നിങ്ങളുടെ ആധാർ കാർഡ് ആരെങ്കിലും മിസ്യൂസ് ചെയ്യുന്നുണ്ടോ? എങ്ങനെ തിരിച്ചറിയാം, പരിഹരിക്കാം

ഇന്ത്യയിൽ ജീവിക്കുന്ന ഏതൊരു വ്യക്തിയുടെയും ഏറ്റവും വലിയ തിരിച്ചറിയൽ രേഖ എന്ന് പറയപ്പെടുന്നത് അധാർഡ് കാർഡ് ആണ്. ഒരു വ്യക്തിയുടെ കണ്ണുകൾ, കൈ രേഖകൾ എന്നിവ അടയാളമായി സൂക്ഷിക്കുന്ന ആധാർ കാർഡ് പൗരത്വത്തെ കൂടി ഇപ്പോൾ പ്രതിനിധാനം ചെയ്യുന്നു.12 അക്കങ്ങൾ വരുന്ന ആധാർ കാർഡ് ഇല്ലാതെ നിലവിൽ ഇന്ത്യയിലെ യാതൊരുവിധ ഗവണ്മെന്റ് സംവിധാനങ്ങളും നമുക്ക് ഉപയോഗിക്കാൻ കഴിയില്ല. ബാങ്കിങ്, പെൻഷൻ സ്‌കീം, റേഷൻ സ്‌കീം തുടങ്ങിയ എല്ലാം തന്നെ ആധാറുമായി ബന്ധിപ്പിക്കപ്പെട്ടിരിക്കുന്നു. ഇത്രത്തോളം ഒരു മനുഷ്യന്റെ എല്ലാവിധ സംവിധാങ്ങളും അടങ്ങിയിരിക്കുന്ന ആധാർ വളരെ സുരക്ഷിതമായി നമ്മൾ കൈകാര്യം ചെയ്യേണ്ടതും സൂക്ഷിച്ചു വെക്കേണ്ടതുമാണ്.

ഇന്ത്യയിലെ ജനങളുടെ പ്രാഥമിക തിരിച്ചറിയൽ രേഖയായി ഇന്ന് ആധാർ കാർഡ് മാറിയിരിക്കുന്നു. സർക്കാർ സേവനങ്ങൾ, ബാങ്കിംഗ് സൗകര്യങ്ങൾ, ടെലികോം കണക്ഷനുകൾ എന്നിവ ആക്‌സസ് ചെയ്യുന്നതിന് ഈ 12 അക്ക ഐഡി ഇപ്പോൾ ഒഴിച്ചുകൂടാനാകാത്തതാണ്. എല്ലാ മേഖലകളും ആധാറുമായി ചേർന്ന് നിൽക്കുന്നു എന്നത് തന്നെയാണ് നിലവിലെ സാഹചര്യം.

നിരവധി അഡ്മിനിസ്ട്രേറ്റീവ് പ്രക്രിയകൾ ആധാർ വഴി ലളിതമാക്കുമ്പോൾ ഇത് ശ്രദ്ധയോടെ കൈകാര്യം ചെയ്തില്ലെങ്കിൽ ദുരുപയോഗം ചെയ്യപ്പെടാനുള്ള സാധ്യതയും നിരവധിയാണ്. സാമ്പത്തിക തട്ടിപ്പ്, ഐഡൻ്റിറ്റി മോഷണം അല്ലെങ്കിൽ സേവനങ്ങളിലേക്കുള്ള അനധികൃത പ്രവേശനം എന്നിവയ്ക്കായി നിരവധി ആളുകൾ ആധാർ കാർഡുകൾ ഉപയോഗിക്കുന്നതായി നിരവധി വാർത്തകൾ അടുത്തിടെയായി റിപ്പോർട്ട് ചെയ്യപ്പെടുന്നുണ്ട്. ഇത് മൂലം ഇരകൾക്ക് സാമ്പത്തിക നഷ്ടം അല്ലെങ്കിൽ നിയമപരമായ സങ്കീർണതകൾ എന്നിവ നേരിടേണ്ടി വരും.

നിങ്ങളുടെ ആധാർ ദുരുപയോഗം ചെയ്യപ്പെടുന്നുണ്ടോ എന്ന് എങ്ങനെ പരിശോധിക്കാം?

ആധാർ പോർട്ടലിൽ ജനങ്ങൾക്ക് നേരിട്ട് ലോഗിൻ ചെയ്യാൻ കഴിയില്ലെങ്കിലും, തങ്ങളുടെ ആധാർ നമ്പർ മുമ്പ് എവിടെയാണ് ഉപയോഗിച്ചതെന്ന് കണ്ടെത്താൻ കഴിയും എന്നതാണ് ആശ്വാസം. യാത്ര, താമസം, ബാങ്കിംഗ്, മറ്റ് ആവശ്യങ്ങൾ എന്നിവയ്ക്കായി നിങ്ങളുടെ ആധാർ ഉപയോഗപ്പെടുത്തിയിട്ടുണ്ടെങ്കിൽ അത് എളുപ്പത്തിൽ കണ്ടെത്താനാകും.

