സ്ത്രീകൾക്ക് എളുപ്പത്തിൽ വ്യക്തിഗത വായ്പ നേടാം; പലിശ നിരക്കുകളും യോഗ്യതയും അറിയാം

രാജ്യത്തെ സ്ത്രീകളെ വ്യവസായ സംരംഭങ്ങൾക്ക് തുടക്കമിട്ട് ശാക്തീകരിക്കുകയെന്ന ലക്ഷ്യത്തോടെ നിരവധി വായ്പാ പദ്ധതികൾ കേന്ദ്ര സർക്കാർ അവതരിപ്പിച്ചിട്ടുണ്ട്. അതിനാൽതന്നെ, 2020 മുതൽ വായ്പ തേടുന്ന സ്ത്രീകളുടെ എണ്ണത്തിൽ കാര്യമായ വർധനവ് വന്നിട്ടുണ്ട്. എന്നിരുന്നാലും, രാജ്യത്ത് വിതരണം ചെയ്യുന്ന മൊത്തം വ്യക്തിഗത വായ്പകളുടെ 20% ൽ താഴെ മാത്രമേ സ്ത്രീകൾക്ക് പ്രയോജനപ്പെടുന്നുള്ളൂ. ഈ വിടവ് സ്ത്രീകൾക്ക് മാത്രമായി വായ്പാ പദ്ധതികൾ അവതരിപ്പിക്കുന്നതിൽ വലിയ മാറ്റം വരുത്തിയിട്ടുണ്ട്. 

 

 

2025-ൽ, സ്വകാര്യ വായ്പാദാതാക്കളും സർക്കാരും സ്ത്രീകൾക്ക് മാത്രമായുള്ള വ്യക്തിഗത വായ്പകൾ വാഗ്‌ദാനം ചെയ്യുന്നു. ആകർഷകമായ പലിശ നിരക്കുകൾ, വഴക്കമുള്ള തിരിച്ചടവ് ഓപ്ഷനുകൾ, പെട്ടെന്നുള്ള അംഗീകാര പ്രക്രിയകൾ എന്നിവ സ്ത്രീകൾക്ക് എളുപ്പത്തിൽ വായ്പ ലഭിക്കുന്നതിന് സഹായകരമായിട്ടുണ്ട്. വിദ്യാഭ്യാസം, സംരംഭകത്വം, ആരോഗ്യ സംരക്ഷണം, അടിയന്തര സാഹചര്യങ്ങൾ തുടങ്ങിയ വിവിധ സാമ്പത്തിക ആവശ്യങ്ങൾക്കുള്ള പരിഹാരമാണ് കുറഞ്ഞ പലിശ നിരക്കിൽ സ്ത്രീകൾക്ക് മാത്രമായുള്ള ഈ വായ്പകൾ. സ്ത്രീകൾക്കായി നിരവധി വ്യക്തിഗത വായ്പ ഓപ്ഷനുകൾ ഇന്ന് ലഭ്യമാണ്.

 

സ്വകാര്യ മേഖലയും എൻ‌ബി‌എഫ്‌സി ഓഫറുകളും

 

പ്രമുഖ ധനകാര്യ സ്ഥാപനങ്ങൾ ഇപ്പോൾ സ്ത്രീകൾക്ക് സമഗ്രമായ കുറഞ്ഞ പലിശ നിരക്കിലുള്ള വായ്പകൾ നൽകുന്നുണ്ട്. പ്രതിവർഷം 9.99% മുതൽ 16.5% വരെയാണ് പലിശ നിരക്കുകൾ. 55 ലക്ഷം വരെയാണ് പരമാവധി വായ്പ തുകയായി കിട്ടുക. പ്രോസസിങ് ഫീസ് സാധാരണയായി വായ്പ തുകയുടെ 3% മുതൽ 4% വരെയാണ്.

