യൂണിയന്‍ ബജറ്റിനെ കുറിച്ച് കൂടുതല്‍ മനസ്സിലാക്കാന്‍ ഈ പദങ്ങള്‍ സഹായിക്കും

2017ലെ കേന്ദ്ര ബജറ്റിനായി രാജ്യത്തുടനീളമുള്ള ജനങ്ങള്‍ ജിജ്ഞാസയോടെ കാത്തിരിക്കുകയാണ്. ഓരോരുത്തരേയും നേരിട്ടും അല്ലാതെയും ബാധിക്കുന്ന നിരവധി സാമ്പത്തിക തീരുമാനങ്ങളാണ് വരാനിരിക്കുന്നത്. യൂണിയന്‍ ബജറ്റിനെക്കുറിച്ച് കൂടുതല്‍ കാര്യങ്ങള്‍ മനസ്സിലാക്കാന്‍ താഴെ ചേര്‍ക്കുന്ന പദങ്ങളും അതിന്റെ വിശകലനങ്ങളും സഹായിക്കും

പ്രത്യക്ഷ നികുതി(direct tax)

പ്രത്യക്ഷ നികുതി അഥവാ നേരിട്ടുള്ള നികുതി. ആദായ നികുതി, കമ്പനി നികുതി, ഭൂമിയുടെ നികുതി തുടങ്ങിയവ പ്രത്യക്ഷ നികുതിയില്‍ ഉള്‍പ്പെടുന്നതാണ്.

 

 

പരോക്ഷ നികുതി(indirect tax)

നിര്‍മിത ഉല്‍പന്നങ്ങള്‍, ഇറക്കുമതി ഉല്‍പന്നങ്ങള്‍, കയറ്റുമതി ഉല്‍പന്നങ്ങള്‍ എന്നിവയ്ക്കുള്ള നികുതി പരോക്ഷ നികുതിയില്‍ ഉള്‍പ്പെടുന്നു. എക്സൈസ് തീരുവ, കസ്റ്റംസ് തീരുവ, സേവന നികുതി തുടങ്ങിവയും ഇതില്‍ വരും. ഇത് സമ്പന്നര്‍ക്കും ദരിദ്രര്‍ക്കും ഒരേ രീതിയില്‍ ബാധകമാണ്.

 

 

സെക്യൂരിറ്റീസ് ട്രാന്‍സാ്ക്ഷന്‍ ടാക്‌സ്(securities transaction tax)

ഓഹരി ഇടപാടുകളിന്‍മേലുള്ള നികുതിയെയാണ് സെക്യൂരിറ്റീസ് ട്രാന്‍സാ്ക്ഷന്‍ ടാക്‌സ് എന്ന് പറയുന്നത്.

ബാങ്കിംഗ് ക്യാഷ് ട്രാന്‍സാക്ഷന്‍ ടാക്‌സ്(banking cash transaction tax)

ബാങ്കില്‍നിന്ന് നിശ്ചയിക്കപ്പെട്ടിട്ടുള്ള പരിധിക്കുമേലുള്ള തുക ഒറ്റദിവസം പിന്‍വലിച്ചാല്‍ ചുമത്തുന്ന നികുതിയാണിത്.

 

 

 

ഉല്‍പ്പന്ന സേവന നികുതി(goods & services tax/gst)

കേന്ദ്രത്തിന്റെ എക്സൈസ് ഡ്യൂട്ടി, സേവന നികുതി, സംസ്ഥാനങ്ങളുടെ വാറ്റ് നികുതി, പര്‍ച്ചേസ് ടാക്സ്, പ്രവേശന നികുതി എന്നിങ്ങനെ വിവിധ തലങ്ങളിലെ പരോക്ഷ നികുതികളുടെ സ്ഥാനത്തു കേന്ദ്രത്തിനും
സംസ്ഥാനങ്ങള്‍ക്കും ബാധകവും സുതാര്യവുമായ ഒരൊറ്റ നികുതി എന്നതാണു ജിഎസ്ടിയുടെ ലക്ഷ്യം.

 

 

വാര്‍ഷിക ധനകാര്യ രേഖ(annual financial statement)

അടുത്ത ധനകാര്യവര്‍ഷത്തില്‍ ഉണ്ടാകാവുന്ന വരവുകളും ചിലവുകളും വ്യക്തമാക്കുന്ന രേഖയാണ് ആനുവല്‍ ഫിനാന്‍ഷ്യല്‍ സ്റ്റേറ്റ്‌മെന്റ്. കണ്‍സോളിഡേറ്റഡ് ഫണ്ട്, കണ്ടിന്‍ജന്‍സി ഫണ്ട്, പബ്ലിക് അക്കൗണ്ട് എന്നിങ്ങനെ മൂന്നു ഭാഗങ്ങളാണുള്ളത്. ഓരോ ഇനത്തിലും വരവു ചെലവു കണക്കുകളുണ്ടാകും.

