എല്ലാ മാസവും ഉറപ്പായ വരുമാനം, റിട്ടയർമെന്‍റ് ജീവിതം അടിപൊളിയാക്കൂ, ഇതാണ് പദ്ധതി

കത്തുകളും മറ്റ് രേഖകളും കൃത്യമായി ജനങ്ങളുടെ കൈകളിലെത്തിക്കുക എന്നത് മാത്രമല്ല പോസ്റ്റ് ഓഫീസ് ചെയ്യുന്നതെന്ന് നിങ്ങൾക്കറിയാമോ... പ്രതിമാസ വരുമാനം നൽകുന്ന നിരവധി നിക്ഷേപക പദ്ധതികളും പോസ്റ്റ് ഓഫീസിലുണ്ട്. നിക്ഷേപകർക്ക് അവരുടെ സാമ്പത്തിക സ്ഥിതി അനുസരിച്ച് ഏത് പദ്ധതിയിൽ വേണമെങ്കിലും ചേരാൻ സാധിക്കും. എന്തായാലും പോസ്റ്റ് ഓഫീസ് നിക്ഷേപ പദ്ധതിയിൽ ഏറ്റവു ജനപ്രിയം സീനിയർ സിറ്റിസൺ സേവിംഗ് സ്കീം ആണ്. എന്താണ് ഈ പദ്ധതിയെന്നും പദ്ധതിയുടെ ഗുണങ്ങൾ എന്തെല്ലാമാണെന്നും നമുക്ക് നോക്കാം.

സീനിയർ സിറ്റിസൺ സേവിംഗ് സ്കീം

മുതിർന്ന പൗരന്മാർക്കുള്ള ഏറ്റവും മികച്ച സ്ഥിരവരുമാന പദ്ധതികളിലൊന്നാണ് സീനിയർ സിറ്റിസൺ സേവിംഗ് സ്കീം. 60 വയസിന് മുകളിലുള്ള ആർക്കും വ്യക്തിപരമായോ പങ്കാളിയുമായി ചേർന്നോ അക്കൗണ്ട് തുറക്കാം. 1000 രൂപയാണ് ഏറ്റവും കുറഞ്ഞ നിക്ഷേപ തുക. പരമാവധി നിക്ഷേപിക്കാൻ സാധിക്കുന്ന തുക 30 ലക്ഷം രൂപയാണ്.

കാലാവധിയും പലിശ നിരക്കും

അഞ്ച് വർഷമാണ് പദ്ധതി കാലാവധി. ആവശ്യമെങ്കിൽ മൂന്ന് വർഷം കൂടി പദ്ധതി കാലാവധി നീട്ടാം. മാത്രമല്ല, ഒരു വർഷം പൂർത്തിയായതിന് ശേഷം പണം പിൻവലിക്കാം, ഇതിനായി പിഴ അടക്കേണ്ടിവരുമെന്ന് മാത്രം.

നിലവിൽ 8.2 ശതമാനം പലിശയാണ് സർക്കാർ നൽകുന്നത്. അതായത് രാജ്യത്ത് ബാങ്കുകൾ സ്ഥിര നിക്ഷേപത്തിന് നൽകുന്നതിനേക്കാൾ ഉയർന്ന പലിശ. ഓരോ പാദത്തിലും പലിശ നിരക്ക് ധനമന്ത്രാലയം അവലോകനം ചെയ്യുന്നു. ഏപ്രിൽ, ജൂലൈ, ഒക്ടോബർ, ജനുവരി മാസങ്ങളിലെയും ഒന്നാം തീയതിയാണ് പലിശ നൽകുന്നത്.

കാലാവധി പൂർത്തിയാകുന്നതിന് മുമ്പ് അക്കൗണ്ട് ഉടമ മരിക്കുകയാണെങ്കിൽ, അക്കൗണ്ട് ക്ലോസ് ചെയ്യുകയും അതിൻ്റെ മുഴുവൻ തുകയും രേഖകളിൽ രേഖപ്പെടുത്തിയിരിക്കുന്ന നോമിനിക്ക് കൈമാറും.

പ്രതിമാസം 20,500 രൂപ നേടാം

റിട്ടയർമെൻ്റിനു ശേഷം സ്ഥിരവരുമാനം നേടാൻ ആഗ്രഹിക്കുന്നവർക്ക് ഏറ്റവും അനുയോജ്യമായ പദ്ധതിയാണ് സീനിയർ സിറ്റിസൺ സേവിംഗ് സ്കീം. കാരണം പദ്ധതിയിൽ റിട്ടയർമെന്‍റ് സമയത്ത് ലഭിക്കുന്ന തുകയുടെ ഒരു നിശ്ചിത ശതമാനം നിക്ഷേപിച്ചാൽ എല്ലാ മാസവും ഉയർന്ന തുക നേടാൻ സാധിക്കും.

ഒറ്റത്തവണയായി 15 ലക്ഷം രൂപ നിക്ഷേപിച്ചാൽ ഓരോ പാദത്തിലും 10,250 രൂപ നേടാനാകും. 5 വർഷത്തിനുള്ളിൽ നിങ്ങൾക്ക് പലിശയിൽ നിന്ന് 2 ലക്ഷം രൂപ വരെ ലഭിക്കും.

ഒറ്റത്തവണയായി 30 ലക്ഷം രൂപ നിക്ഷേപിക്കുകയാണെങ്കിൽ, നിങ്ങൾക്ക് പ്രതിവർഷം 2,46,000 രൂപ പലിശ ലഭിക്കും. അതായത് നിങ്ങൾക്ക് പ്രതിമാസ അടിസ്ഥാനത്തിൽ 20,500 രൂപയും ത്രൈമാസ അടിസ്ഥാനത്തിൽ 61,500 രൂപയും ലഭിക്കുമെന്ന് സാരം.

ഒരുമിച്ച് നിക്ഷേപിച്ച പണം: 30 ലക്ഷം രൂപ
കാലാവധി: 5 വർഷം
പലിശ നിരക്ക്: 8.2%
കാലാവധി പൂർത്തിയാകുമ്പോൾ ലഭിക്കുന്ന ആകെ തുക: 42,30,000 രൂപ
പലിശ വരുമാനം: 12,30,000 രൂപ
ത്രൈമാസ വരുമാനം: 61,500 രൂപ
പ്രതിമാസ വരുമാനം: 20,500 രൂപ
വാർഷിക പലിശ - 2,46,000

നികുതി ഇളവ്

ഇന്ത്യയിലെ ഏത് പോസ്റ്റ് ഓഫീസുകളിലും സീനിയർ സിറ്റിസൺസ് സേവിംഗ്സ് സ്കീം അക്കൗണ്ട് തുറക്കാം. ഈ സ്കീമിന് കീഴിലുള്ള നിക്ഷേപങ്ങൾക്ക് 1961 ലെ ആദായനികുതി നിയമത്തിലെ നിയമത്തില 80-C അനുസരിച്ചുള്ള ഇളവുകൾ ലഭിക്കും. അതായത് ഓരോ വർഷവും 1.5 ലക്ഷം രൂപ വരെ നികുതി ഇളവിൻ്റെ ആനുകൂല്യം നേടാം.