നിങ്ങളുടെ ആരോഗ്യ ഇൻഷുറൻസ് ആശുപത്രി ബില്ലുകൾക്ക് മതിയാകുമോ?

നമ്മുടെ ആരോഗ്യ സുരക്ഷയ്ക്കായി ഒരു ഇൻഷുറൻസ് പോളിസി എടുക്കുമ്പോൾ മിക്കവരും ശ്രദ്ധിക്കുന്നത് അതിന്റെ പ്രീമിയം തുക മാത്രമാണ്. "കൈയ്യിലൊതുങ്ങുന്നത്" തിരഞ്ഞെടുക്കുന്ന തിരക്കിൽ, അത് നാളത്തെ ചികിത്സാ ചിലവുകൾക്ക് "മതിയാകുമോ" എന്ന് ചിന്തിക്കാൻ പലപ്പോഴും മറന്നുപോകുന്നു.

അഞ്ച് ലക്ഷത്തിന്റെയോ പത്ത് ലക്ഷത്തിന്റെയോ ഒരു പോളിസി കേൾക്കുമ്പോൾ വലിയൊരു തുകയായി തോന്നാം. എന്നാൽ ഇന്നത്തെ സൂപ്പർ സ്പെഷ്യാലിറ്റി ആശുപത്രികളിലെ ബില്ലുകൾ പരിശോധിച്ചാൽ ഈ ധാരണ തിരുത്തപ്പെടും. പഴയ കാലത്തെ കണക്കുകൾ വച്ച് ഇൻഷുറൻസ് തുക നിശ്ചയിക്കുന്നത് അപകടകരമാണ്. പ്രീമിയം കുറയ്ക്കാൻ വേണ്ടി കുറഞ്ഞ ഇൻഷുറൻസ് തുക തിരഞ്ഞെടുക്കുന്നത് വലിയൊരു അത്യാഹിതം വരുമ്പോൾ നിങ്ങളെ സഹായിക്കില്ല.

1. പ്രായത്തേക്കാൾ നിങ്ങൾ എവിടെ താമസിക്കുന്നുവെന്നതിന് മുൻഗണന നൽകുക

നിങ്ങളുടെ ആരോഗ്യത്തെപ്പോലെ തന്നെ നിങ്ങൾ താമസിക്കുന്ന നഗരവും പ്രധാനമാണ്. മെട്രോ നഗരങ്ങളിലും ടയർ-1 നഗരങ്ങളിലും ചികിത്സാച്ചെലവ് ചെറിയ പട്ടണങ്ങളെ അപേക്ഷിച്ച് വളരെ കൂടുതലാണ്. കാൽമുട്ട് ശസ്ത്രക്രിയയോ, ഹൃദയസംബന്ധമായ ചികിത്സകളോ, ക്യാൻസർ ചികിത്സയോ ഡൽഹി, മുംബൈ, ബംഗളൂരു, ചെന്നൈ തുടങ്ങിയ സ്ഥലങ്ങളിൽ മറ്റ് നഗരങ്ങളേക്കാൾ എത്രയോ മടങ്ങ് ചിലവേറിയതായിരിക്കും. ഏകദേശം കണക്കാക്കിയാൽ, ഒരു മെട്രോ നഗരത്തിൽ താമസിക്കുന്ന ഒരാൾ ഒരാൾക്ക് 15-25 ലക്ഷം രൂപ എന്നത് ഒരു വലിയ ലക്ഷ്യമായല്ല, മറിച്ച് അടിസ്ഥാന ഇൻഷുറൻസ് തുകയായി കാണണം. ചെറിയ നഗരങ്ങളിൽ 10-15 ലക്ഷം രൂപ എന്നത് മതിയായേക്കാം.

2. നിങ്ങളുടെ കുടുംബസാഹചര്യത്തെ സത്യസന്ധമായി വിലയിരുത്തുക.

