ള നിബന്ധന നയങ്ങളാണുള്ളത്. പരമാവധി നിങ്ങളുടെ ശമ്പളത്തിന്റെ മൂന്ന് മടങ്ങായിരിക്കും സാലറി ഓവര്‍ ഡ്രാഫ്റ്റ് വഴി പിന്‍വലിക്കുവാന്‍ സാധിക്കുക.

എന്നാല്‍ ചില ബാങ്കുകള്‍ ശമ്പളത്തിന്റെ 80 മുതല്‍ 90 ശതമാനം വരെയായി പിന്‍വലിക്കല്‍ തുക നിശ്ചയിച്ചിട്ടുണ്ട്. ഇതില്‍ ഏതാണോ ചെറിയ തുക അതായിരിക്കും സാമാന്യേന ബാങ്കുകള്‍ സാലറി ഓവര്‍ ഡ്രാഫ്റ്റ് വഴി പിന്‍വലിക്കാന്‍ ബാങ്കുകള്‍ അനുവദിക്കുക. ചില ബാങ്കുകള്‍ 3 ലക്ഷം മുതല്‍ 5 ലക്ഷം രൂപ വരെ സാലറി ഓവര്‍ ഡ്രാഫ്റ്റില്‍ പരിധി നിശ്ചയിച്ചിട്ടുണ്ട്. എന്നാല്‍ മറ്റ് ചില ബാങ്കുകള്‍ വായ്പയ്ക്ക് അപേക്ഷിക്കുന്ന വ്യക്തിയുടെ ശമ്പളം പരിഗണിക്കാതെ 1 ലക്ഷം രൂപ മുതല്‍ 1.5 ലക്ഷം വരെയാണ് സാലറി ഓവര്‍ ഡ്രാഫ്റ്റില്‍ ലഭിക്കുക.

10,000 രൂപ മുതല്‍ 25,000 രൂപ വരെ മാത്രം സാലറി ഓവര്‍ ഡ്രാഫ്റ്റ് അനുവദിക്കുന്ന ബാങ്കുകളുമുണ്ട്. സാലറി ഓവര്‍ ഡ്രാഫ്റ്റ് തിരിച്ചടവും ഓരോ ബാങ്കിനും അനുസരിച്ച് വ്യത്യസ്തമായിരിക്കും. സാധാരണഗതിയില്‍ അക്കൗണ്ടില്‍ മതിയായ തുകയാകുമ്പോള്‍ ബാങ്ക് പണം തിരിച്ചെടുക്കുകയാണ് ചെയ്യുക. സാലറി അക്കൗണ്ട് ഉടമകളുടെ വായ്പാ ചരിത്രം കൂടി പരിഗണിച്ചാണ് സാലറി ഓവര്‍ ഡ്രാഫ്റ്റ് അനുവദിക്കുക. നെറ്റ് ബാങ്കിംഗിലൂടെ ഒരു വ്യക്തിയ്ക്ക് സാലറി ഓവര്‍ ഡ്രാഫ്റ്റിനായി അപേക്ഷിക്കാവുന്നതാണ്.

ചെറിയൊരു തുക പ്രൊസസിംഗ് ചാര്‍ജായും ബാങ്കുകള്‍ ഈടാക്കാറുണ്ട്. സാലറി ഓവര്‍ ഡ്രാഫ്റ്റ് എന്നത് ചിലവേറിയ കാര്യമാണെന്ന് ഓര്‍്ക്കേണ്ടതുണ്ട്. പ്രതിവര്‍ഷം 13 ശതമാനം മുതല്‍ 30 ശതമാനം വരെയാണ് പലിശ നിരക്ക് ഈടാക്കുന്നത്. തിരിച്ചടവ് കൃത്യമായില്ലെങ്കില്‍ വലിയ സാമ്പത്തിക ബാധ്യതയാണ് ഇതുണ്ടാക്കുക. ക്രെഡിറ്റ് കാര്‍ഡുകളേപ്പോലെ പ്രത്യേക നേട്ടങ്ങളോ റിവാര്‍ഡ് പോയിന്റുകളോ സാലറി ഓവര്‍ ഡ്രാഫ്റ്റില്‍ ലഭിക്കുകയില്ല.