 

 

നികുതിയേതര വരുമാനം(non-tax revenue)

സര്‍ക്കാര്‍ സംസ്ഥാനങ്ങള്‍ക്കും റയില്‍വേ പോലെയുള്ള സ്ഥാപനങ്ങള്‍ക്കും നല്‍കുന്ന വായ്പയുടെ പലിശ, പൊതുമേഖലാ സ്ഥാപനങ്ങള്‍ നല്‍കുന്ന ലാഭവിഹിതം എന്നിവയാണ് ഇതില്‍ മുഖ്യം. സര്‍ക്കാരിന്റെ വിവിധ വകുപ്പുകളും വിഭാഗങ്ങളും നല്‍കുന്ന സേവനത്തിനു ലഭിക്കുന്ന തുക മറ്റൊരു വരുമാനമാര്‍ഗമാണ്. സര്‍ക്കാരിനു ലഭിക്കുന്ന, തിരിച്ചടയ്ക്കേണ്ടാത്ത സംഭാവനകളും ധനസഹായവും (ഗ്രാന്റ് ഇന്‍ എയ്ഡ്) ഇക്കൂട്ടത്തില്‍പ്പെടും.

 

 

റവന്യൂ കമ്മി(revenue deficit)

സര്‍ക്കാരിന്റെ വരവും ചിലവും തമ്മിലുള്ള അന്തരത്തെയാണ് റവന്യൂ കമ്മിയെന്ന് പറയുന്നത്. ചിലവുകള്‍ നേരിടാനുള്ള വരുമാനം കണ്ടെത്താനകുന്നില്ലെങ്കില്‍ വായ്പയെടുക്കേണ്ടിവരുന്നു. ആസ്തി സൃഷ്ടിക്കാനല്ലാതെ, ദൈനംദിന ചിലവുകള്‍ക്കായി വായ്പയെടുക്കേണ്ടിവരുന്നത് ഉചിതമല്ല.

ധന കമ്മി(fiscal deficit)

കേന്ദ്ര സര്‍ക്കാരിന്റെ മൊത്ത ചിലവും വായ്പ ഒഴികെയുള്ള മൊത്ത വരുമാനവും തമ്മിലുള്ള അന്തരമാണിത്. റിസര്‍വ് ബാങ്കില്‍നിന്നും മറ്റും കടം വാങ്ങിയാണ് കമ്മി നികത്തുന്നത്.

 

 

സെസ്സ്(cess)

ഏതെങ്കിലും പ്രത്യേക ചിലവിനു പണം കണ്ടെത്താന്‍ സര്‍ക്കാര്‍ ഏതെങ്കിലും നികുതിക്കുമേല്‍ ഏര്‍പ്പെടുത്തുന്ന നികുതിയാണ് സെസ്സ്.

ധനകാര്യ ബില്‍(finance bill)

പുതിയ നികുതികള്‍ ചുമത്താനോ, നിലവിലുള്ളവ പരിഷ്‌കരിക്കാനോ, നിലവിലുള്ളവയുടെ കാലാവധി നീട്ടാനോ ഉള്ളതടക്കം നികുതിനിര്‍ദേശങ്ങള്‍ പാര്‍ലമെന്റിന്റെ അംഗീകാരത്തിനു സമര്‍പ്പിക്കുന്നത് ഫിനാന്‍സ് ബില്‍ വഴിയാണ്.

 

 

 

എക്‌സൈസ്സ് തീരുവ(excise duty)

ഇന്ത്യയില്‍ നിര്‍മ്മിക്കുന്ന ഉല്‍പന്നങ്ങള്‍ക്കുള്ള തീരുവയാണിത്.

കസ്റ്റംസ് തീരുവ(customs duty)

ഇറക്കുമതിച്ചരക്കുകള്‍ക്കു ചുമത്തുന്ന നികുതിയെയാണ് കസ്റ്റംസ് തീരുവയെന്ന് പറയുന്നത്. വരുമാനമുണ്ടാക്കല്‍ മാത്രമല്ല, ആഭ്യന്തര വ്യവസായത്തെയും കൃഷി തുടങ്ങിയ മേഖലകളെയും വിദേശ ഉല്‍പ്പന്നങ്ങളുടെ കടന്നുകയറ്റത്തില്‍നിന്നു രക്ഷിക്കുകയും കസ്റ്റംസ് തീരുവയുടെ ലക്ഷ്യമാണ്. വാഹനങ്ങള്‍ക്ക് വളരെ ഉയര്‍ന്ന കസ്റ്റംസ് തീരുവ ഉള്ളതാണ് വിദേശത്തെ ആഡംബര കാര്‍ നിര്‍മ്മതാക്കള്‍ പോലും ഇന്ത്യയില്‍ ഉല്‍പ്പാദനമാരംഭിക്കാനുള്ള പ്രധാന കാരണം.