ഒറ്റയ്ക്ക് താമസിക്കുന്ന ഒരാൾ, ദമ്പതികൾ, അതുപോലെ ആശ്രിതരായ മാതാപിതാക്കളുള്ള ഒരു കുടുംബം ഇവർ ഓരോരുത്തരും നേരിടേണ്ടി വരുന്ന ആരോഗ്യപരമായ വെല്ലുവിളികൾ തികച്ചും വ്യത്യസ്തമാണ്. മാതാപിതാക്കൾക്ക് പ്രായം കൂടുതലാണ് എന്നത് മാത്രമല്ല, അവർക്ക് ആശുപത്രിവാസം ആവശ്യമായി വരാനും കൂടുതൽ കാലം ചികിത്സയിൽ കഴിയാനും ആവർത്തിച്ചുള്ള ശസ്ത്രക്രിയകൾക്കോ മറ്റോ വിധേയരാകാനുമുള്ള സാധ്യത കൂടുതലാണ്. അതുകൊണ്ട് തന്നെ മാതാപിതാക്കളെ ഉൾപ്പെടുത്തിക്കൊണ്ടുള്ള ഒരു 'ഫാമിലി ഫ്ലോട്ടർ' ഇൻഷുറൻസ് പോളിസിയാണ് നിങ്ങൾ എടുക്കുന്നതെങ്കിൽ, നിങ്ങൾക്കായി മാത്രം എടുക്കുന്നതിനേക്കാൾ ഉയർന്ന തുകയുടെ കവറേജ് ഉറപ്പാക്കണം.

3. തൊഴിലുടമ ഇൻഷുറൻസ് നിങ്ങളുടെ തീരുമാനത്തെ ബാധിക്കാൻ പാടില്ല

കമ്പനികൾ നൽകുന്ന ഹെൽത്ത് ഇൻഷുറൻസ് വലിയൊരു ആശ്വാസമായി തോന്നാമെങ്കിലും അത് അത്ര സുരക്ഷിതമല്ല. നിങ്ങൾ ജോലി മാറുമ്പോഴോ, ജോലിയിൽ നിന്ന് ഇടവേള എടുക്കുമ്പോഴോ, നേരത്തെ വിരമിക്കുമ്പോഴോ അല്ലെങ്കിൽ ഫ്രീലാൻസ്/കൺസൾട്ടിംഗ് ജോലികളിലേക്ക് തിരിയുമ്പോഴോ ഈ പരിരക്ഷ നിങ്ങൾക്ക് നഷ്ടമാകും. കൂടാതെ, ഇൻഷുറൻസ് തുക നിശ്ചയിക്കുന്നത് നിങ്ങളുടെ ആവശ്യങ്ങൾക്കനുസരിച്ചല്ല, മറിച്ച് തൊഴിലുടമയാണ്. ക്ലെയിം ചെയ്യുന്ന സമയത്ത് മാത്രമായിരിക്കും അതിലെ പല നിബന്ധനകളും നിയന്ത്രണങ്ങളും നിങ്ങൾ തിരിച്ചറിയുന്നത്. അതുകൊണ്ട് തന്നെ, നിങ്ങളുടെ വ്യക്തിഗത ഹെൽത്ത് ഇൻഷുറൻസ് മാത്രം മതിയാകുന്ന തരത്തിലുള്ള ഒന്നായിരിക്കണം. കമ്പനി നൽകുന്ന ഇൻഷുറൻസിനെ ഒരു അധിക ആനുകൂല്യമായി മാത്രം കാണുക; അത് നിങ്ങളുടെ ആരോഗ്യ സുരക്ഷയുടെ അടിത്തറയാകരുത്.

