അഞ്ചുവർഷം കൊണ്ട് 36 ലക്ഷം രൂപ നേടാം; ഈ പോസ്റ്റ് ഓഫീസ് നിക്ഷേപം അറിയാതെ പോകരുത്!

നിക്ഷേപങ്ങളിൽ സുരക്ഷിതത്വവും മികച്ച ലാഭവും ആഗ്രഹിക്കുന്നവർക്ക് കേന്ദ്ര സർക്കാർ അവതരിപ്പിക്കുന്ന പോസ്റ്റ് ഓഫീസ് പദ്ധതികൾ എന്നും പ്രിയപ്പെട്ടതാണ്. അത്തരത്തിൽ നിക്ഷേപകർക്ക് വലിയൊരു തുക സമ്പാദിക്കാൻ സഹായിക്കുന്ന മികച്ച നിക്ഷേപ മാർഗമാണ് നാഷണൽ സേവിങ്‌സ് സർട്ടിഫിക്കറ്റ്. അഞ്ച് വർഷത്തെ ലോക്ക്-ഇൻ പിരീഡുള്ള ഈ പദ്ധതിയിലൂടെ 36 ലക്ഷം രൂപ വരെ നേടാനുള്ള അവസരമാണ് ഇപ്പോൾ ഒരുങ്ങുന്നത്.

പോസ്റ്റ് ഓഫീസുകൾ വഴി ലഭ്യമാകുന്ന ഏറ്റവും സുരക്ഷിതമായ ലഘു സമ്പാദ്യ പദ്ധതികളിലൊന്നാണ് എൻഎസ്‌സി. കേന്ദ്രസർക്കാരിന്റെ ഗ്യാരണ്ടി ഉള്ളതിനാൽ പണം നഷ്ടപ്പെടുമെന്ന പേടിയില്ലാതെ സാധാരണക്കാർക്കും ഇതിൽ നിക്ഷേപിക്കാം. നിലവിൽ മികച്ച പലിശ നിരക്കാണ് ഈ പദ്ധതിക്ക് ലഭിക്കുന്നത്. ഓരോ പാദത്തിലും സർക്കാർ പലിശ നിരക്കുകൾ പുനഃപരിശോധിക്കാറുണ്ട്. ആദായനികുതി നിയമത്തിലെ സെക്ഷൻ 80സി പ്രകാരം പ്രതിവർഷം 1.5 ലക്ഷം രൂപ വരെയുള്ള നിക്ഷേപങ്ങൾക്ക് നികുതി ഇളവ് ലഭിക്കും. അഞ്ച് വർഷമാണ് ഈ പദ്ധതിയുടെ കാലാവധി.

36 ലക്ഷം രൂപ എങ്ങനെ ലഭിക്കും?

ഈ പദ്ധതിയുടെ പ്രധാന ആകർഷണം ഇതിലെ കോമ്പൗണ്ടിങ് ഇഫക്റ്റ് (കൂട്ടുപലിശ) ആണ്. ഉദാഹരണത്തിന്, ഒരാൾ 25 ലക്ഷം രൂപ എൻഎസ്‌സിയിൽ നിക്ഷേപിക്കുകയാണെങ്കിൽ, അഞ്ച് വർഷത്തെ കാലാവധി പൂർത്തിയാകുമ്പോൾ അത് 36.47 ലക്ഷം രൂപയായി വളരും. ഏകദേശം 11.47 ലക്ഷം രൂപയാണ് അഞ്ച് വർഷത്തിനുള്ളിൽ പലിശയിനത്തിൽ മാത്രം നിക്ഷേപകന് ലഭിക്കുന്നത്.

മറ്റ് ഗുണങ്ങൾ

എൻഎസ്‌സി സർട്ടിഫിക്കറ്റുകൾ ഈടായി നൽകി ബാങ്കുകളിൽ നിന്ന് വായ്പ എടുക്കാവുന്നതാണ്. വെറും 1000 രൂപ മുതൽ നിക്ഷേപം ആരംഭിക്കാവുന്നതാണ്. പരമാവധി നിക്ഷേപത്തിന് പരിധിയില്ല. ഏതൊരു ഇന്ത്യൻ പൗരനും അടുത്തുള്ള പോസ്റ്റ് ഓഫീസ് സന്ദർശിച്ച് അടിസ്ഥാന കെവൈസി രേഖകൾ നൽകി അക്കൗണ്ട് തുടങ്ങാം. 

പ്രായപൂർത്തിയായ ഏതൊരു ഇന്ത്യൻ പൗരനും സ്വന്തം പേരിലോ മറ്റൊരാളുമായി ചേർന്ന് ജോയിന്റ് അക്കൗണ്ടായോ നിക്ഷേപം നടത്താം. 10 വയസ്സിന് മുകളിലുള്ള കുട്ടികൾക്ക് സ്വന്തം പേരിലും, അതിൽ താഴെയുള്ളവർക്ക് രക്ഷിതാക്കൾ വഴിയും അക്കൗണ്ട് തുടങ്ങാം. എന്നാൽ എൻആർഐകൾക്കും കമ്പനികൾക്കും ട്രസ്റ്റുകൾക്കും ഈ പദ്ധതിയിൽ ചേരാൻ അനുവാദമില്ല. 

ബാങ്ക് സ്ഥിരനിക്ഷേപങ്ങളേക്കാൾ ആകർഷകമായ പലിശയും നികുതി ആനുകൂല്യങ്ങളും ലഭിക്കുമെന്നതിനാൽ, ദീർഘകാല നിക്ഷേപം ആഗ്രഹിക്കുന്നവർക്ക് നാഷണൽ സേവിങ്‌സ് സർട്ടിഫിക്കറ്റ് മികച്ചൊരു തിരഞ്ഞെടുപ്പാണ്.