ഉപയോക്താക്കളുടെ സംരക്ഷണത്തിന് വേണ്ടി യുണീക്ക് ഐഡൻ്റിഫിക്കേഷൻ അതോറിറ്റി ഓഫ് ഇന്ത്യ (UIDAI) ആധാർ സുരക്ഷിതമായി സൂക്ഷിക്കാനും അതിൻ്റെ ഉപയോഗം ട്രാക്ക് ചെയ്യാനും സഹായിക്കുന്നതിന് വേണ്ടിയുള്ള ടൂളുകൾ അടുത്തിടെ അവതരിപ്പിച്ചിരുന്നു.

നിങ്ങളുടെ ആധാർ മിസ്യൂസ് ചെയ്യുന്നുണ്ടോ എന്ന് പരിശോധിക്കാനുള്ള വഴി

1. myAadhaar പോർട്ടലിലേക്ക് പോകുക.

2. നിങ്ങളുടെ ആധാർ നമ്പർ, ക്യാപ്‌ച കോഡ് എന്നിവ നൽകി "ഒടിപി ഉപയോഗിച്ച് ലോഗിൻ ചെയ്യുക" ക്ലിക്ക് ചെയ്യുക.

3. നിങ്ങളുടെ രജിസ്റ്റർ ചെയ്ത മൊബൈൽ നമ്പറിലേക്ക് ഒരു OTP അയയ്ക്കും. നിങ്ങളുടെ അക്കൗണ്ട് ആക്സസ് ചെയ്യാൻ അത് നൽകുക.

4. "ഓതൻ്റിക്കേഷൻ ഹിസ്റ്ററി" ഓപ്‌ഷൻ തിരഞ്ഞെടുത്ത് നിങ്ങൾ അവലോകനം ചെയ്യാൻ ആഗ്രഹിക്കുന്ന കാലയളവിനുള്ള തീയതി ശ്രേണി തിരഞ്ഞെടുക്കുക.

5. ലോഗ് പരിശോധിച്ച് പരിചിതമല്ലാത്തതോ സംശയാസ്പദമായതോ ആയ ഇടപാടുകൾ ഉണ്ടോയെന്ന് നോക്കുക.

നിങ്ങൾ അനധികൃത പ്രവർത്തനം തിരിച്ചറിയുകയാണെങ്കിൽ, ഉടൻ തന്നെ അത് UIDAI-യിൽ റിപ്പോർട്ട് ചെയ്യുക. അതിനായി യുഐഡിഎഐയുടെ '1947 ' എന്ന ടോൾ ഫ്രീ ഹെൽപ്പ് ലൈനിലേക്ക് വിളിക്കാം. അല്ലെങ്കിൽ പരാതി എഴുതി ഇമെയിലിലേക്ക് അയയ്ക്കുക.

ആധാർ ദുരുപയോഗം തടയാൻ ആധാർ ബയോമെട്രിക്‌സ് ലോക്ക് ചെയ്യാനും അൺലോക്ക് ചെയ്യാനുമുള്ള ഓപ്ഷനും യുഐഡിഎഐ വാഗ്ദാനം ചെയ്യുന്നുണ്ട്. നിങ്ങളുടെ ആധാർ ബയോമെട്രിക്‌സ് ലോക്ക് ചെയ്യുന്നതിലൂടെ നിങ്ങളുടെ ആധാർ വിശദാംശങ്ങളിലേക്ക് ആർക്കെങ്കിലും ആക്‌സസ് ഉണ്ടെങ്കിലും അവർക്ക് ബയോമെട്രിക് വിവരങ്ങൾ ദുരുപയോഗം ചെയ്യാൻ കഴിയില്ലെന്ന് ഈ സംവിധാനം ഉറപ്പ് നൽകുന്നു.

എങ്ങനെ നിങ്ങളുടെ ആധാർ ബയോമെട്രിക്‌സ് ലോക്ക് ചെയ്യാം

ആദ്യം UIDAI ഔദ്യോഗിക വെബ്സൈറ്റ് സന്ദർശിക്കുക. തുടർന്ന് "ലോക്ക്/അൺലോക്ക് ആധാർ" വിഭാഗത്തിലേക്ക് നാവിഗേറ്റ് ചെയ്യുക. നൽകിയിരിക്കുന്ന മാർഗ്ഗനിർദ്ദേശങ്ങൾ വായിച്ച് പേജിൽ നൽകിയിരിക്കുന്ന നിർദ്ദേശങ്ങൾ അവലോകനം ചെയ്‌തതിന്‌ ശേഷം ആവശ്യമായ വിവരങ്ങൾ നൽകുക. പിന്നീട് നിങ്ങളുടെ വെർച്വൽ ഐഡി (VID), പേര്, പിൻ കോഡ്, ക്യാപ്‌ച കോഡ് എന്നിവ നൽകുക. നിങ്ങളുടെ രജിസ്റ്റർ ചെയ്ത മൊബൈൽ നമ്പറിൽ ഒറ്റത്തവണ പാസ്‌വേഡ് ലഭിക്കാൻ "OTP അയയ്ക്കുക" ക്ലിക്ക് ചെയ്യുക. ശേഷം നിങ്ങളുടെ ബയോമെട്രിക്‌സ് സുരക്ഷിതമാക്കുക. പ്രക്രിയ പൂർത്തിയാക്കാനും നിങ്ങളുടെ ആധാർ ബയോമെട്രിക്‌സ് ലോക്ക് ചെയ്യാനും UIDAI നൽകുന്ന OTP ഉപയോഗിക്കുക.