സ്റ്റാന്‍ഡപ് ഇന്ത്യ വായ്പ ആര്‍ക്കൊക്കെ ലഭിക്കും

2016 ഏപ്രില്‍ 5 നാണ് പ്രധാനമന്ത്രി നരേന്ദ്ര മോദി സ്റ്റാന്‍ഡ് അപ്പ് ഇന്ത്യ പദ്ധതി പ്രഖ്യാപിച്ചത്. രാജ്യത്ത് സാമൂഹികമായി പിന്നാക്കം നില്‍ക്കുന്ന പട്ടികജാതി പട്ടികവര്‍ഗ വിഭാഗക്കാരെയും വനിതകളേയും സംരംഭകരാക്കുന്നതിനാണ് പദ്ധതി ആവിഷ്‌കരിച്ചത്.

രാജ്യത്തുള്ള ആകെ 1,25,000 ബാങ്ക് ശാഖകള്‍ വഴി ഈ വിഭാഗങ്ങള്‍ക്ക് വായ്പ ലഭ്യമാക്കും. ഓരോ ശാഖയും പട്ടികജാതി-പട്ടികവര്‍ഗ വിഭാഗത്തിലെ ഒരു സംരംഭകനെങ്കിലും വായ്പ അനുവദിക്കണം. കൂടാതെ ഒരു വനിതക്കും വായ്പ നല്‍കണം. 2,50,000 തൊഴില്‍ സംരംഭങ്ങളാണ് സ്റ്റാന്‍ഡപ്പ് ഇന്ത്യ ലക്ഷ്യം വെക്കുന്നത്.

സ്റ്റാന്‍ഡപ് ഇന്ത്യ വായ്പ നേടാന്‍ വേണ്ട യോഗ്യതകള്‍

1. വായ്പ ആര്‍ക്കെല്ലാം

സംരംഭകര്‍ പട്ടികജാതി/പട്ടികവര്‍ഗ വിഭാഗത്തില്‍പ്പെട്ടവരോ വനിതയോ ആയിരിക്കണം.

2. കൂട്ട് സംരംഭങ്ങള്‍

ജോയിന്റ് സംരംഭങ്ങളാണെങ്കില്‍ 51 ശതമാനത്തില്‍ കുറയാത്ത ഓഹരി എസ്.സി/എസ്.ടി/വനിതാ വിഭാഗത്തിന് ഉണ്ടായിരിക്കണം.

3. പ്രായപരിധി

18 വയസ് തികഞ്ഞവര്‍ക്ക് മാത്രമേ വായ്പ ലഭിക്കുകയുള്ളൂ. ഉയര്‍ന്ന പ്രായപരിധിയില്ല.

4. പുതു സംരംഭങ്ങള്‍ക്ക് മാത്രം

പുതിയ സംരംഭങ്ങള്‍ക്ക് മാത്രമേ വായ്പ ലഭിക്കുകയുള്ളൂ.

5. കുടിശ്ശികക്കാര്‍ക്ക് വായ്പയില്ല

അപേക്ഷകര്‍ കുടിശ്ശികക്കാരാവാന്‍ പാടില്ല.

6. വായ്പ എല്ലാവര്‍ക്കും

നിര്‍മാണ സ്ഥാപനങ്ങള്‍ക്കും സേവന സ്ഥാപനങ്ങള്‍ക്കും വ്യാപാര സ്ഥാപനങ്ങള്‍ക്കും വായ്പ ലഭിക്കും.

7. വായ്പാതുക

10 ലക്ഷം രൂപ മുതല്‍ ഒരു കോടി രൂപ വരെ ചെലവ് വരുന്ന പ്രോജക്ടുകള്‍ക്കാണ് വായ്പ അനുവദിക്കുക.

8. ക്രഡിറ്റ് ഗ്യാരണ്ടി

ക്രഡിറ്റ് ഗ്യാരണ്ടി എന്ന ആനുകൂല്യം പക്ഷേ, വ്യാപാരസ്ഥാപനങ്ങള്‍ക്ക് ലഭിക്കില്ല. അത്തരം അപേക്ഷകര്‍ കൊളറ്ററല്‍ സെക്യൂരിറ്റി നല്‍കേണ്ടി വരും എന്ന് ചുരുക്കം.നിര്‍മാണ-സേവന സ്ഥാപനങ്ങള്‍ക്ക് കൊളറ്ററല്‍ സെക്യൂരിറ്റി ഇല്ലാതെ തന്നെ സി.ജി.ടി.എം.എസ്.ഇ. പ്രകാരം വായ്പകള്‍ ലഭിക്കുന്നതാണ്.