വാഹനവായ്പകള്‍ തിരഞ്ഞെടുക്കുമ്പോള്‍ ശ്രദ്ധിക്കേണ്ട കാര്യങ്ങള്‍ എന്തൊക്കെയാണ്?

ഏതൊരു സാധാരണക്കാരന്റേയും സ്വപ്‌നമാണ് സ്വന്തമായൊരു വാഹനം. സ്വപ്നവാഹനം സ്വന്തമാക്കാന്‍ ഉപഭോക്താക്കളെ സഹായിക്കുന്ന നല്ലൊരു മാര്‍ഗമാണ് വാഹനവായ്പ. വായ്പാദാതാക്കളാകട്ടെ ഓരോരുത്തരുടെയും വൈവിധ്യമാര്‍ന്ന ആവശ്യങ്ങള്‍ക്കിണങ്ങുന്ന ക്രിയാത്മകമായ വായ്പകളാണ് ഉപഭോക്താക്കള്‍ക്കായി ഒരുക്കുന്നത്. നടപടികള്‍ വളരെ ലളിതമാണെങ്കില്‍ക്കൂടിയും വാഹനവായ്പ എടുക്കുമ്പോള്‍ ചില കാര്യങ്ങള്‍ ശ്രദ്ധിക്കാനുണ്ട്.

മികച്ച വാഹനവായ്പകള്‍ എവിടെ?

നിങ്ങള്‍ പുതിയ കാറാണ് വാങ്ങാന്‍ ഉദ്ദേശിക്കുന്നതെങ്കില്‍ ആ ഡീലര്‍ഷിപ്പ് വഴി കാര്‍ ലോണിനായി അപേക്ഷിക്കാം. എല്ലാ കമ്പനി ഡീലര്‍ഷിപ്പുകളിലും ഓട്ടോ ലോണ്‍ ഡെസ്‌ക്കുകള്‍ പ്രവര്‍ത്തിക്കുന്നുണ്ട്. അവര്‍ വായ്പാദാതാക്കളുമായി സംസാരിച്ച് വായ്പ ലഭ്യമാക്കും. കൂടാതെ വാഹനവായ്പക്കായി നിങ്ങള്‍ക്ക് വ്യക്തിപരമായി അടുപ്പമുള്ള ബാങ്കുകളുമായി സംസാരിക്കുകയോ ഓണ്‍ലൈനില്‍ അപേക്ഷിക്കുകയോ ചെയ്യാം. യൂസ്ഡ് കാറാണ് വാങ്ങുന്നതെങ്കില്‍ നിങ്ങള്‍ നേരിട്ട് ബാങ്കില്‍ അപേക്ഷിക്കേണ്ടി വരും. വായ്പയ്ക്കുള്ള നടപടിക്രമങ്ങള്‍ ഒരുപോലെയാണെങ്കിലും പലിശനിരക്കില്‍ വ്യത്യാസം വരും.

 

 

ഇക്വേര്‍ഡ് മന്‍ത്‌ലി ഇന്‍സ്റ്റാള്‍മെന്റ്(ഇ എം ഐ) എങ്ങനെ?

പേഴ്സണല്‍ ലോണ്‍, ഭവനവായ്പ തുടങ്ങിയവയിലേതു പോലെ ഇഎംഐ അതായത് മാസതവണകളായാണ് വാഹനവായ്പ തിരിച്ചടയ്ക്കുന്നത്. പോസ്റ്റ് ഡേറ്റഡ് ചെക്കുകള്‍വഴിയോ ഓട്ടോ ഡെബിറ്റ് (ഇസിഎസ്) വഴിയോ ആണ് പണം ധനകാര്യ സ്ഥാപനത്തിന് ലഭിക്കുന്നത്. വായ്പാദാതാക്കള്‍ വിവിധതരം തിരിച്ചടവ് മാര്‍ഗങ്ങള്‍ ഉപഭോക്താക്കള്‍ക്കായി ആവിഷ്‌കരിച്ചിട്ടുണ്ട്.

 

 

തിരിച്ചടവിന്റെ കാലാവധി

പുതിയ കാറോ മറ്റ് വാഹനമോ ആണ് ഓടുക്കുന്നതെങ്കില്‍ പരമാവധി ഏഴ് വര്‍ഷം വരെ തിരിച്ചടവിന് സമയം ലഭിച്ചേക്കും. യൂസ്ഡ് കാറാണ് വാങ്ങാന്‍ ഉദ്ദേശിക്കുന്നതെങ്കില്‍ ആ കാറിന്റെ പഴക്കം കണക്കാക്കിയായിരിക്കും കാലാവധി നിശ്ചയിക്കുന്നത്.

 

 

എത്ര തുക ലഭിക്കും?

കാറിന്റെ ഷോറൂം വിലയുടെ 85 മുതല്‍ 90 ശതമാനം വരെയാണ് സാധാരണയായി ലഭിക്കുന്ന തുക. ചില ബാങ്കുകള്‍ ഓണ്‍ റോഡ് വിലയുടെ ഇത്ര തന്നെ ശതമാനം നല്‍കാറുണ്ട്. നിങ്ങളുടെ ബാങ്ക് സ്റ്റേറ്റ്മെന്റ് പരിശോധിച്ച് മറ്റു ധനകാര്യ ആവശ്യങ്ങള്‍ കഴിഞ്ഞുള്ള വരുമാനം കണക്കാക്കിയാണ് പരമാവധി വായ്പാ തുക തീരുമാനിക്കുന്നത്.