അടിസ്ഥാനപരമായി ബാങ്കുകള്‍, തുടങ്ങിയ ധനകാര്യ കമ്പനികള്‍ നല്‍കുന്ന കാര്‍ഡാണ് ക്രെഡിറ്റ് കാര്‍ഡ്. ചരക്കുകളും സേവനങ്ങളും കടമായി വാങ്ങാന്‍ ഇത് നിങ്ങളെ അനുവദിക്കുന്നു. ഇന്നത്തെ കാലത്ത്, മിക്ക ആളുകളും ഡിജിറ്റല്‍ പേയ്മെന്റുകള്‍ ഇഷ്ടപ്പെടുന്നവരാണ്. ക്രെഡിറ്റ് കാര്‍ഡുകള്‍ ഉപയോഗിച്ച് നാം ആഗ്രഹിക്കുന്ന വസ്തുക്കള്‍ എളുപ്പത്തില്‍ വാങ്ങിക്കുവാന്‍ സാധിക്കും.

അതത് ധനകാര്യ കമ്പനികള്‍ നിശ്ചയിച്ചിട്ടുള്ള ക്രെഡിറ്റ് പരിധിയോടെയാണ് കാര്‍ഡുകള്‍ ഇഷ്യൂ ചെയ്യുന്നത്. ഈ പരിധി നിങ്ങളുടേ ക്രെഡിറ്റ് സ്‌കോറിനെ ആശ്രയിച്ചിരിക്കുന്നു. ഒരു കാര്‍ഡ് ഉപയോഗിച്ച് പണം കടം വാങ്ങുമ്പോള്‍, ഗ്രേസ് കാലയളവിനുള്ളില്‍ നിങ്ങള്‍ തുക തിരികെ നല്‍കേണ്ടതുണ്ട്. അത് സാധാരണയായി 30 ദിവസമാണ്. ഗ്രേസ് പിരീഡിനുള്ളില്‍ പണം തിരിച്ചടയ്ക്കുന്നതില്‍ നിങ്ങള്‍ പരാജയപ്പെട്ടാല്‍ കുടിശ്ശികയുള്ള തുകയില്‍ പലിശ ഈടാക്കാന്‍ തുടങ്ങും. മാത്രമല്ല, ഒരു അധിക തുക ലേറ്റ് പീയായും ഈടാക്കും.

ക്രെഡിറ്റ് കാര്‍ഡ് ഉപയോഗിക്കുന്നവരുടെ ക്രെഡിറ്റ് ലിമിറ്റ് അഥവാ വായ്പ പരിധി വളരെ പ്രധാനപ്പെട്ടതാണ്. ഓരോ മാസവും തുടര്‍ച്ചയായി ക്രെഡിറ്റ് ലിമിറ്റ് മുഴുവന്‍ ഉപയോഗിച്ചാല്‍ അത് കാര്‍ഡുടമയുടെ ക്രെഡിറ്റ് സ്‌കോറിനെ സാരമായി ബാധിക്കും. ഇത് നിങ്ങളുടെ സാമ്പത്തിക നില തൃപ്തികരമല്ലെന്ന നിലയിലാണ് സിസ്റ്റം ഫീഡ് ചെയ്യുക. അതിനാല്‍ നിങ്ങള്‍ക്ക് അനുവദിച്ച വായ്പ പരിധിക്കുള്ളില്‍നിന്നുകൊണ്ട് വേണം പണം ചെലവഴിക്കാന്‍. ഇതിന് കഴിയുന്നില്ലെങ്കില്‍ ക്രെഡിറ്റ് ലിമിറ്റ് കൂടിയ കാര്‍ഡിലേക്ക് മാറുന്നതാണ് ഉചിതം. ഉപഭോക്താവിന്റെ വരുമാനം, തിരിച്ചടവ് ശേഷി. ക്രെഡിറ്റ് സ്‌കോര്‍ തുടങ്ങിയവ അടിസ്ഥാനമാക്കിയാണ് ബാങ്കുകള്‍ അല്ലെങ്കില്‍ മറ്റ് ധനകാര്യ സ്ഥാപനങ്ങള്‍ ക്രെഡിറ്റ് കാര്‍ഡുകള്‍ വിതരണം ചെയ്യുക.