സ്വന്തമായി ഒരു വീടെന്ന സ്വപ്നം യാഥാര്ത്ഥ്യമാക്കുന്നതിനായി ധാരാളം പേര് ഭവന വായ്പകളെ ആശ്രയിക്കുന്നുണ്ട്. ആവശ്യക്കാരുടെ എണ്ണത്തിലെ വര്ധനവ് മനസ്സിലാക്കിക്കൊണ്ട് ബാങ്കുകളും മറ്റ് ധനകാര്യ സ്ഥാപനങ്ങളും പലിശ നിരക്കില് ഇളവുകളും മറ്റ് ഓഫറുകളുമൊക്കെ ഇപ്പോള് പല തരത്തിലുള്ള ഭവന വായ്പകള് വാഗ്ദാനം ചെയ്യുന്നുണ്ട്. ഭവന വായ്പകള് ദീര്ഘകാല വായ്പകളാണ്. പ്രതിമാസ ഇഎംഐ തുകയില് കുറവ് വരുത്തുന്നതിനായി വായ്പാ കാലാവധി കൂടുതല് ദീര്ഘിപ്പിക്കുന്നവരും കുറവല്ല.
Also Read : 1 കോടി രൂപ സമ്പാദിക്കണോ? ദിവസം വെറും 50 രൂപ മാറ്റി വച്ച് ഈ നിക്ഷേപം ആരംഭിക്കാം
പലിശ ഇനത്തില്
എന്നാല് കാലാവധി നീളും തോറും പോക്കറ്റില് നിന്നും ചിലവാകുന്ന പലിശത്തുകയും ഉയരുമെന്ന് ഓര്ക്കുക. പലപ്പോളും ഭവന വായ്പായായി എടുത്ത തുകയേക്കാള് ഏറെ പലിശ ഇനത്തില് നല്കേണ്ടി വരുന്ന സാഹചര്യങ്ങള് പോലുമുണ്ടാകാറുണ്ട്. 25 ലക്ഷം രൂപ മുതല് 30 ലക്ഷം രൂപ വരെയുള്ള ഭവന വായ്പകളില് നിങ്ങള്ക്ക് തിരിച്ചടവ് നടത്തേണ്ടി വരുന്ന തുക കണക്കാക്കി നോക്കിയാല് ഭവന വായ്പ ഇരട്ടിയാകുന്നത് നിങ്ങള്ക്ക് മനസ്സിലാക്കുവാന് സാധിക്കും.
Also Read : മ്യൂച്വല്ഫണ്ട് നിക്ഷേപത്തില് നിന്നും മികച്ച ആദായം നേടാന് ഇക്കാര്യങ്ങള് ശ്രദ്ധിയ്ക്കൂ
വായ്പാ തുക തിരികെ നേടാം
എന്നാല് നിങ്ങള് വിവേകശാലിയായ ഒരു നിക്ഷേപകനാണെങ്കില് ഇത്തരത്തില് ഭവന വായ്പാ തിരിച്ചടവിലൂടെ നിങ്ങള്ക്ക് നഷ്ടമാകുന്ന പലിശത്തുക തിരികെ നേടുവാന് നിങ്ങള്ക്ക് സാധിക്കും. അതിനായി മ്യൂച്വല് ഫണ്ട് സിസ്റ്റമെറ്റിക് ഇന്വസ്റ്റ്മെന്റ് പ്ലാനുകള് നിങ്ങളെ സഹായിക്കും. ഭവന വായ്പാ ഇഎംഐ തിരിച്ചടവ് നിങ്ങള് എപ്പോള് ആരംഭിക്കുന്നുവോ അതേ സമയം തന്നെ നിങ്ങളുടെ പ്രതിമാസ ഇഎംഐ തുകയുടെ 10 ശതമാനം വരുന്ന മ്യൂച്വല് ഫണ്ട് എസ്ഐപി നിക്ഷേപവും ആരംഭിക്കാം. ഈ രീതിയില് നിക്ഷേപം ആരംഭിച്ചാല് നിങ്ങളുടെ മുഴുവന് വായ്പാ തുകയും നിങ്ങള്ക്ക് തിരികെ ലഭിക്കും.