 

തിരഞ്ഞെടുത്ത എൻ‌ബി‌എഫ്‌സികൾക്ക് തിരിച്ചടവ് കാലാവധി 8 വർഷം (96 മാസം) വരെ നീളും. യോഗ്യതയുള്ള അപേക്ഷകർക്ക് 5 മിനിറ്റിനുള്ളിൽ വായ്പാ നടപടികൾ പൂർത്തിയാക്കാം. പൂർണ്ണമായും ഡിജിറ്റൽ അപേക്ഷകൾക്ക് അന്നു തന്നെ പണവും വിതരണം ചെയ്യും. 

 

സ്ത്രീകൾക്കായി സർക്കാർ പിന്തുണയുള്ള പദ്ധതികൾ

 

സ്ത്രീകൾക്ക് സർക്കാരും വ്യക്തിഗത വായ്പകൾ ധാരാളമായി നൽകുന്നുണ്ട്. വായ്പ 10,000 മുതൽ 10 ലക്ഷം വരെയാണ് വായ്പയായി കിട്ടുക. പ്രതിവർഷം 8.5% മുതൽ 12% വരെയാണ് പലിശ നിരക്കുകൾ. കൊളാറ്ററൽ ആവശ്യമില്ല. 3 ദിവസത്തിനുള്ളിൽ ലോൺ അംഗീകാരം ലഭിക്കും. 7 വർഷം വരെയാണ് വായ്പാ കാലാവധി.

 

അന്നപൂർണ്ണ, ദേന ശക്തി പദ്ധതികൾ

 

അന്നപൂർണ്ണ: ഭക്ഷ്യ സംബന്ധിയായ ബിസിനസുകൾക്ക് 50,000 വരെ വായ്പയായി ലഭിക്കും.

 

ദേന ശക്തി: വനിതാ സംരംഭകർക്ക് 20 ലക്ഷം വരെ

 

യോഗ്യതാ മാനദണ്ഡങ്ങളും ഡോക്യുമെന്റേഷനും

 

വായ്പയ്ക്ക് അപേക്ഷിക്കുന്നതിനുള്ള കുറഞ്ഞ പ്രായം 21 വയസും പരമാവധി പ്രായം 80 വയസുമാണ് (വായ്പ കാലാവധി പൂർത്തിയാകുമ്പോൾ). കുറഞ്ഞ പ്രതിമാസ വരുമാനം: 20,000 രൂപയാണ് (നഗര പ്രദേശങ്ങൾ). കുറഞ്ഞത് 2 വർഷത്തേക്ക് സ്ഥിരതയുള്ള തൊഴിൽ ആയിരിക്കണം. നിലവിൽ ജോലി ചെയ്യുന്ന സ്ഥാപനത്തൽ കുറഞ്ഞത് 1 വർഷം പൂർത്തിയാക്കിയിരിക്കണം.

 

ആവശ്യമായ രേഖകൾ

 

തിരിച്ചറിയൽ രേഖയും വിലാസ തെളിവും, ആധാർ കാർഡ് (നിർബന്ധം), പാൻ കാർഡ്, വോട്ടർ ഐഡി അല്ലെങ്കിൽ പാസ്‌പോർട്ട്, യൂട്ടിലിറ്റി ബില്ലുകൾ അല്ലെങ്കിൽ വാടക കരാർ. ശമ്പളക്കാരായ വ്യക്തികൾക്ക് കഴിഞ്ഞ 3-6 മാസത്തെ ശമ്പള സ്ലിപ്പുകൾ, ബാങ്ക് സ്റ്റേറ്റ്‌മെന്റുകൾ, ഫോം 16. സ്വയം തൊഴിൽ ചെയ്യുന്നവർക്ക് 2 വർഷത്തെ ഐടിആർ, ബിസിനസ് രജിസ്ട്രേഷൻ, ബാങ്ക് സ്റ്റേറ്റ്‌മെന്റുകൾ, ലാഭനഷ്ട പ്രസ്താവനകൾ.