10 വർഷം കൊണ്ട് ഒരു കോടി രൂപ സമ്പാദിക്കാം; പ്രതിമാസം എസ്ഐപിയിൽ നിക്ഷേപിക്കേണ്ടത് എത്ര?

ഭാവിയിലേക്കായി ഒരു വലിയ തുക സമ്പാദിക്കണമെന്നത് എല്ലാവരുടെയും ആഗ്രഹമാണ്. പത്ത് വർഷത്തിനുള്ളിൽ ഒരു കോടി രൂപ എന്ന ലക്ഷ്യത്തിലെത്താൻ മ്യൂച്വൽ ഫണ്ട് നിക്ഷേപങ്ങളിലൂടെ സാധിക്കുമോ? കൃത്യമായ പ്ലാനിംഗും അച്ചടക്കമുള്ള നിക്ഷേപവും ഉണ്ടെങ്കിൽ എസ്ഐപി വഴി ഇത് സാധ്യമാണെന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു. 

ചെറിയ തുകകൾ കൃത്യമായ ഇടവേളകളിൽ നിക്ഷേപിച്ച് വലിയൊരു സമ്പാദ്യം കെട്ടിപ്പടുക്കാൻ സഹായിക്കുന്ന രീതിയാണ് സിസ്റ്റമാറ്റിക് ഇൻവെസ്റ്റ്‌മെന്റ് പ്ലാൻ. മ്യൂച്വൽ ഫണ്ടുകളിൽ നിക്ഷേപിക്കാനുള്ള ഏറ്റവും സുരക്ഷിതവും ജനകീയവുമായ മാർഗ്ഗമാണിത്. ബാങ്കുകളിലെ റെക്കറിംഗ് ഡെപ്പോസിറ്റുകൾ പോലെ തന്നെ, ഓരോ മാസവും നിശ്ചിത തുക (ഉദാഹരണത്തിന് 500 രൂപ മുതൽ) മുൻകൂട്ടി നിശ്ചയിച്ച തീയതിയിൽ മ്യൂച്വൽ ഫണ്ട് സ്കീമുകളിലേക്ക് നിക്ഷേപിക്കുന്ന രീതിയാണിത്. 

കോമ്പൗണ്ടിംഗ് പവർ ആണ് എസ്ഐപിയുടെ കരുത്ത്. നിക്ഷേപത്തിൽ നിന്നുള്ള ലാഭത്തിന് വീണ്ടും ലാഭം ലഭിക്കുന്ന രീതിയാണിത്. ദീർഘകാലം നിക്ഷേപം തുടരുമ്പോൾ ഈ നേട്ടം വളരെ വലുതായിരിക്കും. വെറും 500 രൂപ മുതൽ നിക്ഷേപം ആരംഭിക്കാം എന്നത് സാധാരണക്കാർക്ക് വലിയൊരു അനുഗ്രഹമാണ്. സിസ്റ്റമാറ്റിക് ഇൻവെസ്റ്റ്‌മെന്റ് പ്ലാൻ അഥവാ എസ്‌ഐപി വഴി 1 കോടി സമ്പാദിക്കാൻ എത്ര രൂപ മാസം നിക്ഷേപിക്കണമെന്ന് നോക്കാം.

മ്യൂച്വൽ ഫണ്ടിൽ നിന്നുള്ള വാർഷിക ആദായം മാറുന്നതിനനുസരിച്ച് നമ്മൾ നിക്ഷേപിക്കേണ്ട തുകയിലും മാറ്റം വരും. 12% റിട്ടേൺ ലഭിക്കുകയാണെങ്കിൽ 10 വർഷം കൊണ്ട് ഒരു കോടി രൂപയിലെത്താൻ പ്രതിമാസം ഏകദേശം 43,150 രൂപ എസ്‌ഐപി ചെയ്യേണ്ടി വരും. വിപണി മികച്ച പ്രകടനം കാഴ്ചവെക്കുകയും 14 ശതമാനം റിട്ടേൺ ലഭിക്കുകയും ചെയ്താൽ മാസ നിക്ഷേപം 38,250 രൂപയായി കുറയ്ക്കാം. നിക്ഷേപം 16 ശതമാനം വളർച്ച രേഖപ്പെടുത്തുകയാണെങ്കിൽ മാസം 33,750 രൂപ നിക്ഷേപിച്ചാൽ മതിയാകും.

ഓർക്കേണ്ട കാര്യങ്ങൾ

ഇക്വിറ്റി ഫണ്ടുകൾ: പത്ത് വർഷം കൊണ്ട് ഇത്രയും വലിയ തുക സമ്പാദിക്കണമെങ്കിൽ ഓഹരി അധിഷ്ഠിത മ്യൂച്വൽ ഫണ്ടുകളിൽ (Equity Mutual Funds) നിക്ഷേപിക്കുന്നതാണ് ഉചിതം. ഡെബ്റ്റ് ഫണ്ടുകളേക്കാൾ ഉയർന്ന ആദായം നൽകാൻ ഇവയ്ക്ക് സാധിക്കും. മ്യൂച്വൽ ഫണ്ട് നിക്ഷേപങ്ങൾ വിപണിയിലെ ലാഭനഷ്ടങ്ങൾക്ക് വിധേയമാണ്. അതിനാൽ മുൻകാല പ്രകടനം ഭാവിയിൽ ആവർത്തിക്കണമെന്നില്ല. വിപണിയിലെ കയറ്റിറക്കങ്ങൾ നോക്കാതെ നിക്ഷേപം മുടങ്ങാതെ തുടരുന്നത് ലക്ഷ്യത്തിലെത്താൻ സഹായിക്കും.

നിങ്ങളുടെ വരുമാനം വർദ്ധിക്കുന്നതിനനുസരിച്ച് ഓരോ വർഷവും എസ്‌ഐപി തുക നിശ്ചിത ശതമാനം (ഉദാഹരണത്തിന് 10% അല്ലെങ്കിൽ 15%) വർദ്ധിപ്പിക്കുകയാണെങ്കിൽ, കുറഞ്ഞ തുകയിൽ നിക്ഷേപം ആരംഭിച്ച് ലക്ഷ്യത്തിലെത്താൻ സാധിക്കും.