കണക്കുകള് നോക്കാം
ഇതെങ്ങനെയാണ് സംഭവിക്കുന്നതെന്ന് നമുക്ക് കണക്കുകകളിലൂടെ ഒന്ന് പരിശോധിച്ചു നോക്കാം. നിങ്ങള് എടുത്തിരിക്കുന്ന ഭവന വായ്പാ തുക 30 ലക്ഷം രൂപയാണെന്ന് കരുതാം. 25 വര്ഷമാണ് ഇഎംഐ കാലയളവ് എന്നിരിക്കട്ടെ. പലിശ നിരക്ക് 6.75 ശതമാനമാണ് (എസ്ബിഐ ബാങ്കിന്റെ പലിശ നിരക്ക്). പ്രതിമാസ ഇഎംഐ തുക 20,727 രൂപയാണ്. പലിശ ഇനത്തില് ആകെ നല്കുന്ന തുക 32,18,204 രൂപ. ആകെ വായ്പാ തിരിച്ചടവ് 62,18,204 രൂപയും. ഇവിടെ നിങ്ങള് 30 ലക്ഷം രൂപയുടെ വായ്പ എടുത്തത് 25 വര്ഷത്തെ തിരിച്ചടവ് പൂര്ത്തിയാകുമ്പോള് 62 ലക്ഷം രൂപയിലേറെയായി വളര്ന്നു. അതായത് നിങ്ങളുടെ വായ്പാ തുകയുടെ ഇരട്ടിയിലുമേറെ.
Also Read : ഈ വര്ഷം നിക്ഷേപത്തിനായിതാ 3 മികച്ച റിട്ടയര്മെന്റ് മ്യൂച്വല് ഫണ്ട് എസ്ഐപികള്
എസ്ഐപി നിക്ഷേപത്തില്
ഇനി എസ്ഐപി നിക്ഷേപവും അതിന്റെ പലിശ നിരക്കും നമുക്കൊന്ന് കണക്കാക്കി നോക്കാം. പ്രതിമാസ എസ്ഐപി തുക ഇഎംഐ തുകയുടെ 10 ശതമാനമായ 2000 രൂപയാണ്. 25 വര്ഷമാണ് എസ്ഐപി നിക്ഷേപത്തിന്റെയും കാലയളവ്. പ്രതിവര്ഷം 15 ശതമാനമാണ് പ്രതീക്ഷിക്കുന്ന ആദായം. ഈ കാലയളവില് നിങ്ങള് ആകെ നിക്ഷേപം നടത്തുന്ന തുക 6 ലക്ഷം രൂപയാണ്. എന്നാല് നിക്ഷേപ കാലാവധി പൂര്ത്തിയാകുമ്പോള് നിങ്ങളുടെ എസ്ഐപി നിക്ഷേപം 65.7 ലക്ഷം രൂപയായി വളരും.
Also Read : എല്ഐസി പോളിസിയിലൂടെയും വ്യക്തിഗത വായ്പ നേടാം; എങ്ങനെയെന്ന് അറിയേണ്ടേ?
വായ്പാ തിരിച്ചടവിലെ നഷ്ടം എസ്ഐപി നിക്ഷേപത്തിലൂടെ ഇല്ലാതാക്കാം
ഇവിടെ, നിങ്ങള് 30 ലക്ഷം രൂപയുടെ 25 വര്ഷത്തെ വായ്പയ്ക്കായി ബാങ്കിന് തിരികെ നല്കുന്നത് 62 ലക്ഷം രൂപയാണ്. അതേ സമയം ഇതേ 25 വര്ഷക്കാലയളവില് 6 ലക്ഷം രൂപ എസ്ഐപി രീതിയില് നിക്ഷേപം നടത്തുമ്പോള് നിങ്ങള്ക്ക് ലഭിക്കുന്നത് 66 ലക്ഷം രൂപയാണ്. ഇത്തരത്തില് വായ്പാ തിരിച്ചടവില് നിങ്ങള്ക്കുണ്ടാകുന്ന നഷ്ടം എസ്ഐപി നിക്ഷേപത്തിലൂടെ ഇല്ലാതാക്കാം.