പോസ്റ്റ് ഓഫീസ് പ്രതിമാസ വരുമാന പദ്ധതി ആർക്കൊക്കെ അനുയോജ്യം? ആർക്കൊക്കെ ഒഴിവാക്കാം?

സുരക്ഷിതമായ നിക്ഷേപത്തിലൂടെ മാസം തോറും ഒരു നിശ്ചിത വരുമാനം ആഗ്രഹിക്കുന്നവർക്ക് എക്കാലത്തും പ്രിയപ്പെട്ട ഒന്നാണ് പോസ്റ്റ് ഓഫീസ് പ്രതിമാസ വരുമാന പദ്ധതി. 2026 ഫെബ്രുവരിയിലെ നിലവിലെ പലിശ നിരക്കുകളും വിപണി സാഹചര്യങ്ങളും കണക്കിലെടുക്കുമ്പോൾ, ഈ പദ്ധതിയിൽ നിക്ഷേപിക്കുന്നതിന് മുൻപ് ചില കാര്യങ്ങൾ ശ്രദ്ധിക്കേണ്ടതുണ്ട്.

എന്താണ് പോസ്റ്റ് ഓഫീസ് പ്രതിമാസ വരുമാന പദ്ധതി?

കേന്ദ്ര സർക്കാരിന്റെ പൂർണ്ണ ഗ്യാരണ്ടിയുള്ള ഈ പദ്ധതിയിൽ ഒരിക്കൽ നിക്ഷേപിച്ചാൽ അഞ്ച് വർഷത്തേക്ക് മാസം തോറും പലിശ വരുമാനമായി ലഭിക്കും. കാലാവധി കഴിയുമ്പോൾ നിക്ഷേപിച്ച തുക മുഴുവനായി തിരികെ ലഭിക്കുകയും ചെയ്യും. നിലവിലെ പലിശ നിരക്ക്: 7.4% (പ്രതിവർഷം) ആണ്. 5 വർഷമാണ് കാലാവധി. സിംഗിൾ അക്കൗണ്ടിൽ 9 ലക്ഷം രൂപ വരെയും, ജോയിന്റ് അക്കൗണ്ടിൽ (പരമാവധി 3 പേർ) 15 ലക്ഷം രൂപ വരെയും നിക്ഷേപിക്കാം. 15 ലക്ഷം രൂപ നിക്ഷേപിച്ചാൽ മാസം 9,250 രൂപ പലിശയായി ലഭിക്കും.

ഈ പദ്ധതി ആർക്കൊക്കെ അനുയോജ്യം?

സ്ഥിരവരുമാനം ആഗ്രഹിക്കുന്ന മുതിർന്ന പൗരന്മാർ, അതായത് വിരമിച്ച ശേഷം പെൻഷനോടൊപ്പം മറ്റൊരു കൃത്യമായ വരുമാനം ആഗ്രഹിക്കുന്നവർക്ക് ഇത് ഏറ്റവും മികച്ചതാണ്. ഓഹരി വിപണിയിലെ ചാഞ്ചാട്ടങ്ങൾ പേടിക്കാതെ നിക്ഷേപം സുരക്ഷിതമായിരിക്കണം എന്ന് നിർബന്ധമുള്ളവർക്ക് ഈ പോസ്റ്റ് ഓഫീസ് സ്കീം തിരഞ്ഞെടുക്കാം. മറ്റ് വരുമാന സ്രോതസ്സുകൾ ഉള്ളവർക്ക് അനുയോജ്യം. വീട്ടുചെലവുകൾക്കോ കുട്ടികളുടെ പഠനത്തിനായുള്ള അധിക ചിലവുകൾക്കോ ഈ മാസവരുമാനം പ്രയോജനപ്പെടുത്താം. കുറഞ്ഞ വരുമാനമുള്ളവർക്കും നികുതി അടയ്ക്കേണ്ടി വരാത്തവർക്കും ഈ പലിശ വരുമാനം പൂർണ്ണമായും പ്രയോജനപ്പെടും.

ആർക്കൊക്കെ ഈ പദ്ധതി ഒഴിവാക്കാം?

നികുതി ലാഭിക്കാൻ നോക്കുന്നവർക്ക് അനുയോജ്യമല്ല. ഈ പദ്ധതിയിലെ നിക്ഷേപത്തിന് സെക്ഷൻ 80സി പ്രകാരം നികുതി ഇളവ് ലഭ്യമല്ല. കൂടാതെ, ലഭിക്കുന്ന പലിശ നിങ്ങളുടെ വരുമാനമായി കണക്കാക്കി സ്ലാബ് അനുസരിച്ച് നികുതി നൽകേണ്ടി വരും. ഉയർന്ന പണപ്പെരുപ്പം മറികടക്കാൻ ആഗ്രഹിക്കുന്നവർക്കും ഒഴിവാക്കാം. 7.4% പലിശ നിരക്ക് പണപ്പെരുപ്പത്തെ അതിജീവിക്കാൻ ചിലപ്പോൾ പര്യാപ്തമാകില്ല. ദീർഘകാലാടിസ്ഥാനത്തിൽ വലിയ ലാഭം ആഗ്രഹിക്കുന്നവർക്ക് ഇക്വിറ്റി മ്യൂച്വൽ ഫണ്ടുകളായിരിക്കും അനുയോജ്യം.

ഒരു വർഷത്തിന് മുൻപ് പണം പിൻവലിക്കാൻ സാധിക്കില്ല. ഒന്നിനും മൂന്നിനും ഇടയിൽ വർഷങ്ങളിൽ പിൻവലിച്ചാൽ നിക്ഷേപത്തിന്റെ 2 ശതമാനവും, മൂന്ന് വർഷത്തിന് ശേഷമാണെങ്കിൽ 1 ശതമാനവും പിഴയായി ഈടാക്കും. നിങ്ങൾ 30% ടാക്സ് സ്ലാബിൽ വരുന്ന ആളാണെങ്കിൽ, നികുതി കഴിച്ചുള്ള ലാഭം വളരെ കുറവായിരിക്കും. നിങ്ങൾ ഒരു തുക നിക്ഷേപിച്ച് അതിൽ നിന്ന് മാസം തോറും കിട്ടുന്ന പലിശ വീണ്ടും നിക്ഷേപിക്കാൻ ആഗ്രഹിക്കുന്നുണ്ടെങ്കിൽ, ആ പണം ഒരു റെക്കറിംഗ് ഡിപ്പോസിറ്റിലേക്ക് മാറ്റുന്നത് വഴി കൂടുതൽ ലാഭം നേടാൻ സാധിക്കും.

സുരക്ഷിതത്വത്തിനാണ് നിങ്ങൾ മുൻഗണന നൽകുന്നതെങ്കിൽ 2026-ലും പോസ്റ്റ് ഓഫീസ് പ്രതിമാസ വരുമാന പദ്ധതി ഒരു മികച്ച ഓപ്ഷൻ തന്നെയാണ്. എന്നാൽ നികുതി ലാഭിക്കാനും വലിയ വളർച്ച നേടാനും ആഗ്രഹിക്കുന്നവർ മറ്റ് നിക്ഷേപ മാർഗങ്ങൾ കൂടി പരിശോധിക്കേണ്ടതാണ്.