4. മുറി വാടകയുടെയും ചികിത്സാ പരിധികളുടെയും മറഞ്ഞിരിക്കുന്ന പങ്ക്

10 ലക്ഷം രൂപയുടെ ഒരു ഇൻഷുറൻസ് പോളിസിയുണ്ടെങ്കിലും, അതിൽ മുറി വാടകയ്ക്കോ പ്രത്യേക രോഗങ്ങൾക്കോ പരിധികളുണ്ടെങ്കിൽ പ്രായോഗികമായി അത് ഒരു 4-5 ലക്ഷം രൂപയുടെ പോളിസി പോലെ മാത്രമേ പ്രവർത്തിക്കൂ.നിങ്ങൾ നിശ്ചയിച്ചിട്ടുള്ളതിനേക്കാൾ ഉയർന്ന വാടകയുള്ള മുറി തിരഞ്ഞെടുക്കാൻ നിർബന്ധിതനായാൽ, മുറി വാടക മാത്രമല്ല, അതുമായി ബന്ധപ്പെട്ട മറ്റ് ചികിത്സാ ചെലവുകളും ആനുപാതികമായി വർദ്ധിക്കും. ഇതിനെ തുടർന്ന് ബില്ലിന്റെ വലിയൊരു ഭാഗം ഇൻഷുറൻസ് കമ്പനി നൽകില്ല. അതുകൊണ്ട് ഒരു പോളിസി തിരഞ്ഞെടുക്കുമ്പോൾ ഇൻഷുറൻസ് തുക മാത്രം നോക്കാതെ മുറി വാടകയ്ക്ക് പരിധിയുണ്ടോ?, ഐ.സി.യു ചെലവുകൾക്ക് നിയന്ത്രണമുണ്ടോ, സാധാരണ ശസ്ത്രക്രിയകൾക്കും ചികിത്സകൾക്കും പ്രത്യേകം പരിധിയുണ്ടോ? എന്നിവ കൂടി പരിശോധിക്കുക.

5. സൂപ്പർ ടോപ്പ്-അപ്പുകൾ ലാഭകരമാകുന്നത് എന്തുകൊണ്ട്?

വലിയ തുകയുടെ ഒരു ബേസ് പോളിസി എടുക്കുന്നതിനേക്കാൾ, മിതമായ നിരക്കിലുള്ള ഒരു ബേസ് പോളിസിയും അതിനൊപ്പം ഒരു സൂപ്പർ ടോപ്പ്-അപ്പും എടുക്കുന്നതാണ് പലപ്പോഴും ഉചിതം. ഉദാഹരണത്തിന്, 5-10 ലക്ഷം രൂപയുടെ ഒരു ബേസ് പ്ലാനും 20-50 ലക്ഷം രൂപയുടെ ഒരു സൂപ്പർ ടോപ്പ്-അപ്പും ചേർക്കുന്നത് കൂടുതൽ ചിലവ് കുറഞ്ഞതും പ്രായോഗികവുമാണ്.

6. ജീവിതം മാറുന്നതിനനുസരിച്ച് ഇൻഷുറൻസ് തുക പുനഃപരിശോധിക്കുക

30 വയസ്സിൽ നിങ്ങൾക്ക് അനുയോജ്യമായ ഒരു ഇൻഷുറൻസ് പ്ലാൻ 45 വയസ്സിൽ അനുയോജ്യമാകണമെന്നില്ല. വിവാഹം, കുട്ടികൾ, പ്രായമായ മാതാപിതാക്കൾ, ജീവിതശൈലിയിലെ മാറ്റങ്ങൾ, താമസം മാറുന്നത് എന്നിവയെല്ലാം നിങ്ങളുടെ സാമ്പത്തിക റിസ്കിനെ ബാധിക്കുന്നു. ആരോഗ്യ ഇൻഷുറൻസ് എന്നത് ഒരിക്കൽ മാത്രം എടുക്കേണ്ട ഒരു തീരുമാനമല്ല. ഒരു ആരോഗ്യപ്രശ്നം ഉണ്ടായതിനുശേഷം മാത്രം ചിന്തിക്കാതെ, ഓരോ കുറച്ചു വർഷങ്ങൾ കൂടുമ്പോഴും അത് കൃത്യമായി പരിശോധിക്കുകയും ആവശ്യമായ മാറ്റങ്ങൾ വരുത്തുകയും ചെയ്യേണ്ടത് അത്യാവശ്യമാണ്.